Evanjellu Mateus 19:16-22 , konta istoria ida Kona-ba joven riku ida, ne'ebé interese ba Na'i Jesus Nia hanorin liuliu kona-ba moris Rohan-laek.
Tan ne'e, joven riku ne'e husu "Saida mak hau tenki halo atu hetan moris Rohan-laek?
Na'i Jesus hatán ba joven ne'e katak halo tuir ukunfuan sira hanesan “labele oho ema, labele komete adultériu, labele naʼok, labele fó sasin falsu. Respeitu imi-nia inan-aman, no imi tenke hadomi imi-nia maluk hanesan imi-nia an rasik. Mateus 19:18-19
Joven riku ne'e hatán, buat sira ne'e hau halo tuir hotu ona. Iha tan buat seluk? Na'i Jesus Nia resposta tuir mai dezafia joven ne'e. Na'i Jesus dehan, "Se ó hakarak atu sai perfeitu, bá faʼan ó-nia rikusoin sira no fó ba ema kiak, no ó sei hetan rikusoin iha lalehan, no mai tuir haʼu". Mateus 19:21
Jesus hatene katak ita presiza osan no rikusoin seluk. Maibé Jesus hatene katak ita nia Hahalok no hanoin kona-ba rikusoin bele halo ita sidi atu la'o tuir Na'i Jesus.
Maromak Nia liafuan hatete "Tanba domin ba osan mak hun ba buat aat oioin, no tanba hadomi osan mak ema balu hadook an ona husi fiar no hakanek sira-nia an ho terus barak". 1 Timoteo 6:10
Osan bele halo ema kan-teen, korupsaun, soe-malu, moras, ataksaun, no bele mós oho-an. Maibé ba joven riku ne'e, Na'i Jesus hatene Nia estilu moris- osan, kareta, feto Bonita sai ona buat ne'ebé impede buat ne'ebé nia hakarak loloos iha nia moris. Buat ne'e mak tuir Na'i Jesus ba moris Rohan-laek.
Oinsá hó ita? Seráke ita buka rikusoin to'o haluha Maromak ne'ebé Fonte ba moris no rikusoin hotu? Konsidera Na'i Jesus Nia liafuan tuir Mai ne'e:
Buat diʼak saida mak ema ida hetan se nia manán mundu tomak maibé lakon ninia moris? Saida loos mak ema ida bele fó hodi troka ninia moris? Marco 6:36-37
Maun alin sira iha Kristu ita bele buka osan, maibé lala'ok buka osan nian labele impede ita nia destinu atu hetan moris Rohan-laek.
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
