Husik Maromak Nia Liafuan Julga no Muda Ita

Versu prinsipál: Mateus 5:17–48

                          Mateus 5:17

Keta hanoin katak Hau mai atu halakon Lei ka Profeta sira. Hau mai la'ós atu halakon, maibé atu kumpri. Mateus 5:17

Bainhira ita lee Bíblia, ita buka saida? Ita buka liafuan ne’ebé fó korajen de’it, ka ita prontu atu simu mós liafuan ne’ebé korrije ita-nia sala?

Dala ruma ita lee Bíblia ho ita-nia hanoin rasik. Ita simu versu ne’ebé ita gosta, maibé ita ignora versu ne’ebé la tuir ita-nia hakarak. Tanba ne’e, ita presiza aprende atu lee Bíblia ho laran-nakloke no fiar katak nia mak Maromak Nia Liafuan.

Iha Mateus 5:17–48, Jesus esplika kona-ba Lei no profeta sira nia hanorin. Jesus dehan katak Nia la mai atu halakon Lei ka profeta sira, maibé atu kumpre sira. Nia hatudu katak Maromak Nia Lei la’ós kona-ba hahalok iha li’ur de’it; Lei ne’e mós kona-ba ita-nia hanoin, intensaun no saida mak iha ita-nia laran.

Jesus fó ezemplu balu:

Kona-ba oho ema: La’ós oho ema de’it mak sala; hirus no hakribi ema mós sala tamba bele estraga relasaun ema nian. Tanba ne’e, buka dame no rezolve problema ho ita-nia maluk sira (versíkulu 21–26).

Kona-ba adultériu: La’ós halo adultériu de’it mak sala; haree ema seluk ho hakarak seksuál ne’ebé aat mós bele sai sala iha ita-nia laran (versíkulu 27–30).

Kona-ba liafuan: Ita-nia liafuan tenke loos no fiél. Ita la presiza jura atu hatudu katak ita ko’alia lia loos (versíkulu 33–37).

Kona-ba vingansa: Jesus hanorin ita atu la buka vingansa ka selu sala ho sala (versíkulu 38–42).

Kona-ba inimigu: Jesus hanorin ita atu hadomi ita-nia inimigu no halo orasaun ba sira ne’ebé halo persegisaun ba ita (versíkulu 43–48).

Husi hanorin hirak ne’e, ita komprende katak Jesus hakarak mudansa ne’ebé hahú husi ita-nia laran. Ita la bele sai ema di’ak iha ema nia oin de’it, maibé ita-nia laran nakonu ho ódiu, inveja, hakarak aat no vingansa.

Saida mak ita aprende husi Jesus Nia hanorin?

1. Labele lee Bíblia tuir ita-nia hakarak de'it.

Dala ruma ita lee versu ida no interpreta tuir ita-nia hanoin, kultura ka interese rasik. Ita bele hili de’it parte ne’ebé ita gosta no ignora parte ne’ebé korrije ita.

Ezemplu, ita gosta versu kona-ba Maromak nia domin, maibé ita la gosta versu ne’ebé husu ita atu perdua ema ne’ebé halo sala hasoru ita.

Tanba ne’e, bainhira ita lee Bíblia, labele husu de’it: “Versu ne’e fó saida ba hau?” Maibé husu mós: “Saida mak Maromak hakarak hau muda iha hau-nia moris?”

2. Jesus hakarak muda ita-nia laran, la’ós hahalok iha li’ur de’it.

Ema bele la oho ema ida, maibé nia kontinua rai ódiu iha laran. Ema bele la halo adultériu, maibé nia kontinua haree buat ne’ebé lori nia ba tentasaun no hahalok imorál.

Jesus hanorin katak hahalok loos tenke hahú husi laran ne’ebé moos.

Prátika: Bainhira ita sente hirus, labele lalais ko’alia liafuan ne’ebé bele hakanek ema. Bainhira ita sente inveja, husu Maromak atu fó ita laran kontente. Bainhira ita hetan tentasaun, husu Espíritu Santu atu ajuda ita hili buat ne’ebé loos.

3. Aprende atu hadomi, maski ema seluk la trata ita ho di’ak.

Jesus la hanorin ita atu hadomi belun de’it. Nia husu ita atu hadomi inimigu no halo orasaun ba ema ne’ebé halo aat hasoru ita.

Ne’e la fasil. Maibé ita bele hahú ho buat simples ida: labele selu aat ho aat, la ko’alia aat kona-ba ema ne’ebé hakanek ita, no husu Maromak atu ajuda ita fó perdua.

4. Husik Bíblia julga ita, la’ós ita julga Bíblia.

Ida-ne’e importante tebes. Dala ruma ita la simu versu ida tanba nia la tuir ita-nia hanoin. Ita koko atu muda interpretasaun atu justifika ita-nia hahalok.

Maibé Maromak Nia Liafuan mak matadalan ba ita. Ita tenke husik Nia atu hatudu ita-nia sala, korrije ita-nia hanoin no muda ita-nia moris.

Ita-nia hanoin bele sala, maibé Maromak Nia Liafuan mak verdade.

Oinsá mak ita bele pratika prinsipiu sira ne'e iha ita-nia moris loroloron?

Antes lee Bíblia, halo orasaun no husu Espíritu Santu atu ajuda ita komprende.

Lee versu sira ho atensaun no komprende sira-nia konteksu.

Labele hili de’it versu ne’ebé ita gosta; simu mós hanorin ne’ebé korrije ita.

Bainhira Bíblia hatudu ita-nia sala, labele buka razaun atu defende ita-an.

Uza Jesus Nia hanorin atu hadi’a ita-nia relasaun ho família, kolega no ema ne’ebé la gosta ita.

Hatudu ita-nia fiar liuhusi hahalok, la’ós liafuan de’it.

Pergunta ba ita-an: Bainhira hau lee Bíblia, serake hau prontu atu husik Maromak muda hau-nia hanoin no hahalok, ka hau buka de’it versu ne’ebé apoia hau-nia hanoin rasik?

Liafuan importante: Iha Mateus 5:17–48, Jesus hatudu katak Lei Maromak nian iha signifikadu kle’an liu duké hahalok iha li’ur de’it. Maromak hakarak ita-nia laran, hanoin, liafuan no hahalok sai moos.

Tanba ne’e, ita tenke lee Bíblia ho humildade. Labele husik ita-nia hanoin rasik atu sai juiz ba Maromak Nia Liafuan. Maibé husik Maromak Nia Liafuan julga ita, hatudu ita-nia sala no lori ita ba mudansa.

Iha programa Dalan ba Lalehan, ita aprende katak la’ós hatene Bíblia de’it mak importante, maibé ita tenke simu Nia hanorin no moris tuir Jesus. Bainhira ita husik Jesus muda ita-nia laran, ita sei aprende atu hadomi, perdua, halo dame no moris ho justisa.

Orasaun: Aman Maromak, ajuda hau atu lee no komprende Ita-nia Liafuan ho laran- ne'ebé moos no nakloke. Keta husik hau interpreta Bíblia tuir hau-nia hakarak rasik. Bainhira Ita-nia Liafuan hatudu hau-nia sala, fó hau korajen atu simu koreksaun no muda. Hamoos hau-nia laran husi ódiu, inveja, orgullu no vingansa. Ajuda hau atu hadomi, perdua no halo buat ne’ebé loos, hanesan Jesus hanorin. Husik Ita-nia Liafuan gia hau-nia moris loroloron, atu hau bele kontinua la’o iha Dalan ba Lalehan. Iha jesus nia naran, ami harohan. Amen.

🙏 MAROMAK FO BENSAUN🙏🏻

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Maromak La Desiste Atu Hanoin Ita

Versu prinsipál: Jeremias 36:27–31

Bainhira liurai sunu tiha ona surat ne'ebé Baruke hakerek tuir liafuan hosi Jeremias nia ibun nee, Nai nia liafuan mai ba Jeremias, dehan: “Foti surat tahan seluk ba, no hakerek fali liafuan hotu ne'ebé iha surat primeiru, ne'ebé Jeoakim, liurai hosi Judá sunu tiha ona. No kona ba Jeoakim, liurai hosi Judá, o tenki dehan, ‘Nai hatete nune'e: Ó sunu tiha ona surat nee no dehan, “Tanbasá mak ó hakerek iha surat laran katak liurai Babilónia sei mai duni hodi estraga rai nee, no nia sei hakotu ema no animál hosi rai nee?” Tanba Nai hatete nune'e kona ba Jeoakim, liurai iha Judá: Nia sei la iha ema ida hosi ninia jerasaun hodi tuur iha David nia kadunan. No ema sei soe ninia mate isin ba liur hodi loron manas sei kona iha tempu loron no mahobeen nebee sai es fatuk sei kona iha tempu malirin. Hau sei kastigu nia, ninia bei-oan sira no ninia atan sira tanba sira nia hahalok aat. Hau sei haruka dezastre hotu ba sira, no ba ema nebee hela iha Jerusalém no ba povu Judá. Hau fó sai ona dezastre hotu nee atu hasoru sira maibé sira lakohi rona.’” Jeremias 36:27-31

                     Jeremias 36:28

Serake Ita iha esperiénsia rona konsellu ka avizu ruma husi ema seluk, maibé ita la hakarak simu? Dala ruma ita hirus, rejeita liafuan ne’e ka koko atu halakon mensajen ne’ebé ita la gosta.

Maibé, ita tenke hanoin: se mensajen ne’e mai husi Maromak, serake Ita bele rejeita Nia Liafuan?

Iha Jeremias kapítulu 36, Maromak haruka profeta Jeremias hakerek Nia mensajen iha surat-rolu ida. Mensajen ne’e fó avizu ba liurai Jeoiaquim no povu Judá kona-ba sira-nia sala, no bolu sira atu arrepende.

Bainhira liurai Jeoiaquim rona surat-rolu ne’e, nia la hakarak simu Maromak Nia mensajen. Nia uza tudik tesi surat-rolu ne’e ba pedasuk kiik no soe ba ahi to’o surat-rolu tomak sunu hotu. Nia la prekupa ho Maromak Nia avizu, no nia la tauk kontinua halo buat ne’ebé kontra Maromak.

Maibé Maromak la husik Nia mensajen atu lakon de'it. Nia haruka Jeremias hakerek fali surat-rolu seluk, ho mensajen hanesan no aumenta tan liafuan kona-ba Jeoiaquim nia julgamentu.

Maromak mós deklara katak Jeoiaquim nia família sei hetan kastigu tanba nia rejeita Nia Liafuan no kontinua halo aat (Jeremias 36:30–31).

Istória ne’e hatudu katak ema bele sunu surat-rolu ne'ebé kontein MaromakNiaLiafuan, maibé ema labele halakon Maromak nia Liafuan. Nia Liafuan sei nafatin iha, no Nia sei kumpre buat ne’ebé Nia deklara ona.

Saida mak istória ne’e hanorin ita?

1. Labele rejeita Maromak Nia Liafuan tanba de'it la gosta Nia mensajen.

Jeoiaquim hakarak halakon surat-rolu tanba nia la gosta buat ne’ebé nia rona. Ita mós bele halo hanesan ne’e bainhira Bíblia hatudu ita-nia sala no ita lakoi rona.

Ezemplu, ita lee kona-ba perdua, maibé ita lakohi perdua ema seluk. Ita rona mensajen kona-ba onestidade, maibé ita kontinua bosok.

Ita tenke simu Maromak Nia Liafuan, maski dala ruma nia soke ita-nia laran no korrije ita-nia hahalok.

2. Maromak iha pasiénsia no kontinua buka atu salva ita.

Maromak haruka mensajen ba Judá tanba Nia hakarak povu ne’e arrepende no fila fali ba Nia. Nia fó oportunidade ba sira atu muda.

Ne’e hatudu Maromak Nia domin. Nia la hakarak ema atu lakon, maibé hakarak ema arrepende no hetan moris (Ezequiel 33:11).

Ita tenke agradese tanba Maromak kontinua ko’alia mai ita liuhusi Bíblia no Espíritu Santu.

3. Maromak Nia domin la signifika katak Nia ignora sala.

Maromak iha domin no pasiénsia, maibé Nia mós justu. Jeoiaquim rejeita avizu no kontinua halo sala. Tanba ne’e, nia tenke responsabiliza ba nia hahalok.

Ita labele hanoin katak tanba Maromak iha domin, ita bele kontinua halo sala sem konsekuénsia. Nia hakarak ita arrepende no muda.

4. Ema bele rejeita Maromak nia Liafuan, maibé Nia Liafuan sei mantein nafatin.

Jeoiaquim sunu surat-rolu, maibé Maromak haruka hakerek fali. Ne’e hanorin ita katak Maromak Nia verdade la depende ba ema nia aseitasaun.

Maski ema barak la simu Bíblia, ita tenke kontinua fiar no moris tuir Nia Liafuan.

Oinsá mak ita bele aplika prinsipiu sira-ne'e iha ita-nia moris loroloron?

1. Bainhira lee Bíblia no haree sala iha ita-nia moris, labele rejeita mensajen ne’e.
2. Bainhira ema fó konsellu ne’ebé loos, rona ho humildade no analiza.
3. Se ita halo sala, labele subar ka justifika ita-niaan; arrepende no husu Maromak atu ajuda ita muda.
4. Labele uza Maromak Nia pasiénsia nu’udar razaun atu adia mudansa.
5. Kontinua lee Bíblia no halo tuir Nia hanorin, maski ema seluk la simu.
6. Hanorin ita-nia oan no família atu respeita Maromak Nia Liafuan.

Pergunta ba ita-an: Bainhira Maromak uza Bíblia atu hatudu hau-nia sala, serake hau simu no muda ka hau rejeita tanba hau la gosta mensajen ne’e? Serake hau uza Maromak Nia pasiénsia atu muda hau-nia moris ka atu kontinua halo sala?

Liafuan importante: Jeoiaquim sunu surat-rolu tanba nia lakohi rona Maromak Nia mensajen. Maibé Maromak haruka Jeremias hakerek fali. Ida-ne’e hatudu katak Maromak iha domin boot no kontinua buka atu lori Nia povu fila fali ba Nia.

Maromak Nia pasiénsia mak oportunidade ba ita atu arrepende. Maibé ita labele rejeita Nia avizu. Bainhira ita rona Nia Liafuan, simu ho laran no muda ita-nia moris.

Iha programa Dalan ba Lalehan, ita aprende katak dalan atu to’o ba Maromak mak liuhusi rona, simu no halo tuir Nia Liafuan. Labele sai hanesan Jeoiaquim ne’ebé sunu Maromak Nia mensajen. Husik Maromakia Liafuan muda ita-nia laran no gia ita loroloron.

Orasaun: Aman Maromak, obrigadu tanba Ita kontinua ko’alia mai ami liuhusi Ita-nia Liafuan. Perdua ami bainhira ami rejeita Ita-nia avizu ka lakohi muda ami-nia hahalok. Fó ami laran-moos atu simu koreksaun no matenek atu komprende Ita-nia vontade. Ajuda ami atu la uza Ita-nia pasiénsia nu’udar razaun atu kontinua halo sala, maibé atu arrepende no fila fali ba Ita. Gia ami atu moris tuir Ita-nia Liafuan no kontinua la’o iha Dalan ba Lalehan. Iha Jesus nia naran, ami harohan. Amen.

🙏🌹🙏🌹🙏🌹🙏🌹🙏🌹🙏

Click iha ne'e atu estuda Maromak ninia lia-fuan 

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More

Labele Rejeita Maromak Nia Mensajen

Versu prinsipál: 2 Krónikas 36:15–16

                      2 Krónikas 36:15–16

Nai, sira-nia bei-ala sira nia Maromak, haruka manu-ain ba sira dala barak tanba Nia iha laran luak ba Ninia povu no ba Ninia hela fatin. Maibé sira goza nafatin Maromak Nia manu-ain sira. Sira despreza Maromak Nia liafuan no hamnasa ba Ninia profeta sira, to'o Nai nia laran hirus hasoru Ninia povu, to'o la iha dalan hodi hadia situasaun nee. 2 Krónikas 36:15-16

Ita gosta ka lae bainhira ema ida fó konsellu ba ita? Dala ruma, bainhira ema hatudu ita-nia sala, ita sente la kontente. Ita bele hirus, defende ita-an ka lakohi rona. Maibé, ita tenke hanoin: karik Maromak uza ema ne’e atu korrije no ajuda ita?

Iha 2 Krónikas 36:15–16, Bíblia konta kona-ba nasaun Judá nia hahalok. Maromak haruka profeta sira dala barak atu aviza no korrije sira, tanba Nia hadomi sira no hakarak salva sira. Maromak la hakarak atu destroi sira; Nia fó oportunidade ba sira atu arrepende no fila fali ba Nia.

Maibé povu Judá la rona. Sira goza profeta sira, rejeita Maromak Nia Liafuan no despreza Nia mensajen. Sira kontinua halo buat aat to’o Maromak Nia hirus hasoru sira sai boot tebes no laiha dalan atu evita kastigu ne’ebé mai.

Ikusmai, Maromak permite Babilónia ataka Jerusalém. Sira sunu templu, estraga sidade no lori povu Judá ba Babilónia nu’udar prizioneiru (2 Krónikas 36:17–20).

Istória ne’e hatudu katak Maromak iha pasiénsia, maibé ita labele uza Nia pasiénsia nu’udar razaun atu kontinua halo sala.

Saida mak istória Judá nian hanorin ita?

1. Maromak aviza ita tanba Nia hadomi ita.

Maromak haruka profeta sira atu aviza Judá tanba Nia hakarak sira muda no beke kontinua moris. Iha tempu ohin, Maromak mós uza Bíblia, Espíritu Santu no ema seluk atu hatudu ita dalan loos.

Bainhira ita rona mensajen ne’ebé korrije ita, labele hanoin katak ema ne’e hakarak ataka ita. Karik Maromak uza mensajen ne’e atu ajuda ita.

2. Labele goza ka despreza Maromak Nia Liafuan.

Povu Judá la’ós de’it lakohi rona; sira mós goza profeta sira no despreza Maromak Nia Liafuan.

Ita mós bele halo sala hanesan ne’e. Ezemplu, ita rona sermaun kona-ba perdua, maibé ita kontinua rai ódiu. Ita lee Bíblia kona-ba onestidade, maibé ita kontinua bosok iha serbisu fatin. Ita rona avizu kona-ba sala, maibé ita dehan: “Ne’e la importante.”

Bainhira ita hatene Maromak Nia hakarak, maibé ita rejeita atu halo tuir, ita mós rejeita Nia mensajen.

3. Labele hanoin katak avizu iha Bíblia ba ema seluk de’it.

Dala ruma bainhira ita rona sermaun, ita hanoin kedas kona-ba ema seluk: “Mensajen ne’e ba nia, la’ós ba hau.”

Maibé ita tenke husu uluk: “Maromak hakarak hanorin saida ba hau liuhusi mensajen ne’e?”

Ita labele uza Bíblia atu julga ema seluk, maibé tenke uza nia atu ezamina no hadi’a ita-nia moris.

4. Maromak iha pasiénsia, maibé ita tenke arrepende agora.

Maromak aviza Judá dala barak antes kastigu mai. Nia fó oportunidade ba sira atu muda. Maibé sira kontinua rejeita Nia to’o tempu oportunidade ne’e remata.

Ita la hatene bainhira ita sei iha oportunidade atu muda. Tanba ne’e, bainhira Maromak hatudu ita-nia sala, labele adia atu arrepende. Fila fali ba Nia ohin.

Oinsá mak ita bele evita repete Judá nia sala?

1. Bainhira rona sermaun ka konsellu husi Bíblia, rona no halo tuir
2. La goza ema ne’ebé lori Maromak Nia mensajen, maski nia liafuan la tuir ita-nia hakarak.
3. Kompara ensinamentu hotu ho Bíblia atu hatene se nia ko'alia lia-loos.
4. Bainhira Bíblia hatudu ita-nia sala, labele buka razaun atu defende ita-an; arrepende no muda.
5. Labele uza Bíblia atu kondena ema seluk, maibé uza uluk atu korrije ita-nia moris rasik.
6. Halo tuir Maromak Nia Liafuan, la’ós rona de’it.

Pergunta ba ita-an: Bainhira Maromak uza Bíblia ka ema seluk atu korrije hau, serake hau simu ho humildade ka rejeita no buka razaun atu defende hau-nia an? Serake hau rona Maromak Nia Liafuan de’it, ka hau halo tuir duni?

Liafuan importante: Istória Judá nian fó avizu importante ba ita. Sira lakon oportunidade atu muda tanba sira rejeita Maromak Nia mensajen dala barak. Ita mós bele halo sala hanesan ne’e se ita rona Bíblia, maibé la hakarak muda ita-nia moris.

Maromak aviza ita tanba Nia hadomi ita. Nia hakarak ita arrepende, husik sala no fila fali ba Nia. Tanba ne’e, bainhira ita rona Nia Liafuan, labele taka ita-nia tilun ka taka ita-nia laran.

Iha programa Dalan ba Lalehan, ita aprende katak la’ós rona Maromak Nia Liafuan de’it mak importante, maibé ita tenke moris tuir Nia. Dalan ba Lalehan mak dalan ne’ebé husik Jesus atu korrije, transforma no guia ita loroloron.

Orasaun: Aman Maromak, obrigadu tanba Ita hadomi ami no aviza ami liuhusi Ita-nia Liafuan. Perdua ami bainhira ami rejeita konsellu no lakohi muda ami-nia hahalok aat sira. Fó ami laran ne'ebé simu koreksaun, matenek atu komprende Ita-nia Liafuan no kbiit atu halo tuir. Keta husik ami sai hanesan povu Judá ne’ebé goza no despreza Ita-nia mensajen. Ajuda ami atu arrepende no fila fali ba Ita loroloron. Gia ami atu kontinua la’o iha Dalan ba Lalehan, tuir Jesus. Iha Jesus nia naran, ami harohan. Amen.

🙏 MAROMAK FO BENSAUN🙏🏻

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com#AllThingsNew

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More