Fiar Maromak, keta sadere de'it ba ita-nia matenek

Leitura Bíblia: Provérbios 3:5–6

                           Provérbios 3:5–6

Fiar ba Nai ho ó-nia fuan laran tomak,

no keta sadere ba ó-nia kompriensaun rasik. Iha ó-nia dalan hotu, hanoin ba Nia,

no Nia sei diriji ó-nia dalan sira. Provérbiu 3:5-6

Iha moris, ita sempre iha desizaun atu halo. Ita tenke hili eskola, servisu, kaben, osan, saúde, família no buat seluk. Dala ruma ita hatene saida atu halo. Maibé dala barak, ita la hatene saida mak sei akontese aban.

Provérbios 3:5–6 fó konsellu simples: fiar Maromak. La fiar de’it ba ita-nia matenek 

Ita-nia matenek importante, maibé hanesan ema la hatene buat hotu. Ita bele haree buat ida hanesan di’ak, maibé depois ita komprende katak buat ne’e la di’ak.

Ezemplu, ita hetan servisu ida ho osan barak. Ita bele hanoin, “Ne’e mak oportunidade di’ak!” Maibé servisu ne’e bele lori ita atu bosok, halo buat sala, ka husik ita-nia família no Maromak.

Antes atu hili, reza no husu Maromak Nia povu orientasaun.

“Iha ó-nia dalan hotu, hanoin ba Nia”

Ne’e signifika katak ita tenke involve Maromak iha buat hotu, la’ós de’it bainhira ita hasoru problema boot.

Halo orasaun:

Molok ba servisu

Molok halo desizaun importante

Bainhira ita iha problema família

Bainhira ita hetan osan barak

Bainhira ita la hatene saida mak atu halo

Depois, buka resposta iha Bíblia no husu konsellu hosi ema ne’ebé fiar Maromak.

Fiar la signifika la halo buat ida. Fiar Maromak la signifika ita tuur de’it no hein.

Ezemplu: Ita reza atu hetan servisu. Depois, ita tenke buka servisu, prepara dokumentu, aprende no koko oportunidade. Ita halo ita-nia parte, maibé ita entrega rezultadu ba Maromak.

Dala ruma Maromak sei lori ita ba dalan ne’ebé ita la espera. Odamatan ida bele taka, maibé odamatan seluk sei nakloke.

Bainhira ne’e akontese, labele lakon fiar.

Husu: “Maromak, Hau la komprende tanbasá ne’e akontese, maibé hau fiar katak Ita hatene dalan ne’ebé di’ak liu mai hau.”

Pergunta ba ita ohin: Serake ita iha problema ka desizaun ida ne’ebé halo ita preokupa?

Entrega ba Maromak. Halo orasaun. Lee Nia liafuan. Halo buat ne’ebé loos. Depois tau fiar ba Maromak.

Ita la presiza hatene buat hotu kona-ba aban. Ita presiza hatene deit sé mak la'o hamutuk ho ita.

Dalan ba Lalehan mak dalan fiar nian. Bainhira ita fiar Maromak ho ita-nia laran tomak, buka Nia iha ita-nia desizaun hotu, no tuir Nia liafuan, ita bele lao ho seguru iha dalan ba lalehan. 

🙏 MAROMAK FO BENSAUN🙏🏻

Click iha ne'e  atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Forti no Korajen Atu Tuir Maromak

Leitura Bíblia: Josué 1:7

Maromak dehan ba Josué:

Naran katak ó tenki forti no brani tebe-tebes. Ó tenki iha kuidadu no halo tuir lei hotu ne'ebé Ha'u-Nia atan Moisés manda ba ó. Keta la'o ba sorin loos ka ba sorin karuk. Nune'e ó sei hetan susesu iha fatin neʼebé de'it mak ó ba. Josué 1:7

                                   Josué 1:7

Josué iha responsabilidade boot. Moisés, lider ne’ebé povu Israel hatene kleur, mate ona. Agora Josué mak tenke lori povu Israel ba rai ne’ebé Maromak promete ba sira.

Imajina ita iha Josué nia fatin. Ita bele sente tauk no husu: “Hau bele lidera povu ne'e halo ka lae?”

Maibé Maromak la dehan ba Josué, “La iha problema.” Maromak dehan, “forti no korajen.”

Forti no korajen la signifika la tauk

Ema barak hanoin katak ema ne’ebé iha korajen mak ema ne’ebé nunka tauk.Lae.

Korajen signifika maski ita tauk, ita kontinua halo buat ne’ebé loos tanba ita fiar Maromak.

Ezemplu, ita bele tauk atu ko’alia kona-ba Jesus ho kolega. Maibé ita ko’alia ho respeitu.

Ita bele tauk atu husu deskulpa. Maibé ita halo tanba ita hatene katak ne’e mak buat ne'ebé loos.

Ita bele tauk no rejeita osan ka buat ida ne’ebé ita hetan ho dalan sala. Maibé ita hili buat ne'ebé loos.

Ne’e mak korajen. Korajen presiza obedénsia

Maromak la dehan de’it ba Josué atu forti. Nia mós dehan atu kuidadu halo tuir Nia liafuan sira.

Ne’e importante.

Ita bele dehan katak ita fiar Maromak, maibé se ita la tuir Nia liafuan, ita-nia fiar sei la refleta iha ita-nia moris.

Ezemplu:

Se Bíblia dehan perdua, ita buka dalan atu perdua.

Se Bíblia dehan ko’alia lia-loos, ita la bosok maski lia-loos bele lori problema.

Se Jesus dehan hadomi inimigu, ita labele buka vingansa.

Bainhira ita la hatene saida mak atu halo. Dala ruma ita hasoru problema no la hatene dalan sai. Iha situasaun hanesan ne'e, la presiza foti asaun imediatamente tuir ita-nia sentimentu. Para. Reza. Lee Bíblia. Husu Maromak Nia orientasaun. Depois mak foti asaun.

Maromak la promete katak ita sei la hasoru difikuldade. Maibé Nia promete atu guia ita bainhira ita lao ho Nia.

Entaun, se ita hasoru situasaun difísil ohin, lembra Josué 1:7:

“Forti no korajen.”

La'os tanba ita-nia forsa rasik, maibé tanba ita bele tau fiar ba Maromak no tuir Nia liafuan.

Dalan ba Lalehan presiza forsa no korajen. Ita sei hasoru problema, tentasaun no desizaun difísil. Maibé bainhira ita fiar Maromak, lee Nia liafuan no halo tuir Nia, ita bele lao ba oin ho korajen iha dalan ba lalehan 

🙏🌹🙏🌹🙏🌹🙏🌹🙏🌹🙏

Click iha ne'e atu estuda Maromak ninia lia-fuan 

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More

Oinsá Ita Bele Moris iha Domin?

Leitura Bíblia: 1 João 4:16

                              1 João 4:16

Nune'e ita hatene no fiar Maromak Nia domin ba ita. Maromak mak domin. No ema ne'ebé hela iha domin hela iha Maromak, no Maromak hela iha nia. 1 João 4:16

Liafuan ne’e badak, maibé nia signifikadu boot tebes: Maromak mak domin. João mós dehan katak ema ne’ebé hela iha domin, hela iha Maromak, no Maromak hela iha nia.

Maibé, saida mak signifika hela iha domin?

La’ós de’it ko’alia, “Hau hadomi ema hotu.” Domin tenke mosu iha ita-nia hahalok loroloron.

Domin komesa iha uma

Dala ruma ita bele ko’alia di’ak ho ema iha igreja, maibé iha uma ita fasil hirus ba família. Maibé se Maromak Nia domin iha ita, ita tenke hatudu mós ba família.

Bainhira oan halo sala, la presiza hakilar kedas. Hanorin ho pasiénsia.

Bainhira kaben ka família la konkorda ho ita, rona uluk antes responde.

Dala ruma liafuan simples hanesan “Deskulpa,” “Obrigadu,” no “Hau hadomi ó” bele muda ambiente iha uma.

Domin haree ema ne’ebé presiza ajuda Domin la’ós de’it sentimentu. Domin halo ita haree nesesidade ema seluk nian.

Se ita haree ema katuas ida lori buat todan, ajuda nia. Se vizinhu ida moras, bá haree nia. Se kolega ida triste, husu nia, “konsola nia no husu saida mak hau bele ajuda?”

Dala ruma ita la bele fó osan, maibé ita bele fó tempu, liafuan di’ak, ka ajuda ki’ik balu.

Domin mós bainhira ita fó no la espera atu hetan buat ida fila-fali

Jesus hanorin ita atu hadomi la’ós de’it ema ne’ebé hadomi ita.

Se ema ida halo sala ba ita, ita bele hili atu la halo vingansa. Perdua la signifika katak buat ne’ebé nia halo mak loos. Maibé ida-ne'e signifika ita la hakarak rai ódiu iha ita-nia laran. Ne’e la fasil. Tanba ne’e, ita presiza Jesus Ninia ajuda.

Hela iha domin

Ita labele produz domin hanesan Maromak ho ita-nia forsa rasik. Ita presiza hela besik ba Jesus—liuhusi halo orasaun, lee Bíblia, no husu Espíritu Santu atu transforma ita-nia laran.

Bainhira ita hela iha Maromak Nia domin, ita-nia hahalok komesa muda.

Entaun, husu ita-nia an:

“Serake ema sira ne’ebé moris besik hau bele haree Maromak Nia domin liuhosi hau-nia hahalok?”

Ita labele hadomi ema hotu perfeitamente. Maibé ita bele hahú ho ema ida, iha loron ida, ho asaun ida.

Dalan ba Lalehan mak la'o ho Jesus no aprende atu hadomi ema seluk hanesan Jesus hadomi ita. Bainhira ita hela iha Maromak nia domin, ita bele lori Maromak nia domin ba ema sira iha ita-nia família, igreja no komunidade.

🙏 MAROMAK FO BENSAUN🙏🏻

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com#AllThingsNew

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More