Besik liu fali Ita-nia hanoin

“La iha arma funu ida nebee ema forma hodi hasoru ita mak bele manaan, no nanaal ida-idak nebee sae hodi hasoru ita iha julgamentu nee ita sei kondena. Ida nee mak liman rohan ba Nai nia atan sira, no sira nia hahalok loos mai hosi Hau,” hatete Nai. Isaias 54:17 BK

Bainhira buat aat los akontese, .... Na'i sei besik nafatin ba ita. 

Iha Eskritura laran, ita bele haree ezemplu sira hanesan ne'e: Maromak halo funu ba ema Izrael no salva sira husi ema Ejitu (Exodus 14: 13-14). Josue manán nasaun sira ne'ebé iha kbiit boot tanba Maromak halo funu ba nia (Josue 23: 10). Maromak proteje ema Izrael bainhira sira harii fali Jeruzalein nia moru (Neemias 4:20). 

Iha Isaias 54, Maromak fó-hanoin ema Izrael katak nia haree sira-nia terus, no nia iha kompaixaun ba sira-nia situasaun. Iha tempu ne'ebá, ema Izrael sai dadur hela. Maibé Maromak promete katak sira-nia terus loron ida sei hotu.

Maromak la husik Ninia povu. Maski sira hasoru susar boot, maibé to'o ikus Maromak sei mosu mai, no kuandu sira halerik ba Nia, Nia sei luta ba sira. 

No Maromak ne'ebé hanesan ne'ebé halo funu ba ema Izrael halo funu mós ba ita ida-idak. Ne'e la signifika katak ita sei la hasoru susar. Maibé maski ita-nia hanoin no laran dúvida, Maromak besik hela. Nia fó dame ne'ebé ita la bele esplika. 

Agora daudauk, uza tempu uitoan atu alista buat saida de'it ne'ebé halo ita-nia laran susar. Tuirmai, fó lisensa ba ita-nia an atu tuur iha Maromak nia prezensa iha tempu balu. Fó ba Maromak ita-nia prekupasaun hotu, no husu ba Nia atu hatudu ba ita oinsá Nia proteje no fornese ona ba ita iha ita-nia moris loronloron.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Naran úniku ne'ebé salva

La iha salvasaun iha ema seluk, tanba la iha naran seluk iha lalehan okos nebee Maromak foo ba ema hodi ita bele hetan salvasaun. Apostolu 4:12 BK

Versíkulu ida-ne'e fó-hanoin ita katak so Jesus nia naran mak bele Salva no la iha naran seluk ne'ebé iha podér hanesan ho Jesus. Iha mundu ne'ebé dala barak promove dalan barak atu hetan lia-loos no salvasaun, versikulu ne'e hatudu ho klaru katak so Jesus mak dalan ba lalehan. Pedro fó sai lia-loos ida ne'e ho aten-barani iha Sanhedrin (Conselho relijiaun Judaismo nian) nia oin, no nia hamriik firmi iha ninia fiar maski ema kontra nia. 

Jesus nia naran la'ós de'it hanesan marka ida, maibé reprezenta Maromak nia planu salvasaun ba ema hotu. Liuhusi Jesus nia moris, mate, no moris-hias, Nia halo dalan atu ita bele rekonsilia ka dame ho Maromak. La iha ema seluk, filozofia, ka relijiaun ida mak bele fó salvasaun ne'ebé Maromak fó ba ita. Ninia naran mak iha podér, kurativu, no iha esperansa rohan-laek. 

Lia-loos ne'e dezafia ita kona-ba ba se mak ita atu tau ita-nia fiar ba. Serake ita haka'as an atu depende ba ita-nia esforsu rasik, ita-nia susesu, ka ritual relijiaun nian ba salvasaun? Ka ita tau konfiansa ba Kristu nia serbisu salvasaun ne'ebé remata ona iha foho Kalvariu? 

Biarba versikulu ne'e book ita-nia laran atu iha agradesementu no konviksaun. Jesus mesak de'it mak merese atu simu ita-nia adorasaun. Ninia naran mak fatin subar ka protesaun, ita-nia identidade, no ita-nia esperansa rohan-laek. Bainhira ita hala'o ita-nia moris loroloron nian, mai ita haklaken ho konfiansa katak la iha naran seluk iha lalehan nia okos, iha ne'ebé ema bele hetan salvasaun. So Jesus de'it!

Orasaun: 

Nai Jesus, obrigadu ba Ita tanba Ita mak dalan úniku atu hetan salvasaun. Ajuda ha'u atu tau fiar tomak ba Ita no haklaken ita-nia naran ho aten-barani ba ema seluk. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Hatene Maromak ho kle'an

Hau hakarak konhese Nia no hatene kbiit nebee halo Nia moris hias ona. Hau hakarak hola parte iha Ninia terus no sai hanesan Nia iha Ninia mate. Atu nunee, liu hosi dalan saida deit, hau bele moris hias hosi mate. Filipe 3:10-11 BK

Iha livru Filipe, Paulo fó korajen ba ema kristaun atu fokus nafatin ba Jesus no labele tau fiar ba sira-nia kbiit rasik ba sira-nia moris di'ak. Nia rekoñese katak se iha ema ruma iha razaun atu gaba an tanba hahalok-di'ak- ne'e mak nia (Paulo). 

Paulo mak ema judeu ne'ebé apaixonadu, no halo tuir Maromak nia ukun-fuan hotu, no halo buat hotu ne'ebé loos. Ulun-nain judeu sira hatudu respeitu ba nia antes nia sai ema kristaun, no tuir ukun-fuan judeu nian, Paulo la iha sala. Maibé apóstolu Paulo hatete katak buat hotu ne'ebé nia hetan iha tempu ne'ebá la iha komparasaun ho koñesimentu kona-ba Jesus. 

"Nee duni, hau sura buat hotu nudar folin laek tanba folin boot liu mak atu konhese hau nia Nai Kristu Jesus. Tanba Nia mak hau lakon buat hotu no sura buat hotu nudar lixu deit, atu nunee hau bele manaan Kristu" Filipe 3:8 BK

Kuandu Paulo deside tuir Kristu, nia lakon ninia relasaun ho autoridade judeu sira. Ema sira ne'ebé uluk fó suporta ba nia, sira komesa fo-terus ba nia. Sira haruka ema-lubun husi sidade ba sidade atu koko no hapara Paulo atu haklaken. Sira baku nia, baku nia ho sikote, ko'alia lia-bosok ba nia, no goza nia. Iha fatin ne'ebé de'it Paulo ba, nia hasoru blokeia no rezistensia oioin. 

Maibé Paulo la haree ninia terus nu'udar problema, maibé hanesan oportunidade. 

Terus ba Jesus mak oportunidade ida atu hakbesik liutan ba Jesus. Kuandu apóstolu Paulo hetan terus, nia hanoin Jesus Ninia terus iha kruz tamba de'it atu ajuda ita ema sala na'in. 

Kuandu ita hatene kle'an kona-ba Kristu, ita komesa hatene katak ita-nia hahalok-di'ak la to'o atu hetan Ninia domin ka bénsaun. Dalan ida de'it ne'ebé ita bele halo atu bele sai loos iha Maromak nia oin mak fiar ba Ninia Oan-Mane Jesus. No evidénsia kona-ba ita-nia fiar mak ita-nia hakarak atu la'o tuir Nia ... no mós terus hamutuk ho nia. 

Entaun... serake ita hakarak hatene Jesus hanesan Paulo? Se nune'e, hahalok-aat saida mak ita prontu atu rende? Serake ita hakarak haree dezafiu sira ne'ebé ita hasoru nu'udar oportunidade atu hetan terus hamutuk ho Kristu no hatene didi'ak Jesus? 

Ita bele komprende liután kona-ba Jesus nia domin ne'ebé kle'an tebes ba ita kuandu ita hadomi, fó perdua, serbí no ajuda ema seluk- ho kustu ka konsekuensia saida de'it 

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More