Serake ita prontu resposta kona-ba Ita-nia esperansa?

Eskritura xave: 

Maibé iha imi-nia fuan-laran, fó onra ba Nai Kristu neʼebé santu. Imi tenki prontu nafatin atu hatán ema ne'ebé husu imi atu esplika esperansa neʼebé iha imi-nia laran. Maibé hatán ho laran maus no respeitu. 1 Pedro 3:15

                             1 Pedro 3:15

Karik ema husu Ita: "Tanbasá mak ó fiar ba Jesus?" 

Karik iha serbisu-fatin ema ruma husu Ita:

"Tanbasa mak ó ba igreja?" 

Karik kolega ida husu: "Tanbasá mak ó la join ho ami halo ida ne'e?" 

Karik ema ruma ne'ebé hasoru hela susar balu no husu: "Tanbasa mak ó sei iha esperansa nafatin?" 

Serake ita hatene saida mak atu ko'alia? 

Apóstolu Pedro hatete ba ema kristaun atu "sempre prontu nafatin". Ida-ne'e la dehan katak ema hotu tenke sai evanjelista ka haklaken-nain. Ne'e katak ema kristaun ida-idak tenke hatene tanbasá mak sira fiar ba Jesus no prontu atu esplika. 

Esperansa saida mak ita iha? 

Ita-nia esperansa mak Jesus Kristu. 

Ita fiar katak Jesus mate tanba ita-nia sala no moris hi'as fali (1 Korinto 15: 3-4). Ita fiar katak Nia moris ona. Ita fiar katak Nia sei mai fali no lori Ninia povu ba lalehan (João 14: 1-3). 

Tanba Jesus, ita bele hetan perdua ohin loron no moris rohan-laek iha futuru (1 Joao 1:9; Joao 3:16). 

Oinsá mak ita bele prontu iha ita-nia moris loroloron nian? 

Ulukliu, hatene Ita-nia istória rasik. 

Ita la presiza tenke hatene versíkulu atus ba atus. Ita bele dehan de'it: 

"Hau tuir Jesus tanba Nia fó perdua mai ha'u, transforma ha'u-nia moris, no fó esperansa mai ha'u." 

Se Ita esperiensia ona Maromak Nia ajuda, fó-hatene ema seluk kona-ba ne'e. 

Segundu, hatene kona-ba versikulu balu kona-ba Maromak Ninia promesa sira iha Biblia. 

Porezemplu: 

João 3:16 - Maromak hadomi ita no haruka Jesus mai salva ita. 

1 João 1: 9 - Maromak fó perdua ba ita-nia pekadu kuandu ita konfesa ita-nia sala sira. 

João 14: 1-3 - Jesus promete atu mai fali. 

Roma 8:38-39 - La iha buat ida mak bele haketak ita husi Maromak Nia domin. 

Terseiru, husik Ita-nia moris hatudu Ita-nia lia-fuan sira. 

Se ita hatete ba ema katak Jesus hanorin ema onestidade, maibé ita bosok iha ita-nia negósiu, karik sira la fiar ita-nia mensajen.

Se ita hatete ba ema katak Jesus hanorin kona-ba fo perdua, maibé ita rasij lakohi fó perdua ba ita-nia maluk sira, ita-nia liafuan sai fraku. 

Ita-nia asaun hotu tenke suporta buat ne'ebé ita hatete. 

Ba dala haat, ko'alia ho laran-di'ak. 

Apostolu Pedro hatete katak ita tenke hatán "ho laran-maus no ta'uk" (1 Pedro 3:15). Ita labele hakilar ema ka halo sira sente beik tanba sira-nia fiar ne'ebé diferente. 

Ita-nia objetivu mak la'os atu manán debate. Ita-nia objetivu mak ajuda ema atu haree Jesus. 

Ohin, husu ba ita-nia an: 

"Se ema ruma husu ha'u tanbasá mak ha'u fiar ba Jesus, serake ha'u prontu atu hatán?" 

Hahú prepara aan ohin. Lee Biblia. Halo orasaun. Hanoin to'ok kona-ba buat ne'ebé Jesus halo ona ba ita-nia moris. Aprende oinsá esplika Ita-nia esperansa ho liafuan simples sira. 

Karik ita la'ós pastor ida. Karik Ita la'os mestri Biblia ida. Maibé ita bele sai sasin. 

Karik ema ne'ebé hale'u ita buka hela esperansa. Karik ita-nia sasin simples ida mak buat primeiru ne'ebé bele lori ema neʼe hakbesik liután ba Jesus. 

Bainhira ita moris ho esperansa, prepara ita-nia an atu esplika esperansa ne'e, no fahe Jesus Ninia hanorin ho laran-di'ak, ita ajuda ema seluk atu deskobre dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Serake Ita rona de'it Maromak Nia Liafuan maibé la halo tuir?

Maibé sai ema neʼebé halo tuir liafuan ne'e, la'ós ema ne'ebé rona de'it, hodi imi la lohi imi-nia aan rasik. Tiago 1:22

                               Tiago 1:22

Serake ita rona ona ema ida fó konsellu di'ak maibé nia rasik nunka halo tuir? 

Porezemplu, doutór ida hatete: "Ita presiza halo ezersísiu no han hahan ne'ebé nutrisaun di'ak." Ita rona didi'ak no hatete: " Sin, doutór." Maibé bainhira ita fila ba uma, ita la halo tuir.

Rona mak buat ne'ebé di'ak, maibé rona la ho asaun la ajuda ita. 

Tiago mós fo lisaun ne'ebé hanesan kona-ba Maromak Nia Liafuan. Nia dehan katak ita labele rona de'it Maromak Nia Liafuan. Ita tenke halo tuir buat ne'ebé Biblia hatete. 

Ne'e katak sá iha ita-nia moris loroloron nian? 

Se Biblia hatete: "Keta bosok" (Koloso 3:9), entaun ita tenke fó sai lia-loos maski bosok bele ajuda ita. 

Se Biblia hatete: "Hadomi ó-nia inimigu sira" (Mateus 5:44), entaun ita labele koko atu hakanek ema ne'ebé hakanek ita. Ita bele halo orasaun ba ema ne'e no hili atu fo perdua. 

Se Biblia hatete: "Keta na'ok" (Exodo 20:15), entaun ita labele foti buat ne'ebé la'ós ita-nian, maski la iha ema ida mak haree. 

Se Biblia hatete: "Keta husik liafuan aat sai husi ó-nia ibun" (Efeso 4:29), entaun ita tenke hapara gossip, insulta ema no hasai liafuan ne'ebé hakanek ema seluk. 

Se Biblia hatete: "lori ta-nia maluk nia todan sira" (Galatia 6: 2), entaun kuandu ema ida hasoru susar ruma, ita labele dehan de'it: "Hau sei halo orasaun ba imi." Se ita bele ajuda, ita presiza ajuda. 

Se Biblia hanorin ita atu fó perdua (Efeso 4: 32), ita labele alista ema nia sala sira iha pasadu iha ita-nia laran. 

Bíblia hanesan espellu ida.

Tiago kompara Maromak Nia Liafuan ho espellu (Tiago 1:23-25). 

Kuandu ita hateke ba espellu, ita haree fo'er iha ita-nia oin. Maibé hanoin to'ok, karik ita haree fo'er iha ita-nia oin no depois la'o sai de'it ba no la fase. 

Ne'e mak buat ne'ebé akontese bainhira ita lee Biblia, haree buat ruma ne'ebé sala iha ita-nia moris, maibé lakohi muda ita-nia hahalok. 

Karik Biblia hatudu katak ita ema ne'ebé hirus dór. 

Karik Biblia hatudu katak ita la onestu 

Karik biblia hatudu katak ita presiza fó perdua ba ema seluk. 

Karik Biblia hatudu katak ita ladún uza tempu barak hamutuk ho Maromak liuhosi lee Biblia no orasaun.

Kuandu Maromak Nia Liafuan hatudu buat sala ruma mai ita, keta taka Biblia no haluha tiha de'it. Husu Maromak atu ajuda Ita nuda Ita-nia hahalok sala ne'e. 

Ohin loron, keta husu de'it: "Hau aprende saida husi Biblia?" 

Maibé mós husu: "Saida mak ha'u sei halo tanba buat ne'ebé ha'u aprende ona hosi Biblia?" 

Lee versíkulu ida. Komprende versikulu ne'e. Tuirmai halo tuir ka pratika lisaun ne'e. 

Asaun obedese iha buat kiik-oan sira, di'ak liu duke hatene versíkulu barak, maibé lakohi halo tuir. 

Maromak Nia Liafuan la'ós de'it atu hakonu ita-nia kakutak ho koñesimentu. Maromak Nia lia-fuan sira fó atu muda ita-nia laran no ita-nia moris. 

Kuandu ita rona Maromak Nia Liafuan, halo tuir, no tau ba pratika loroloron, ita kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More

Serake Ita permite Espíritu Santu ko'alia liuhusi Ita?

Eskritura xave: Mateus 10: 20 

Tanba la'os imi rasik koalia, maibé imi-nia Aman Nia Espíritu sei koalia liuhosi imi. Mateus 10:20

                            Mateus 10:20

Karik ita esperiensia ona situasaun hanesan tuir mai ne'e: Ema husu ita atu ko'alia buat ruma kona-ba Jesus no derrepente de'it ita la hatene saida mak atu ko'alia.

Karik ema ida husu ba ita: "Tanbasa mak ó fiar ba Jesus?" Ita hakarak hatán, maibé ita ta'uk ko'alia sala. 

Dala ruma ita sente hanesan ne'e kuandu ita hanorin, haklaken evanjellu, estuda Biblia, halo orasaun iha publiku, ka ko'alia ho ita-nia kolega sira kona-ba Maromak. 

Jesus fó promesa importante ida ba Ninia dixipulu sira. Nia hatete katak kuandu sira atu ko'alia kona-ba Maromak, sira la presiza depende de'it ba sira-nia matenek rasik. Espíritu Santu sei ajuda sira. 

Ida-ne'e la dehan katak ita sai baruk-teen no nunka prepara. Ne'e katak kuandu ita halo ona buat hotu ne'ebé ita bele prepara, ita bele fiar katak Maromak sei ajuda ita. 

Razaun komún neebe ita esperiensia inklui:

1. Dala barak ita sente katak ita ladún di'ak 

Iha tempu ida, Moises hatete ba Maromak: "Hau la'ós ema ne'ebé ko'alia ho di'ak." Nia ta'uk katak nia la bele ko'alia ho di'ak. 

Ita barak mós sente hanesan ne'e. 

 - "Hau-nia tetum ladun di'ak." 

 - "Hau la hatene versikulu barak husi Biblia." 

 - "Hau la'ós ema ne'ebé ko'alia ho di'ak." 

 - "Oinsa se ema hamnasa ha'u?" 

 - "Oinsa se sira husu ha'u pergunta ruma ne'ebé ha'u la bele hatán?" 

Sentimentu sira-ne'e normál. Maibé Maromak la sempre hili ema tanba sira ko'alia ho matenek.

Maromak bele uza ema baibain ne'ebé prontu atu dehan: "Nai, hau mak ne'e, uza ha'u ba!." 

2. Espíritu santu bele ajuda ita 

Hanoin to'ok Ita-nia kolega balu ne'ebé hasoru susar hela. Ita vizita sira, maibé ita la hatene saida mak atu hatete. 

Ita bele halo orasaun iha ita-nia laran: 

Ita bele dehan:

"Espíritu santu, favór ajuda ha'u. Fó liafuan ne'ebé loos mai ha'u atu ko'alia." 

Tuirmai ko'alia ho onestu no laran-di'ak. 

Karik Ita bele dehan: 

"Hau la iha resposta hotu ba susar ne'ebé imi hasoru, maibé ha'u hatene katak Maromak hadomi imi. Mai ita halo orasaun hamutuk." 

Liafuan simples sira-ne'e bele iha ninia signifikativu liu duke ko'alia liafuan barak iha tempu naruk. 

Espíritu Santu bele uza liafuan simples sira hodi book ema nia laran. 

3. Ita tenke loke ita-nia ibun 

Dala ruma ita halo orasaun hodi dehan: "Espiritu Santu, ko'alia liuhusi ha'u ba!," maibé depois ita nunka ko'alia buat ida. 

Maromak baibain serbisu liuhosi ita-nia prontidaun atu ko'alia. 

Se ita haree ema ruma ne'ebé presiza atu hetan korajen, ko'alia buat ruma. 

Se ema ruma husu Ita kona-ba Ita-nia fiar, fahe buat ne'ebé Jesus halo ona ba Ita. 

Se ema ida sente deskorajen, fó-hanoin sira kona-ba Maromak Nia promesa sira. 

Ita la presiza halo pregasaun naruk.

Ita bele simplesmente dehan: 

"Maromak hamutuk ho imi." Mai ita halo orasaun kona-ba ne'e. 

"Hau mós uluk hasoru susar, maibé Maromak ajuda ha'u." 

Maski liafuan simples, bele iha podér boot bainhira espíritu santu uza liafuan sira-ne'e.

4. Prepara an, depois tau fiar ba Maromak 

Mateus 10: 20 la hanorin ita atu para estuda Biblia ka hapara ita prepara antes ko'alia. 

Ita tenke lee Biblia. Ita tenke estuda. Ita tenke prátika. Ita tenke hanoin didi'ak kona-ba buat ne'ebé ita hakarak ko'alia. 

Maibé kuandu ita prepara tiha ona, ita labele husik sentimentu ta'uk kontrola ita. 

Ita bele dehan: 

"Nai, ha'u prepara ona tuir ha'u-nia kapasidade. Agora favór, uza ha'u-nia liafuan sira ne'ebé hau prepara ona." 

Ida-ne'e importante liu bainhira hanorin labarik sira, fó estuda Biblia ba ema, haklaken evanjellu, halo orasaun iha públiku, ka ko'alia ho ema ne'ebé la hatene Jesus. 

Lisaun pratika ba ohin loron nian:

Ohin loron, buka ema ida-ne'ebé presiza hetan korajen. 

Antes ko'alia ho ema ne'e, halo orasaun: 

"Espiritu Santu, favór ko'alia liuhusi ha'u. Fó mai ha'u liafuan ne'ebé bele ajuda ema ne'e." 

Tuirmai rona ho kuidadu. 

 Keta ansi atu fó konsellu. 

 Ko'alia ho laran-di'ak. 

 Uza liafuan simples sira. 

 No tau fiar ba Maromak ba Ninia rezultadu. 

 Karik Ita nunka hatene oinsa Ita-nia liafuan bele ajuda duni ema ne'e. 

Moris hanesan ema kristaun mak la'os kona-ba hatudu ba ema katak ita mak di'ak tebes. Maibé ne'e mak kona-ba husik Maromak serbisu liuhosi ita no uza ita iha ita-niamorisloroloronnian. 

Kuandu ita husik Espíritu Santu ko'alia liuhusi ita, ita-nia liafuan simples sira bele sai bénsaun ba ema ne'ebé presiza esperansa. 

Ne'e mak parte ida husi "Dalan ba lalehan" - la'o hamutuk ho Jesus no husik Ninia Espíritu ajuda ita iha ita-nia moris loroloron nian. No kuandu ita kontinua pratika estilu moris hanesan ne'e, ita kontinua la'o iha dalan ba lalehan. Maromak fó bensaun

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More