Bibi-Oan iha asu-fuik nia leet

Depois neʼe, Naʼi hili ema naʼin-70 seluk no haruka sira naʼin rua-rua hodi laʼo uluk nia ba sidade no fatin hotu neʼebé nia rasik sei bá. Tuirmai, nia dehan ba sira: “Tuir loloos, kolleta boot tebes, maibé serbisu-naʼin uitoan deʼit. Tan neʼe, husu Toʼos-Naʼin atu haruka tan ema hodi kolleta. Bá! Haʼu haruka imi bá hanesan bibi-oan iha asu-lobu sira-nia leet. Lukas 10:1-3

Bibi-Oan no Asu-lobo

Na'i Jesus  hatete ba dixípulu sira “Bá! Haʼu haruka imi bá hanesan bibi-oan iha asu-lobu sira-nia". Ida ne'e perigu loos ka lae? Saida mak akontese bainhira bibi-oan halai ka la'o sala bá asu-fuik/Asu-lobo nia leet? Sira sai ai-haan ba Asu-lobo sira, loos ka lae?

Tanbasá mak Na'i Jesus hatete liafuan sira ne'e antes haruka sira sai bá?    Na'i Jesus fó hanoin sira kona-ba difikuldade ne'ebé sira sei hasoru. Hó razaun ne'e mak  serbisu-na'in uitoan de'it (Lukas 10:2), tanba obra ne'e difisíl.

Ema fó protesaun ba bibi-oan sira hasoru predatór  tanba sira ne'e la iha forsa atu defende sira nia an.  Na'i Jesus halo ligasaun entre bibi-oan no ema sira ne'ebé la'o tuir Na'i Jesus/dixípulu sira.  Dixípulu sira haklaken evanjellu liuhosi fó testamuña la'os funu, dixípulu sira haklaken uza Bíblia la'os kilat musan. Ema Kristaun sai vulneravél tebes bainhira sira hala'o sira nia misaun.  La iha liafuan "violensia" iha Kristaun nia dutrina, se iha,  ida ne'e la'os Kristu Nia hanorin, maibé anti-Kristu nia hanorin.

Bainhira Na'i Jesus haruka "bá hanesan bibi-oan iha asu-lobu sira-nia leet" Nia haruka ita bá haklaken la'os de'it iha fatin ne'ebé seguru ka fatin ne'ebé ita gosta de'it, maibé mós fatin sira ne'ebé nakonu hó perigu.

Na'i Jesus Nia liafuan iha Mateus 28:28-20 dehan nune'e "Kbiit tomak iha lalehan no rai entrega ona mai haʼu. Neʼe duni, laʼo bá no hanorin ema husi nasaun hotu atu sai haʼu-nia dixípulu, fó batizmu ba sira  hodi Aman, Oan no espíritu santu nia naran. Hanorin sira atu halo tuir mandamentu hotu neʼebé haʼu fó ona ba imi. No haʼu sei hamutuk nafatin ho imi toʼo mundu neʼe nia rohan.”

Maioria hosi ita lakoi bá iha fatin ne'ebé perigu tanba ita lakoi mate. Mate bá Kristu ne'e fasíl atu ko'alia maibé difisíl atu halo. Maibé karik ita moris iha Kristu ita sei la ta'uk mate ba Kristu.

Moris ba Kristu

Oinsá ita bele moris ba Kristu?

Seráke ita prontu atu moris ba Kristu?  Moris iha Kristu signifika saida? Moris ba Kristu bele sai hanesan  buat ida ne'ebé todan tebes ba ema Kristaun ida atu halo, tanba ida ne'e signifika nani hasoru korenti tradisaun, fiar no kultura lokál.

Ema barak hanoin katak moris tuir Kristu signifika tama de'it relijiaun Kristaun ida, ne'e loos ona.
Ida ne'e bele loos, bele mós lae. Ita bele tama ba relijiaun Kristaun ida mas, se ita la halo tuir saida mak Kristu hanorin, ita sei la hola parte iha reiñu Lalehan. Konsidera Na'i Jesus Nia liafuan tuir Mai "Laʼós ema hotu neʼebé dehan mai haʼu: ‘Naʼi, Naʼi’, sei tama ba Reiñu lalehan nian, maibé ema neʼebé halo tuir haʼu-nia Aman iha lalehan nia hakarak mak sei tama ba Reiñu neʼe. Iha loron neʼebá ema barak sei dehan mai haʼu: ‘Naʼi, Naʼi, ami fó sai profesia no duni sai anju aat sira, no ami mós halo milagre barak hodi Ita-Boot nia naran, loos ka lae?’ Maibé haʼu sei hatete ba sira: ‘Haʼu la hatene imi! Hadook an tiha husi haʼu, imi neʼebé la halo tuir ukunfuan. Mateus 7:21-23

Entaun moris ba Kristu ne'e signifika saida?
1. Ida ne'e signifika moris ida ne'ebé halo Maromak kontenti!

2. Ida ne'e signifika hadomi Maromak liu ita nia osan, familia no ita nia serbisu.

3. Ida ne'e signifika, ita aprezenta ita nia isin hanesan sakrifisiu ne'ebé moris no santu ba Maromak (Roma 12:1).

4. Ida ne'e signifika "Buat saida deʼit neʼebé imi koʼalia no halo, halo buat hotu iha Naʼi Jesus nia naran. Fó obrigadu ba Aman Maromak liuhusi nia (Kolose 3:17).

5. Moris ba Kristu signifika Nia mak sai ita dezezu boot liu iha ita nia moris, ita nia hanoin sempre fokus atu fó Gloria ba Maromak.

6. Moris ba Kristu signifika ita luta loronloron atu  “hadomi Na'i, imi-nia Maromak, ho imi-nia laran tomak, hó imi-nia moris tomak, hó imi-nia kbiit tomak no hó imi-nia neon tomak’, no ‘hadomi imi-nia maluk hanesan imi-nia an rasik". Lukas 10:27

7. Moris ba Kristu signifika ita kompriende katak iis moris ne'ebé  ita dada no ai-haan hotu  ne'ebé ita haan hanesan Prezente hosi Maromak atu fó forsa ba atu atu haklaken evanjellu. Ida ne'e inportante tanba ema ne'ebé moris ba Kristu mak bele prontu atu mate ba Kristu.

Mate ba Kristu

Antes ita halo diskusaun ba oin, atu fó hanoin fila fali se ita la moris ba Kristu ita sei la prontu mate ba Kristu. Ezemplu iha Bíblia ema sira ne'ebé mate ba Kristu mak Estevão. Estevão, mate ba Kristu no molok ida ne'e nia ema fiar na'in no nakonu hó espiritu santu (Apostolu 6:5).

Tanbasá mak ema ida prontu atu mate ba Kristu? Seráke, Na'i Jesus husu Nia dixípulu sira atu mate ba Nia?   Na'i Jesus la rekere Nia dixípulu sira hotu atu mate ba Nia, maibé Nia husu atu ema Kristaun hotu prontu atu mate ba Nia karik presiza.

Karik ita tenke hili entre mate ka moris no nega fiar ba Na'i Jesus Kristu, di'ak liu ita hili Na'i Jesus Kristu. Konsidera Na'i Jesus Nia liafuan iha Lukas 9:26 " Ema se deʼit neʼebé moe kona-ba haʼu no kona-ba haʼu-nia liafuan, Oan-Mane  mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

Na'i Jesus prepara ita ba difikuldade ne'ebé ita sei hasoru bainhira halo obra iha João 15:20, "Atan ida la boot liu fali ninia naʼi. Se sira fó-terus haʼu, sira mós sei fó-terus imi. Se sira halo tuir haʼu-nia liafuan, sira mós sei halo tuir imi-nia liafuan"

Paulo mós hakerek ba servidór joven ida naran Timoteo dehan  “ema hotu neʼebé hakarak atu moris fiél ba Maromak iha Kristu Jesus  sei hetan presegisaun. 2 Timoteo 3:12

Pergunta mai ita idaidak ne'ebé agora lee hela "Karik presiza, seráke ita prontu mate ba Kristu?"

Mai ita remata hó St. Paulo nia liafuan iha  Apostolu 20:22-24:
Agora, Maromak nia espíritu haruka haʼu atu laʼo ba Jeruzalein, maski haʼu la hatene saida mak sei akontese ba haʼu iha neʼebá, maibé husi sidade ba sidade espíritu santu fó hanoin beibeik ba haʼu katak haʼu sei tama komarka no hetan terus. Maski nuneʼe, haʼu la haree haʼu-nia moris nuʼudar buat neʼebé importante. Haʼu hanoin deʼit atu bele halai toʼo rohan no halo hotu serbisu neʼebé haʼu simu husi Naʼi Jesus, hodi fó sasin ho loloos ba liafuan diʼak kona-ba Maromak nia laran-diʼak neʼebé boot"

Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Lukas 10:3

Read More

Husik ema mate hakoi ema mate

Jesus hatete ba nia: “Husik ema mate hakoi ema mate, maibé ó bá haklaken Maromak nia Ukun iha fatin hotu.”Lukas  9:60

Na'i Jesus  hatete liafuan sira ne'e bainhira responde ba dixípulu ida ne'ebé hakarak fila uma lai antes komete nia an ba Na'i Jesus.

Na'i Jesus hatete “Tuir Ha'u", maibé  "Ema neʼe hatán: “Naʼi, fó lisensa mai haʼu atu bá hakoi uluklai haʼu-nia aman.” Jesus hatete ba nia: “Husik ema mate hakoi ema mate, maibé ó bá haklaken Maromak nia Ukun iha fatin hotu.” Lukas 9:59-60

Ema ne'e parese hakarak halo tuir nia dever hanesan oan atu hakoi nia aman ka hakarak besik nia aman nia mate isin to'o tinan ida, atu depois hakoi fila fali tuir ema Judeu balu nia tradisaun iha tempu ne'ebá.

Na'i Jesus Nia resposta halo klaru katak rekerimentu ema ne'e involve tau tradisaun ka dixípulu ne'e nia hakarak rasik hanesan prioridade la'os serbí Na'i Jesus mak sai prioridade.

Se mak “ema mate” ne'ebé Na'i Jesus refere ba?  Ema Judeu sira dala barak espresa liafuan "mate" kona-ba buat ida ne'ebé la iha influensia ba ita.  Purezemplu, mate ba sala   (Roma 6:11), ne'e katak sala ka pekadu la iha influensia ka kontrola ba ita. Ita libre hosi sala bainhira ita fiar no halo tuir Na'i Jesus Nia hanorin tanba Na'i Jesus kasu ona ita nia sala iha foho kalvariu.

Ema mundu maioria la halo tuir Na'i Jesus Nia hanorin. Ema mundu nian la haree Na'i Jesus Nia furak, la rona nia lian no iha vontade atu tuir Na'i Jesus. So nia  “bibi-malae” sira mak sei halo buat sira ne'e (João 10:27). Ema mundu nian mak Na'i Jesus deskrebe iha ne'e hanesan mate (espiritualmente) ne'ebé tenke hakoi sira ne'ebé mate (fizikamente). Husik ba sira ne'ebé la iha interese ba obra Na'i Jesus nian hakoi malu, maibé ó nia dever mak tuir Hau.

Maromak Nia futarlia iha Efeso 2:1 dehan nune'e "Liután neʼe, Maromak fó ona moris ba imi, maski uluk imi mate ona tanba imi-nia hahalok kontra no sala sira".

Eskritura klaru hatete katak ita tenke respeitu ita nia inan-aman  (Efeso 6:2), maibé ita tenke kompriende katak Na'i Jesus tenke sai prioridade dahuluk.  Ida ne'e mak kazu iha Lukas 9:60.

Pedro, Andre, Tiago no Mateus rekoñese Na'i Jesus no tuir kedas Nia  (Mateus 4:18–22; 9:9). Buat ne'ebé mane ne'e husu iha Lukas 9:60 ne'e konsidera hanesan buat ne'ebé inportante liu buat hotu iha mundu iha momentu neebá no iha ita tempu agora, maibé Na'i Jesus husu ema ne'e nia sakrifisiu estraordinariu atu hatudu nia sinseridade hakarak hola parte iha Kristu Nia misaun.

Ba ita ema mundu ne'e la iha buat ida mak inportante liu duké responde ba liafuan di'ak Na'i Jesus nian.  Ida ne'e rekere haklaken liafuan di'ak  (Roma 10:14), atu nune'e bainhira ita foti desizaun atu tuir Na'i Jesus no haklaken liafuan di'ak, ita tenke nega ita nia an, nega haksolok mundu nian, no halo saida mak Na'i Maromak hakarak.

Na'i Jesus hakarak ita la'o tuir Nia Ain fatin (1Pedro 2:21). Sira ne'ebé espiritualmente moris sei sai Maromak Nia instrumentu atu bolu ema barak atu mai simu moris foun iha Kristu Jesus.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Lukas 9:60

Read More

Hanoin no santifika loron Sábadu (Éxodos 20:8)

Bainhira Maromak koʼalia hotu ona ho Moisés iha Foho Sinai, nia fó ba Moisés fatuk-belar rua Aliansa nian, neʼebé MAROMAK NIA LIMAN-FUAN RASIK MAK HAKEREK. Éxodos 31:18

Tuir versu iha leten, Maromak hó Liman rasik mak  hakerek Nia ukunfuan 10, ne'ebé hakerek iha Éxodos 20:3-17.

No ukun fuan dahaat hosi ukunfuan 10, hatete nune'e:
Hanoin loron Sábadu hodi halo loron neʼe santu. Imi tenke halo imi-nia serbisu hotu durante loron neen, maibé loron dahitu mak loron Sábadu ba Na'i, imi-nia Maromak. Imi labele halo serbisu ida, katak imi no imi-nia oan-mane no oan-feto, imi-nia atan-mane no atan-feto, imi-nia animál-hakiak, no mós ema estranjeiru neʼebé hela iha imi-nia sidade laran. Tanba durante loron neen Na'i kria lalehan, rai, tasi no buat hotu neʼebé iha laran, no nia hahú deskansa iha loron dahitu. Tan neʼe mak Na'i haraik bensaun ba loron Sábadu no halo loron neʼe santu. Éxodos 20:8-11

Mesmu maioria hosi ita santifika loron dahuluk da semana, maibé Bíblia ko'alia oin seluk.

Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Mai ita banati tuir Na'i Jesus Nia dixípulu sira ne'ebé bainhira tenke hili entre halo tuir dutrina ema no Maromak nian,  hatete nune'e : “Ami tenke halo tuir Maromak duké halo tuir ema". Apostolu 5:29

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Éxodos 31:18

Read More