Maromak nia Bibi-Oan

Loron tuir mai, João haree Jesus mai hakbesik ba nia, no nia dehan, “Haree ba, Maromak nia Bibi Oan nebee kasu mundu nia sala!” João 1:29

Serake ita hein ona tempu naruk atu hetan buat importante ruma? Karik Ita hein hela semana balu atu hasoru kolega tuan ida, hein atu hetan informasaun kona-ba rezultadu diagnóstiku médiku ruma, ka hein ema-nia resposta ba mensajen ne'ebé Ita haruka ba sira. 

Iha apóstolu sira-nia tempu, Maromak nia povu hein ona tinan atus ba atus atu hetan salvadór ida. Maromak haruka João Batista mai uluk molok Salvador. Maromak haruka Joao atu prepara ema antes Jesus mai, no nia bolu sira atu arepende ba sira-nia pekadu. 

João iha ninia moris tomak hein Jesus. Nia uza ninia loron sira hodi antisipa Salvador mai hodi salva Ninia povu. Iha loron ne'ebé Jesus to'o mai, Joao Batista hakilar ho haksolok. 

Joao bolu Jesus nu'udar Maromak nia Bibi-Oan, ne'ebé kasu mundu nia sala. Iha aliansa antigu, bibi-malae oan sira uza hodi hasa'e sakrifísiu hodi kasu povu nia sala sira. Sira-nia sakrifísiu mak buat temporariu hodi restaura fali sira-nia relasaun ho Maromak. 

Maibé Jesus mai atu halo aliansa foun entre Maromak no ninia povu. 

Jesus nia mate mak sakrifísiu ida ba ita, maibé sakrifísiu ne'ebe permanente no kompletu. Jesus nia mate, hakoi no moris-hias sai dalan ba ita atu iha relasaun di'ak ho Maromak, no atu moris livre husi sala. Ne'e mak aliansa foun ne'ebé João Batista esplika: Jesus kasu mundu nia sala (João 1:29). 

Foti momentu balu dadersan ida ne'e, hodi hato'o agradesementu ba Maromak tamba fo prezente furak ne'ebé Jesus fó ba ita ida-idak. Tanba Jesus Ninia fidelidade, ita bele la'o iha moris foun no iha relasaun di'ak ho Maromak.

Hanoin to'ok kona-ba pasu ki'ik ida-ne'ebé ita bele halo atu fahe lia-foun di'ak ne'e ba ema ne'ebé seidauk hatene Jesus. Prezente gratuita ne'e ne'e mak liafuan di'ak ba ema ida-idak, no ita hetan priviléjiu atu fahe prezente ne'e ba ema hotu.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Uma-mahon ba anin-fuik

Ema nebee tuur iha Ida Nebee Aas Liu nia fatin segredu, sei hela iha Ida Nebee Kbiit Makaas nia mahon. Hau sei hatete ba Nai, “O mak hau nia fatin seguru, no hau nia abrigu. O mak hau nia Maromak, no hau sei fiar ba O.” Salmu 91:1-2 BK

Se ita hasoru ona anin-fuik ka dezastre naturál ruma, ita hatene importantansia hosi uma-mahon atu proteje ita-nia seguridade. Kuandu iha ameasa ruma, ita presiza buat ida-ne'ebé forte liu fali ameasa ne'e atu proteje ita. 

Ne'e mós akontese iha ita-nia moris loroloron nian. Ita bele hasoru susar oioin husi ita-nia inimigu espirituál no mós husi perigu sira seluk iha ita-nia moris. Dala ruma ita presiza hetan salvasaun husi ita-nia hanoin no abitu/toman aat ruma. Dala ruma ita presiza ema ida atu ajuda ita kura buat ruma ne'ebé ita la bele trata mesak. 

Eskritura hatete katak Maromak mak ita-nia fatin subar no uma - mahon. Nu'udar Maromak nia oan, ita bele deskansa iha Ninia forsa no podér, tanba ita hatene katak Nia bele proteje ita husi situasaun saida de'it ne'ebé ita hasoru. 

Tanba Maromak mak kria ita, Nia hatene duni saida mak di'ak liu ba ita. Nia hatene oinsá atu proteje ita-nia moris no proteje ita husi perigu. 

Maibé, ida-ne'e rekere ita ba hasoru Maromak kuandu ita presiza ajuda. Ita labele deskansa iha ninia prezensa se ita la gasta tempu iha ninia prezensa. Nia mak ita-nia fatin subar ba sira ne'ebé ativamente tau fiar maka'as ba Nia no buka Ninia ajuda. Maski ita hasoru susar saida de'it, maibé Maromak bele ajuda ita liuhusi ida-ne'e. 

Dalan di'ak liu atu buka Maromak Nia ajuda mak liuhusi orasaun. Gasta tempu atu ko'alia ho Maromak, hodi fó-hatene nia loloos Ita-nia sentimentu. Husu ba nia buat ne'ebé ita presiza. Bainhira ita buka Ninia prezensa no tau fiar ba Nia, nia sei proteje ita no halo ita seguru.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Nia haree Nai

Maria Madalena baa no foo hatene ba eskolante sira, “Hau haree ona Nai!” No nia hatoo liafuan nebee Jesus dehan ba nia. João 20:18 BK

Maria Madalena mak feto ida-ne'ebé ema barak hatene liu iha Biblia. Nia hamutuk ho Jesus durante ninia serbisu haklaken to'o ninia moris rohan no depois Ninia moris-hias.Tempu dahuluk ita hasoru Maria iha Eskritura mak momentu Jesus halo milagre ida ba nia: 

 ... "Jesus lao ba sidade sira no aldeia sira hodi haklaken no foo sai evanjelhu kona ba Maromak nia reinu. No sira nain sanulu resin rua lao hamutuk ho Nia. Iha mos feto balu, nebee Nia kura tiha hosi espíritu aat sira no moras oi-oin, inklui Maria ho naran Madalena, nebee diabu nain hitu sai hosi nia" Lucas 8:1-2 BK

Hanoin to'ok Maria Magdalena oinsá nia senti la iha ema ida mak bele ajuda, nia hetan babeur hosi espíritu aat, la iha esperansa, nia hetan torturasaun, no la iha solusaun tamba hetan presaun hosi espiritu nakukun.

Maibé depois ne'e, Jesus mai hodi halo Maria Magdalena livre hosi espíritu aat ne'e . 

Iha tempu ne'ebá, momentu Jesus kura Maria Magdalena hosi torturasaun diabu nian, Nia rekupera hosi forsa nakukun. No Maria Magdalena haree Jesus. Nia la'o tuir nia. Husi dook, nia haree krusifikasaun ninia Salvador ne'ebé Nia fó ba ema hotu (Marcos 15: 40). Tuirmai, nia haree fatin ne'ebé ema Rai Jesus Ninia mate isin (Marcos 15:47). 

Iha dadeer-saan, Maria Madalena no feto nain-rua seluk ne'ebé la'o tuir Jesus hadeer no ba atu kose-mina ba Jesus nia mate-isin. 

Maibé la iha ema ida iha ne'ebá. 

Iha rate mamuk ne'e, Maria tanis tanba triste hodi hanoin katak ema hasai tiha ona Jesus. Maibé tuirmai nia rona Jesus nia lian: 

 "Jesus dehan ba nia, “Maria.” Maria fila oin, no dehan ba Nia, “Rabi!” (katak ‘Mestri’). João 20:16

Tuirmai Jesus tau fiar ba nia hodi halo serbisu importante ida. " baa hasoru Hau nia maun-alin sira, no dehan ba sira, ‘Hau sei sae ba Hau nia Aman, no imi nia Aman, ba Hau nia Maromak, no imi nia Maromak" João 20:17

Novidades kona-ba Jesus nia moris-hias habelar liuhusi Maria Madalena, feto ne'ebé uluk hetan terus tamba forsa nakukun. Husi ema hotu ne'ebé Nia bele hili ba deskobrementu gloriaozu ida ne'e, Nia hili Maria Magdalena. 

Nia ba hasoru dixipulu sira ho novidades ne'ebé muda ona ninia moris hodi dehan: "Hau haree ona Nai!" (João 20: 18).

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Kontinua prátika

Halo tuir buat sira nebee imi aprende, simu, rona no haree iha hau. No Maromak dame nian sei hamutuk ho imi. Filipe 4:9 BK

Bainhira ema ida treinu kona-ba serbisu ida, ikusmai nia tenke muda husi estuda ba prátika. 

Apóstolu Paulo hatene importansia hosi prinsipiu ne'e, tamba ne'e mak maski nia ema sulan iha prizaun laran, nia hakerek ba ba ema kristaun sira iha Filipe, rai-Gresia, liafuan sira tuirmai ne'e: 

"Halo tuir buat sira nebee imi aprende, simu, rona no haree iha hau. No Maromak dame nian sei hamutuk ho imi" Filipe 4:9 BK

Paulo hanorin ona sira. Paulo treinu ona sira. Paulo hadomi tebes sira. Tan ne'e mak Paulo hosi prizaun laran haforsa sira atu moris tuir buat ne'ebé sira aprende ona hosi nia. 

Jesus mós hadomi tebes ninia dixipulu sira, Nia la'ós finje halo di'ak, maibé Nia halo di'ak duni ho laran ne'ebé hakarak fó glória ba Maromak. Jesus nia alin ida naran Tiago mós hakerek kona-ba la'ós de'it rona ba Biblia, maibé halo tuir buat ne'ebé Biblia hatete. 

"Maibee sai ema nebee halo tuir liafuan nee, laos ema nebee rona deit, hodi imi la lohi imi nia aan rasik. Tanba se ema ida rona deit liafuan nee no la halo tuir, nia hanesan ema nebee haree di-diak ninia oin iha espelhu ida. Bainhira nia haree tiha ninia aan, nia baa deit no haluha kedas ninia oin nee oinsaa" Tiago 1:22-24

Hatene buat ida ne'e buat ida, maibé tau ba pratika buat ne'ebé ita hatene ne'e buat seluk ida.

Maromak nia dame mak prezente ne'ebé nia fó mai ita. Ne'e mak buat ne'ebé ita esperiensia bainhira ita hakbesik ba nia hodi moris iha dalan ne'ebé fó onra ba Nia. Se ita hatene Maromak nia hakarak maibé la halo buat ida kona-ba ida-ne'e, ne'e hatudu katak ita lakohi fó onra ba Maromak. Maibé se ita halo tuir Maromak nia hakarak, ita-nia hahalok hatudu katak ita-nia identidade nia abut maihosi Kristu nia huun. No kuandu ita hakbesik an ba Kristu, ida-ne'e ajuda ita atu hetan Ninia dame. 

Halo tuir Maromak nia hakarak, la'ós atu aprende de'it kona-ba Maromak nia hakarak, no Maromak sei fo Ninia dame ba ita.

Tan ne'e, ohin loron, estuda kona-ba buat ne'ebé Paulo hanorin (ne'ebé realidade Jesus Ninia hanorin). Tuirmai, husu ba ita-nia an: "Saida mak Maromak hanorin ba ha'u kona-ba ha'u-nia an, Ninia an rasik, no ema seluk? Oinsá mak ha'u bele aplika Ninia hanorin iha ha'u-nia moris?

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Kontinua lao ho espíritu

Se ita moris iha Espíritu, mai ita mós la'o iha Espíritu. Galásia 5:25 BK

Bainhira ita la'o hamutuk ho kolega ida, ita tenke la'o ho lais ne'ebé hanesan, la uluk mós la ikus. Karik ida lao uluk, ita na'in rua la lao hamutuk ona. Ida ne'e hanesan mós bainhira ita la'o hamutuk ho Maromak. 

Apóstolu Paulo hatete nune'e: "Se ita moris iha Espíritu, mai ita mós la'o iha Espíritu" Galásia 5:25 BK

Kuandu ita fiar ba Jesus nu'udar ita-nia Salvadór, ita simu prezente grasa no Espiritu Santu. Espíritu Santu mak Maromak. Ita simu Maromak! Espíritu Santu dirije, gia, no serbisu iha no liuhusi ita. 

Iha tempu balu ne'ebé ita tenta atu halai uluk Espiritu Santu. Tanba, se ita onestu, Nia la sempre muda lalais hanesan ita-nia hakarak. Dalaruma ita pergunta se Nia la'o ba oin ho ita ka kuida ita. Tan ne'e mak ita presiza pasiénsia atu la'o ho Maromak. 

Iha tempu seluk, ita hetan tentasaun atu la'o iha espíritu nia kotuk. Tanba dala ruma, nia dirije ita ba iha fatin ruma ne'ebé halo ita la komfortavél. Ita presiza esforsu no intensaun, presiza forsa fíziku no emosionál lao hamutuk ho espíritu Maromak nian. Tan ne'e mak la'o ho Maromak rekere korajen.

Ita bele kontinua la'o tuir Espiritu Santu hodi hakbesik ba Nia, fo atensaun ba Nia, ko'alia ho Nia, lee Ninia Liafuan, no hamutuk ho komunidade sira ne'ebé hadomi Nia. 

Tanba kuandu ita iha komitmentu atu hakbesik ba Maromak, iha buat ida mak serteza: Espiritu Santu sei dirije ita, kada pasu iha dalan ne'ebé atu la'o.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Ema hotu pekadór no lakon Maromak Ninia gloria

Tanba ema hotu-hotu halo ona sala, no sira la too Maromak nia glória. Maibee ita bele sai loos liu hosi Ninia grasa nebee Nia foo gratis deit. Tanba Nia hola fali ita iha Jesus Kristu. Roma 3:23-24 BK

Roma 3:23 mak versíkulu ida-ne'ebé ema barak hatene no dala barak liu sita hosi Biblia tomak. Ida-ne'e hatudu ideia ida ne'ebé hanesan xave ba ita atu bele komprende oinsá mak ita bele hetan salvasaun husi Maromak nia hirus no oinsá atu ita bele inklui mós iha Ninia família. Buat importante ida atu komprende versíkulu ne'e mak atu haree tuir ninia kontestu. Kombinasaun versíkulu 21, 22, no 23 hatudu katak ema hotu merese hetan Maromak Ninia laran hirus tamba sira-nia sala no ema hotu hetan justisa ka sai loos so liuhusi Jesus Kristu. 

Liafuan iha ne'e badak no klaru: Ema hotu halo sala. Ema hotu halo ona sala. La iha ema ida mak la halo sala (Roma 3: 10). La iha ema ida mak bele halai ses. Paulo la halo agroupamentu ruma kona-ba pekadu kiik ka boot, so pekadu de'it no ema hotu monu ona ba sala. Versíkulu anterior hatete katak "la iha ema ida". Ema hotu ne'ebé morál di'ak to'o iha ne'ebé mós iha situasaun hanesan, sira hotu ema "pekadór".

Hatene kona-ba buat ne'ebé loos no sala la halo ita sai halo itania moral di'ak liu, maibé halo tuir buat ne'ebé loos mak sei hadi'a ita-nia moral maibé nafatin, ita ema pekadór. Realidade, ita nafatin monu ba sala. Ho lia-fuan seluk mesmu ita hatene konsekuensia hosi pekadu la sufisiente atu prevene ita hosi komete pekadu (Roma 1:18-20). 

Tanba la iha ema ida mak sala la iha, ita hotu lakon Maromak nia glória. Ida ne'e problema, tanba ita labele hetan salvasaun husi Maromak nia julgamentu esetu/kecuali ita la iha sala. Ne'e mak Maromak nia standard ka sasukat, no ita hotu monu ka lakon ona Maromak Ninia gloria tamba ita-nia pekadu. Ida ne'e mak kriteria atu tama ba Maromak Ninia familia, maibé ita-nia pekadu prevene ita atu hola parte iha Maromak Ninia familia.

Felizmente, Paulo hakerek tan versíkulu ida tuirmai, ne'ebé esplika oinsá mak ita bele hetan Maromak Ninia glória. "Maibee ita bele sai loos liu hosi Ninia grasa nebee Nia foo gratis deit. Tanba Nia hola fali ita iha Jesus Kristu" Roma 3:24 BK

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

La muda

Jesus Kristu mak hanesan deit, horiseik, ohin loron no too tinan ba tinan. Ebreu 13:8 BK

Iha mundu ne'ebé muda beibeik no sempre book an, ita bele tau fiar Maromak nia natureza ne'ebé la muda. 

Inspira hosi Espiritu santu, autór Ebreu hakerek liafuan tuirmai ne'e: 

"Jesus Kristu mak hanesan deit, horiseik, ohin loron no too tinan ba tinan" Ebreu 13:8 BK

Titulu hosi Maromak ne'ebé iha personalidade tolu mak trindade: Maromak Aman, Oan-Mane, no espíritu santu. No Oan-Mane, Jesus Kristu, mak reflesaun moos Liu hosi Aman Maromak, ne'ebé nunka muda. 

Bainhira ita deskobre tiha mistériu furak ne'ebé Maromak halo nia an sai ema (João 1:14) iha Jesus Kristu, ita rona nia hatete buat ne'ebé furak hanesan: "Hau ho Aman mak ida de'it," (João 10:30) "Ema ne'ebé haree ona Ha'u haree ona Aman," (João 14:9) no: "Aman, fó glória mai Ha'u iha Ita-nia oin ho glória ne'ebé Ha'u iha ona ho Ita molok mundu hahú." (João 17: 5 ) 

Joao deskrebeJesus hanesan Liafuan: "Hahuu fo-foun, Liafuan iha nanis ona. No Liafuan nee hamutuk ho Maromak. No Liafuan nee mak Maromak" João 1:1

Maromak hatete ba nia an: "Hau mak Nai, Hau la troka, entaun imi, Jacó nia oan sira, la simu kastigu" Malakias 3:6. Ita bolu kualidade Maromak nia hahalok ne'ebé la muda "imutabilidade"

Husi jerasaun ba jerasaun, Maromak mak fatuk ne'ebé la muda ne'ebé ita bele kuda metin ita-nia fiar ba.

Maromak labele bosok. Nia labele halo buat ne'ebé la loos. Nia sempre fiél. Nia perfeitu loos. Nia sempre sufisiente. Nia kontinua konstan, tahan nafatin no ba nafatin. 

Se ita-nia mundu sai aat ona, ka se buat hotu ne'ebé hale'u ita haree hanesan muda an dadauk, ka se susar atu hatene saida mak fatuk ne'ebé metin no saida mak rai-henek, ita bele tau fiar no esperansa ba Jesus. 

Nia la'ós de'it ita-nia Salvador ne'ebé loos, maibé nia mós ita-nia Maromak ne'ebé la muda.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Portaun kloot

Tama liu hosi odamatan kloot. Tanba odamatan luan no dalan boot sei lori ema ba mate, no ema barak tama liu hosi dalan ida nee. Maibee odamatan kloot no dalan kiik sei lori ema ba moris, no ema uitoan deit mak hetan dalan ida nee. Mateus 7:13-14 BK

Ida ne'ebé mak fasil liu? 

Tuur no rileks iha sofa leten ka sa'e foho ida? Ba sosa no han hahan midar sira iha loja ka desaraska te'in hahan ne'ebé saudavél iha uma? Protesta kona-ba problema ida ka serbisu maka'as atu rezolve problema ne'e? Salva ita-nia osan ne'ebé susar atu hetan ka gasta hotu iha kalan ida? 

Tanba de'it buat ruma fasil la signifika katak ida-ne'e mak di'ak liu. 

Jesus hatene ida-ne'e. Realidade, Jesus dala barak hili dalan ne'ebé susar liu ho ojetivu duké dalan ne'ebé fasíl maibé la Iha ojetivu. Nia dehan:

"Tama liu hosi odamatan kloot. Tanba odamatan luan no dalan boot sei lori ema ba mate, no ema barak tama liu hosi dalan ida nee. Maibee odamatan kloot no dalan kiik sei lori ema ba moris, no ema uitoan deit mak hetan dalan ida nee" Mateus 7:13-14 BK 

Embora Jesus hakarak salva mundu tomak, maibé ema uitoan de'it mak hili dalan salvasaun ne'e. Tanba dalan hotu, relijiaun hotu, no intensaun di'ak hotu la lori ita ba Maromak. 

Jesus la dehan katak ita bele hetan ita-nia salvasaun liuhosi buka-hatene buat ne'ebé susar liu, ka sa'e foho ne'ebé aas liu, ka halo orasaun ne'ebé naruk liu atu hetan portaun ba moris nian. Maibé, iha João 10: 7, Jesus hatete ho klaru: "Hau mak portaun ne'e" 

Dalan ba Maromak ne'ebé loos so ida de'it, Maromak ne'ebé Kria mundu ne'e nian no ida ne'ebé sustenta ita-nia moris, mak liuhusi Jesus Kristu, ne'ebé hadomi ita, fó ona Ninia moris ba ita, no nia moris hi'as fali husi mate atu ita bele moris. 

Ita la bele sosa ho osan ninia domin ka salvasaun ne'e, maibé ita bele simu ninia prezente grasa nian no tama liuhusi portaun kloot. 

Loos duni, fasil liu atu asesu média sosiál iha telemovél duke hanoin kona-ba sentidu moris nian ne'ebé kle'an liu liuhosi lee Sagrada Eskritura. Fasíl liu atu prekupa ho ita-nia moris mundu nian duke halo arependimentu ba Ita-nia sala sira. Fasil liu atu haluha tiha Maromak Iha ita-nia moris duke tau fiar ba nia ho ita-nia laran tomak. 

Maibé dalan ne'ebé susar liu iha moris ne'e folin-boot liu. Portaun kloot ne'e lori ba moris, no la iha dalan seluk, só de'it liuhosi ita-nia Salvador Jesus Kristu.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Maromak hamutuk ho Ita

Laos Hau manda ona o? O tenki forti no brani ba! O keta tauk ka hakfodak, tanba Hau mak Nai, o nia Maromak, nebee hamutuk ho o iha fatin nebee deit mak o baa. Josué 1:9 BK

Iha Biblia laran, iha tempu oioin ne'ebé Maromak haruka ema atu labele ta'uk. Maromak dehan ida ne'e iha tempu ne'ebé ema ne'ebé rona iha razaun hotu atu ta'uk tebes. 

Porezemplu, iha tempu ne'ebá, Josue, lider ba Izrael, depois Moises mate, lori ema Izrael ba rai ne'ebé Maromak promete ona (haree: Exodo 3). Nia lori ema millaun ida resin ba fatin ne'ebé Maromak promete ona, no ida-ne'e katak nia sei hasoru situasaun ne'ebé aat no ta'uk. 

Iha tempu tauk sira ne'e, Maromak haruka Josue atu halo buat rua: 

Halo tuir Maromak Nia Liafuan no sai forte no aten-barani tanba Nai hamutuk ho sira. (Haree Josué 1: 7-9) 

Iha Mateus 28, Jesus hatete buat ne'ebé atu hanesan depois Nia moris hi'as fali. Nia hamutuk ho ninia dixipulu na'in sanulu-resin-ida no nia hatete ba sira: 

 “Hau simu ona kbiit tomak iha lalehan no mundu. Nee duni, imi baa, no halo disípulu ba ema hosi nasaun hotu-hotu. Foo batizmu ba sira hodi Aman, hodi Oan, no hodi Espíritu Santu nia naran. Hanorin sira atu halo tuir buat hotu nebee Hau manda ona ba imi. No tebes, Hau sei hamutuk nafatin ho imi, too mundu nia rohan.” Mateus 28:18-20 BK

Jesus hatete ba ninia dixipulu sira buat importante rua: 

Halo tuir Ninia liafuan ("ba nasaun hotu no halo dixipulu sira"), no, nia sei hamutuk ho sira.

Maromak sempre hanesan. Nia mós Maromak ne'ebé hanesan bainhira Nia fó Ninia liafuan ba Josue no fó garantia Ninia prezensa, no nia mak Maromak ne'ebé hanesan ne'ebé fó Ninia Liafuan mai ita no asegura Ninia prezensa. Maromak ne'ebé fiél hadomi no tau matan ba ita, no nia sei nunka husik ita ka abandona ita. 

Ohin loron, hanoin kona-ba dalan ne'ebé ita bele hanorin ema seluk kona-ba Jesus no Ninia liafuan sira. Oinsá mak Ninia Liafuan no Ninia prezensa halo Ita sai forte no aten-barani? Antes husik hela tempu ne'e, agradese ba Maromak tanba nia promete atu sempre hamutuk ho imi.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Saida mak misaun igreja nian?

Nee duni, imi baa, no halo disípulu ba ema hosi nasaun hotu-hotu. Foo batizmu ba sira hodi Aman, hodi Oan, no hodi Espíritu Santu nia naran. Mateus 28:19 BK

Depois Jesus mate no moris hi'as fali, nia gasta loron 40 iha rai atu serbí ema no prepara ninia dixipulu oinsá sira bele moris bainhira Jesus ba ona. Jesus planu atu husik rai no sa'e ba lalehan, maibé antes nia halo ida ne'e, nia fó ba ninia dixipulu sira misaun ida ne'ebé ita hetan iha Mateus 28: 19-20. Dala barak ita bolu misaun ne'e nu'udar Komisaun Boot. 

Komisaun Boot hahú ho ba fatin ne'ebé ema presiza rona kona-ba Jesus nia liafuan di'ak. Ida-ne'e la dehan katak ita tenke husik ita-nia nasaun, tamba ema iha ita-nia rai-laran no iha serbisu-fatin ne'ebé presiza rona Jesus nia esperansa. 

 Komisaun Boot nia objetivu mak atu halo ema sai Jesus nia dixipulu. Tan ne'e, bainhira ita fahe Jesus nia liafuan di'ak ba ema, ita tenke hatudu ba ema oinsá Jesus muda ona ita-nia moris, no konvida sira atu buka-hatene Jesus rasik hosi Sagrada Eskritura. 

Jesus mós hanorin ita atu fo batizmu ba ema fiar na'in foun sira. Batizmu mak símbolu ida-ne'ebé hatudu katak ema ida tama ba Maromak Nia família. Ne'e mak aktu ba fiar na'in ida hatudu publikamente sira-nia fiar foun ba Jesus. Batizmu mak parte importante ida husi ita-nia moris nu'udar ema kristaun, tan ne'e Jesus asegura inklui batizmu iha ita-nia misaun. 

Karik fasil atu hanoin katak atu halo ema sai dixipulu no fo batizmu mak responsabilidade husi ita-nia pastor da igreja. Maski buat sira-ne'e mak parte husi igreja ida-idak nia misaun, maibé Jesus hakarak ema kristaun hotu involve atu hanorin ema tuir Jesus Ninia hanorin ka halo sira sai dixipulu. 

Tan ne'e, ohin loron foti tempu balu atu hanoin kona-ba ema ne'ebé ajuda Ita koñese lia-loos. Husu ba Maromak atu lori ema ne'ebé Ita bele ajuda halo sai dixipulu. Tuirmai, husu Maromak atu fó aten-barani ba ita atu fahe Jesus nia esperansa ba ema sira ne'ebé hale'u ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Hamriik hamutuk Iha kadunan nia oin

Tuir mai hau haree, no tebes, ema lubun boot ida, nebee ema la bele sura, hosi nasaun, suku, povu no lian hotu-hotu. Sira hamriik iha kadunan nia oin, no iha Bibi Oan nia oin. Sira hatais ropa mutin no kaer ai palma tahan iha sira nia liman. Sira hakilar ho lian makaas dehan, “Salvasaun mai hosi ita nia Maromak nebee tuur iha kadunan, no hosi Bibi Oan” Apokalipse 7:9-10 BK

Ema iha mundu iha modelu oinoin. Ema iha fuuk no kulit oinoin, iha matan kor oinoin no iha oin-midar. Ema iha kulit oinoin morena,mutiny, metan, balu iha as-rahun, balu hasan kuak bainhira hamnasa. Sira iha fuuk naruk, fuuk badak, fuuk loos, fuuk karakól, no balu fuuk la iha. 

Sira hotu iha idaidak ninia background no esperiénsia moris ne'ebé diferente. Sira hotu iha lian ne'ebé úniku, no hahalok ne'ebé diferente. Sira hotu halo ona tuir Maromak nia ilas. Loron ida, ema kristaun hotu iha istória tomak mundu nian sei hamriik hamutuk iha Maromak nia kadunan oin. 

Biblia deskrebe hanesan tuir mai: "Tuir mai hau haree, no tebes, ema lubun boot ida, nebee ema la bele sura, hosi nasaun, suku, povu no lian hotu-hotu. Sira hamriik iha kadunan nia oin, no iha Bibi Oan nia oin. Sira hatais ropa mutin no kaer ai palma tahan iha sira nia liman. Sira hakilar ho lian makaas dehan, “Salvasaun mai hosi ita nia Maromak nebee tuur iha kadunan, no hosi Bibi Oan” Apokalipse 7:9-10 BK

Versikulu iha Apokalipse ne'e ko'alia kona-ba ema husi background oinoin, kultura oioin, kultura oioin, no dalan moris oinoin halibur hamutuk hodi adora Maromak. Ita bele adora Maromak iha dalan ida-ne'e tanba bainhira ita sei sala-na'in hela, Kristu mate ba ita (Roma 5:8). Jesus sai hanesan ponte entre ita ho Maromak hodi sai nu'udar sakrifísiu ne'ebé perfeitu hodi salva ita  

So Jesus nia kbiit de'it maka bele halibur ema hotu iha mundu. No tanba Jesus nia kbiit boot ne'ebé halo serbisu iha Igreja tomak, ita bele intensionalmente hein Na'i Jesus Ninia fila fali mai daruak hodi fahe ninia domin, ksolok, esperansa no dame ba ema hotu ne'ebé hale'u ita. Tanba ita-nia esperansa, forsa, no futuru so de'it iha Jesus, ho Jesus Ninia podér ita bele hakilar hamutuk ho ema kristaun iha fatin hotu-hotu: "Salvasaun mai hosi ita nia Maromak ne'ebé tuur iha kadunan, no hosi Bibi Oan”!

Tan ne'e, ohin loron, mai ita adora Maromak ho is-moris ne'ebé iha liuhosi nafatin fokus ba Jesus, no moris ho unidade ho ema kristaun seluk bainhira ita hein hela Na'i Jesus atu fila fali Mai ba daruak.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Ita merese duni atu hetan adorasaun

 “O merese, ami nia Nai no Maromak, atu simu glória no onra no kbiit, tanba O mak kria buat hotu-hotu. Tuir O nia hakarak mak O kria sira no sira iha.” Apokalipse 4:11 BK

Ita iha Kriadór ne'ebé kbiit boot, maibé fasil atu haluha katak nia mak kmanek tebes. Ita moris iha mundu ne'ebé nakonu ho ninia milagre sira, maibé baibain ba ita atu fokus ba buat kmanek sira ne'e la'os ba kriadór ne'e rasik. 

Maromak kria buat Ida hosi mamuk. Maromak ko'alia no moris, ninia signifikasaun, no ninia hakarak ezisti. Nia mak autór ba buat hotu. Nia merese atu hetan adorasaun. 

Baleia sira nani iha tasi, ursu/beruang buka hahan iha foho tutun sira, fire flies/ kunang kunang haroman area remota sira. Ema harii uma andar sira ne'ebé aas ba to'o lalehant, ema te'in hahán, dezenvolve língua, no halo relasaun ne'ebé komplexu ho Maromak no ho ema. 

 "O merese, ami nia Nai no Maromak, atu simu glória no onra no kbiit, tanba O mak kria buat hotu-hotu. Tuir O nia hakarak mak O kria sira no sira iha” Apokalipse 4:11 BK

Eskritura ne'e hatete katak "buat hotu" inklui buat hotu ne'ebé ita bele haree no buat hotu ne'ebé ita la bele haree. " Buat hotu" inklui mós ita ema Maromak mak kria. 

Maromak intensionalmente kria ita ho hakarak rasik no Maromak dezeñu ita uniku. Maromak tau ita Iha planeta ida ne'e ho ojetivu ida. Maromak fo kbiit ba ita atu fó naroman no fahe ninia domin ba ema seluk iha dalan espesiál no uniku. 

Tan ne'e, foti tempu balu ohin-loron atu hanoin katak Maromak kria ita no nia hadomi ita. Nia merese atu hetan ita-nia adorasaun.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Ko'alia onestu ho Maromak

Maibee hau sei kanta kona ba O nia kbiit,

sin, hau sei kanta makaas iha dadeer tanba O nia domin metin. Tanba O mak hau nia fatin aas nebee seguru no fatin subar iha loron nebee hau hetan terus. Salmu 59:16 BK

Bainhira David sei joven, nia hetan ordena nu'udar liurai ba Izrael. Maibé, duke sa'e ba kadunan ho glória ne'ebé nabilan, nia halai tinan barak husi Izrael nia liurai (nia banin) ne'ebé koko beibeik atu oho nia. 

Durante tempu ne'e, David lamenta ba Maromak: Nia ko'alia ho onestu kona-ba ninia situasaun, maibé nia iha esperansa katak Maromak sei restaura ninia situasaun. Salmu 59 mak rezultadu husi David ninia konversa sira ho Maromak. 

David nia laran-susar fó dalan ba nia atu espresa ninia triste, hakilar ba justisa, no hanoin Maromak Nia fidelidade. Fokus ba Maromak Ninia fidelidade, fo hanoin David kona-ba Maromak nia karakter no hatene Maromak nia karakter ajuda nia atu iha esperansa. Tan ne'e mak nia bele hatete: "Maibee hau sei kanta kona ba O nia kbiit, sin, hau sei kanta makaas iha dadeer tanba O nia domin metin. Tanba O mak hau nia fatin aas nebee seguru no fatin subar iha loron nebee hau hetan terus. Salmu 59:16 BK

Ko'alia ho onestu ho Maromak, ajuda David hatene katak maski ninia situasaun atuál ne'e la di'ak, maibé Maromak nafatin di'ak, no Nia merese atu hetan adorasaun. David fiar katak Maromak sei kontrola nafatin, no loron ida nia sei haree Maromak nia promesa sira sai loos. 

No loron ida, Maromak nia promesa sira ne'e sai loos duni. Maibé tinan barak ne'ebé David halai hosi fatin ba fatin la saugati de'it tamba Maromak uza tempu sira ne'e hodi ajuda David sai lideransa no funu-na'in ne'ebé Izrael presiza. Tempu sira ne'e, haforsa David ninia karakter no prepara nia ba ninia hakarak iha futuru. Maski nia hasoru susar oioin, maibé Maromak nafatin fiél ba nia. 

No Maromak mós bele no sei fiél ba ita-nia moris. 

Bainhira ita tau ita-nia esperansa ba Jesus, ita sei la terus saugati de'it, tanba Maromak ne'ebé agora mós Maromak ne'ebé sei ba nafatin iha futuru. No nia kontinua defende no halo buat ne'ebé di'ak ba ita. Tan ne'e, maski ita hasoru buat susar saida de'it, ita bele kaer metin ba esperansa ne'e: Jesus bele halo ita-nia laran-susar ba ita-nia di'ak no ba Ninia glória. 

Maromak bele halo ita-nia laran-susar no uza ida-ne'e ba ninia hakarak sira. Nia bele loke dalan liuhusi ita-nia tempu rai-fuik maran nian. Nia mak Ita-nia forsa no protesaun iha tempu susar. La iha buat ida mak imposivél ba Maromak.

Nune'e ohin loron, kontinua hakbesik an ba Maromak, no buka evidénsia kona-ba ninia fidelidade. Bainhira ita intensionalmente buka Maromak, buka dalan atu adora Nia hanesan David.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Saida mak Biblia hatete kona-ba kiak?

Ema nebee hatudu laran diak ba ema kiak mak foo empresta ba Nai, no Nia sei selu fali ema nee tuir buat nebee ema foo. Provérbiu 19:17 BK

Saida mak Bíblia ko'alia kona-ba fé/ fiar iha kontestu fó? Kona-ba Maromak nia laran ba ema kiak sira? 

Bíblia riku ho sabedoria kona-ba Maromak nia domin ba ema ne'ebé moris iha kiak laran, no kona-ba ita-nia responsabilidade atu ajuda. Ita hadomi dalan ne'ebé Jesus hatudu oinsá atu tau matan ba ema vulneravél no marjinalizadu. Refleta kona-ba versíkulu Biblia sira ne'e kona-ba fó no halo orasaun ba labarik, família no komunidade ne'ebé presiza. Tuir mai buat ne'ebé Biblia hatete kona-ba kiak. 

Imi tenki foo duni ba nia. Imi nia fuan laran keta tristi bainhira imi foo ba nia. Tanba nee, Nai, imi nia Maromak, sei foo bensaun ba imi iha buat hotu nebee imi halo, no iha buat hotu nebee imi nia liman kona. Deuteronómiu 15:10 BK

Ema nebee hatudu laran diak ba ema kiak mak foo empresta ba Nai, no Nia sei selu fali ema nee tuir buat nebee ema foo. Provérbiu 19:17 BK

Nia nebee laran luak sei hetan bensaun,

tanba nia foo ninia paun ba ema fraku. Provérbiu 22:9 BK

No se imi fui imi nia moris hodi ajuda ema hamlaha, no habokur ema nebee iha moris terus, nunee imi nia lampu sei sae hosi fatin nakukun, no imi nia rai nakaras sei sai hanesan loro aas. Isaias 58:10 BK

Maibee bainhira o halo festa, konvida ema kiak sira, ema aleijadu sira, ema ain aat sira no ema matan delek sira. No o sei simu bensaun, tanba sira la bele selu fali o. Tanba o sei simu o nia kolen iha tempu nebee ema loos sei moris hias. Lucas 14:13-14 BK

Pontu mak nee: ema nebee kari uitoan sei koa uitoan, ema nebee kari barak sei koa mos barak. Ema ida-idak tenki foo tuir buat nebee nia desidi ona iha ninia fuan laran. La bele foo ho laran todan ka tanba ema obriga ita. Tanba Maromak hadomi ema nebee foo ho laran kontenti. 2 Korinto 9:6-7 BK

Refleta kona-ba saida mak Biblia hatete kona-ba fé/fiar nian, biarba eskritura sira-ne'e sai matadalan ba ita-nia asaun no ita-nia laran atu iha kompaixaun no laran-luak ba ema kiak sira.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Viziñu ne'ebé loos

Tanba ita bele kumpri lei tomak ho liafuan ida deit: “Hadomi o nia maluk hanesan o nia aan rasik.” Galásia 5:14 BK

Karik Ita hanoin: "Maromak hakarak ha'u halo saida?" 

Se ita buka versíkulu ida-ne'ebé sumariza mandamentu iha Testamentu Antigu no Testamentu Foun, Paulo hakerek ba ema kristaun sira iha Galasia hanesan tuir mai ne'e... 

 "Hadomi o nia maluk hanesan o nia aan rasik" Galásia 5:14

Paulo nia liafuan mak hanesan ukun-fuan ida-ne'ebé Jesus fó bainhira ema husu ba nia kona-ba mandamentu ne'ebé importante liu (Mateus 22:37-40). Buat ne'ebé sira nain-rua dehan mak: alende hadomi Maromak ho buat hotu ne'ebé ita iha, Ita tenke mós hadomi ita-nia maluk hanesan ita-nia an rasik. 

Se mak ita-nia viziñu? Ema judeu ida-ne'ebé matenek kona-ba ukun-fuan relijiaun nian husu ba Jesus: "Se mak ha'u-nia viziñu ka ha'u-nia maluk?" Tan ne'e, Jesus konta istória kona-ba mane ida-ne'ebé hetan baku no besik mate iha dalan ninin. Amlulik ida no ema Levi ida la'o liu no la hanoin kona-ba mane ne'e, maibé ema Samaria ida fo ninia tempu no osan hodi ajuda kura nia. 

Tanba razaun barak, ema judeu sira hakribi ema Samaria. Maibé ida-ne'e la hanetik ema Samaria atu hatudu laran-sadi'a. Saida mak Jesus hakarak ema judeu nia matenek-na'in (no ita) atu rona katak ema hotu, iha fatin ne'ebé de'it mak ita-nia maluk ka viziñu, no ema hotu merese atu simu ita-nia domin nu'udar sakrifísiu. 

Oinsá mak Ita hadomi Ita-nia an? Kuandu ita presiza buat ruma ba ita-nia an, ita serbisu maka'as atu hetan buat ne'e. Ita la presiza hanoin kona-ba oinsá atu trata ita-nia an, tamba ida ne'e mak buat ne'ebé ita naturalmente halo. Kuida ne'ebé naturalmente ita halo ba ita-nia an, mak buat ne'ebé ita presiza halo ba ema seluk mós. 

Oinsá mak ita bele hadomi ita-nia maluk hanesan ita hadomi ita-nia an? Se ema ruma presiza ajuda ho sira-nia serbisu ruma iha sira-nia uma, serbisu saida de'it, ka ajuda sira-nia oan, ita bele serbí ho haksolok. Se família ida hasoru susar atu hetan osan, ita bele fó ho laran-luak. Se iha ema ruma iha ita-nia moris ne'ebé la iha ezemplu di'ak kona-ba halo tuir Maromak nia hanorin, ita bele ajuda sira oinsá moris tuir Maromak Nia hanorin.

Sai viziñu ne'ebé loos la fasíl tamba involve kustu ruma, maibé ita sei bele hili atu hadomi sira hanesan ita hadomi ita-nia an rasik. No kuandu ita serbí ema seluk hanesan ne'e, ita mós serbí Jesus. 

Ohin loron, foti tempu balu hodi konsidera ema sira ne'ebé presiza Ita-nia ajuda. Tuirmai, husu Maromak atu hatudu oinsá mak ita bele hadomi no serbí sira iha semana ne'e.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Dame ne'ebé nunka husik Ita

Hau husik dame ba imi. Hau foo Hau nia dame ba imi. Hau foo ba imi laos hanesan mundu foo. Keta laran susar, no keta laran tauk. João 14:27 BK

Hanoin to'ok kona-ba tempu ne'ebé Ita prekupadu ka hanoin barak kona-ba buat balu. Oinsá mak Ita hasoru ida-ne'e? Karik Ita koko husik problema ne'e domina ita-nia neon. Naturalmente ita responde ho hanoin sira hanesan ne'e, maibé Maromak hatudu dalan ne'ebé di'ak liu ba ita atu hatán ba prekupasaun sira-ne'e. 

Molok Jesus mate iha krús, nia hatete ba ninia dixipulu sira katak nia sei husik hela sira. Prekupa kona-ba moris la ho Jesus, dixipulu sira hakarak hetan resposta. Maibé, duke fó resposta ba sira, Jesus haruka ninia dixipulu sira atu iha dame no la husik sira-nia laran sai taridu.

Hanoin to'ok, ida-ne'e halo ninia dixipulu sira sente frustadu. Sira sente katak Jesus sei husik sira daudaun, no sira haka'as an ho sira-nia ideia rasik atu halo tuir buat ne'ebé nia hatete ba sira-nia futuru. 

Oinsá ho ita? Ita mós bele haka'as an atu buka solusaun ba ita-nia problema rasik bainhira ita hanoin barak kona-ba prekupasaun balu. Ita bele husik buat ne'ebé akontese ba ita halo ita-nia hanoin sai buradu no influénsia ita-nia relasaun ho Maromak. Maibé Maromak nia hakarak ne'e dook no boot liu buat ne'ebé ita bele haree no komprende. 

Kuandu Jesus hatete ba dixipulu sira atu iha dame no la bele hanoin barak, Jesus haree alende kruz - Nia haree ninia moris-hias, Nia fila fali ba lalehan, no Maromak nia espíritu santu mai. 

Nune'e mós, Maromak haree ita-nia situasaun liu fali ita-nia situasaun sira. 

Tanba ita moris iha mundu ne'ebé la perfeitu, ita sei hasoru susar oioin, maibé tanba ita serbí Maromak ne'ebé di'ak, Nia haree alende buat-aat ne'ebé ita hasoru. Nia haree ita-nia futuru nakonu ho esperansa. 

Jesus hatete ba ninia dixipulu sira atu iha dame tanba Nia hakarak sira tau fiar ba Nia. Hanesan ne'e mós, Maromak hakarak ita atu iha dame iha situasaun hotu-hotu tanba ita tau fiar ba Nia atu halo buat hotu ba ita-nia di'ak no ba Ninia glória. 

Tan ne'e, foti tempu balu ohin loron, atu refleta kona-ba situasaun balu ne'ebé halo ita hanoin barak. Tuirmai, hatete ba Maromak katak ita tau fiar ba Nia iha situasaun sira-ne'e. Imajina entrega prekupasaun sira ne'e ba Nia no husik nia fó fali ninia dame ba ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Haka'as an buka dame

Sees hosi buat aat no halo buat nebee diak, buka dame no hakaas aan hodi hetan buat nee. Salmu 34:14 BK

Iha mundu ne'ebé nakonu ho konflitu, estres, no inserteza, Maromak bolu ita atu sai ema ne'ebé buka dame. Versikulu ne'e fó-hanoin ba ita katak dame la'ós buat ne'ebé automatikamente akontese, maibé ita tenke haka'a an ho intensaun buka dame ne'e. Dame ne'ebé loos mai husi hasees an husi sala no hili buat ne'ebé di'ak no loos iha Maromak nia oin. 

Buka dame signifika la'os de'it evita halo argumenta ka debate ho ema seluk kona-ba buat folin laek sira, maibé buka dame rekere ita atu ativamente hatudu domin, perdua no hatudu laran-di'ak ba ema seluk, maski la fasíl. Ida-ne'e signifika katak tau fiar ba Maromak iha situasaun hotu-hotu, tanba ita hatene katak Maromak mak ita-nia fonte dame nian. Kuandu ita hili hahalok loos duke halo sala, ita hatudu Kristu nia domin no lori Ninia dame ba ema seluk nia moris. 

Ohin loron, mai ita husu Maromak atu ajuda ita buka dame iha ita-nia laran, iha ita-nia relasaun ho se de'it no iha ita-nia komunidade nia let. Espera katak ita sei sai Maromak Ninia instrumentu ba dame nian no sai nu'udar Maromak Ninia embaixador ba dame nian.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Dame Maromak nian

No Maromak nia dame, nebee aas liu fali kompriensaun hotu, sei tau matan ba imi nia fuan laran no neon liu hosi Kristu Jesus. Filipe 4:7 BK

Ema hotu hakarak dame. Iha mundu, iha ita-nia uma, no iha ita-nia laran. Iha tempu susar ita buka komfortu. Maski memontu ita laran susar, ita hakarak dame ne'ebé metin nafatin. 

Bíblia hanorin kona-ba dame ne'e. Filipe 4: 7 esplika kona-ba Maromak nia dame. La iha espresaun ka meditasaun ne'ebé bele prodús dame modelu ida ne'e. Ida-ne'e so bele mai husi Maromak rasik. Dame hanesan ne'e mak dame ne'ebé perfeitu no ksolok Maromak nian, ne'ebé sempre kontente. 

Dame ne'e aas liu fali ita hotu nia kompriensaun. Ida ne'e mak idea ida ne'ebé aas Liu fali ita-nia pensamentu normál. Ne'e mak deskrisaun furak ida kona-ba buat ne'ebé Maromak nia dame bele halo. Ida ne'e ne'e liu fali buat ne'ebé ita bele imajina. Maromak Ninia dame mós guarda no proteje ita-nia laran no neon. 

Oinsá mak ita bele hetan dame hanesan ne'e? Versíkulu anterior iha Filipe fó matadalan. Iha Filipe 4:6 dehan "Keta hanoin barak kona ba buat ida. Maibee iha buat hotu, liu hosi orasaun no harohan, hamutuk ho agradese, hatoo imi nia pedidu sira ba Maromak". Ita tenke fokus ba Maromak nia lia loos atu hamoos ita-nia an hosi prekupasaun mundu nian. Kumu lian hanesan simbulu ba kaer metin ita-nia problema, depois, foti no loke ó-nia liman hodi halo orasaun nu'udar símbolu atu hasai ó-nia todan ba Maromak. 

Filipe 4: 8 hatete "Ikus mai, maun-alin sira, buat hotu nebee tuir lia loos, buat hotu nebee iha onra, buat hotu nebee loos, buat hotu nebee moos, buat hotu nebee furak, buat hotu nebee bele dehan diak, no se iha buat ruma nebee lao diak, no se iha buat ruma nebee bele hahii, hanoin kona ba buat sira nee". Dala ruma fasil atu halo ida ne'e. Maibé iha momentu susar no la iha seguransa, susar liu atu halo ida-ne'e. Ho Maromak nia ajuda, ita bele hili atu hanoin kona-ba buat ne'ebé loos. 

Maromak nia dame maihosi Ninia karakter ne'ebé nunka muda no Maromak Ninia dame la depende ba ita-nia situasaun. Kuandu ita sente laran-susar, biarba ita tau fiar ba Maromak ne'ebé fó dame ne'ebé boot liu fali ita-nia kompriensaun. 

Ohin loron, mai ita Lori ita-nia neon susar ba Maromak liuhosi orasaun no hanoin kona-ba buat ne'ebé loos, furak no moos. Ninia dame sei proteje ita-nia laran no neon. Ne'e mak moris tuir buat ne'ebé Maromak promesa ona.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Hakmatek maski iha laloran boot

Hau koalia buat sira nee ba imi, atu imi bele iha dame iha Hau. Iha mundu nee imi sei hetan susar. Maibee aten brani ba; Hau manaan tiha ona mundu. João 16:33 BK

Iha buat balu ne'ebé la halo ita hakfodak: Tempu malirin no manas Kada tinan. Loro-matan sa'e Kada dadeer. Ita kontinua presiza hahán, bee, anin no deskansa. Mudansa sira ne'e hanesan parte esensiál hosi moris.

Nune'e mós, ita la bele halai sees husi realidade katak ita-nia moris nakonu ho susar. Mundu furak ne'e aat ona ba dadauk. Maski nune'e, Jesus fó esperansa mai ita: 

"Hau koalia buat sira nee ba imi, atu imi bele iha dame iha Hau. Iha mundu nee imi sei hetan susar. Maibee aten brani ba; Hau manaan tiha ona mundu" João 16:33

Saida mak Jesus foin hatete ba ninia dixipulu sira? 

Nia onestu kona-ba sira-nia triste no terus ne'ebé sira hasoru ona, maibé mós ko'alia kona-ba sira-nia ksolok iha futuru ne'ebé sira sei esperiensia. Nia prepara sira-nia laran ba ninia mate no presegisaun ne'ebé sira sei hasoru, maibé mós ba ninia moris-hias no salvasaun. Jesus ninia korajen ba sira, hanesan mós Nia fó korajen mai ita.

Ita labele hakfodak katak mundu ne'e nakonu ho dezafiu sira, maibé Jesus boot liu fali dezafiu sira ne'e hotu. 

Tuir Maromak la automatikamente halakon terus iha mundu - iha loron ida iha futuru sei la iha terus, maibé agora dadauk seidauk. Ita sei nafatin luta ba justisa no buat-aat. Maibé Maromak la husik ita luta mesak. Nia la abandona ita. Ita bele tau fiar ba Nia ho laran tomak bainhira ita hein ba Nia atu fila fali mai ba dala rua. 

Tan ne'e, kuandu ita hanoin kona-ba problema sira iha ita-nia moris, kona-ba ita-nia problema iha saúde, relasaun, osan, ka susar seluk, hanoin ba katak: Ita sei bele iha dame nafatin, ita sei bele iha laran hakmatek, no ita sei bele hetan komfortu tanba Jesus Kristu manán ona mundu ne'e!

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Kbiit hosi hakmatek

“Hakmatek ba, no hatene katak Hau mak Maromak, ema sei foti aas Hau iha nasaun sira nia leet, no sira sei foti aas Hau iha mundu!” Salmu 46:10 BK

Ita okupadu tebes. Entre serbisu iha uma, família no kolega sira, oráriu ne'ebé nakonu no serbisu ne'ebé la iha rohan, halo ita hakarak book an lalais liu iha ita-nia loron sira no ita la para atu hateke ba leten. 

Maibé Maromak ko'alia liuhusi Salmista (ema ne'ebé hakerek salmu) dehan: 

"Hakmatek ba, no hatene katak Hau mak Maromak, ema sei foti aas Hau iha nasaun sira nia leet, no sira sei foti aas Hau iha mundu!” Salmu 46:10

Serake ita hanoin, horbainhira mak Ita ho hakarak rasik hakarak hakmatek (la'ós de'it bainhira Ita toba hela)? Horbainhira mak ita-nia isin no neon hakmatek atu bele rekoñese katak Maromak mak Maromak? 

Karik iha tempu ne'ebé liu ona ita la hakmatek, saida mak ita sei hili ohin loron? Ita bele taka telemovél ida-ne'e, vistu tiha "tempu ho Maromak" no kontinua ho negósiu hanesan baibain. Ou, ita bele husik Maromak nia koñesimentu no lia-loos lori dame ba ita-nia laran ne'ebé la hakmatek.

Iha buat ida kona-ba hakmatek ne'ebé Liu fali saida mak ita komprende. Iha buat seluk Ida kona-ba hakmatek ne'ebé bele hasa'e ita-nia konsiensia kona-ba Maromak no ita-nia presiza ho Maromak.

Iha buat ida kona-ba rekoñese Maromak ho ita-nia liafuan, maibé buat ida seluk mak tau Nia aas liu fali buat di'ak, aat no buat ne'ebé interfere ita-nia moris, hodi moris iha dalan ne'ebé fó glória no hahi'i ba Nia. 

Tempu sei mai bainhira, ita atu prontu ka la prontu, Maromak sei hatudu Ninia an tomak. Tempu sei to'o mai bainhira, atu hakarak ka la hakarak, buat segredu hotu sei lori sai naroman. Tempu sei to'o mai bainhira, gosta ka la gosta, ema sei tane Maromak aas liu iha nasaun sira no Nia sei hetan onra iha mundu tomak. 

Maibé ita la presiza hein tempu ne'e atu to'o mai atu adora Nia. Ita la presiza hein atu bolu Nia nu'udar ita-nia Maromak. Ita la presiza hein atu halo Nia sai Na'i no Liurai ba ita-nia moris. Ita bele hakmatek - agora kedas - no hatene katak Nia mak Maromak.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Oinsá mak ita-nia fraku bele sai forte

Maibee Nai dehan mai hau, “Hau nia grasa nee too ona ba o, tanba Hau nia kbiit sei sai perfeitu iha isin fraku.” Entaun hau kontenti atu gaba aan liu tan kona ba hau nia isin fraku atu Kristu nia kbiit bele hela iha hau. 2 Korinto 12:9 BK

Hanoin to'ok kona-ba situasaun ne'ebé ita hakarak atu muda, no depois hanoin to'ok saida mak apóstolu Paulo hasoru iha 2 Korinto 12. 

Paulo sofre ka terus, no nia husu beibeik ba Maromak atu halakon ninia terus. Maibé Maromak la muda Paulo nia situasaun. Maibé, Maromak hatete ba Paulo katak ninia "grasa ne'e to'o ona" ba nia. 

"Charis" Iha lian-gregu antigu, ba liafuan "grasa" hatudu Maromak nia favor ba humanidade bainhira Nia haruka Jesus mai mundu ba ita. 

Antes Jesus, ema la bele hakbesik ba Maromak rasik. Maibé Jesus loke dalan atu ema hotu bele iha relasaun kle'an ho Maromak. Relasaun ho Maromak la'ós buat ne'ebé ita hetan ho ita-nia esforsu, maibé ida-ne'e mak prezente ne'ebé ita simu bainhira ita simu katak Jesus mate ona no moris hi'as fali husi mate. 

Tan ne'e, kuandu Maromak hatete ba Paulo katak ninia "grasa to'o ona" nia dehan: "Hau (Maromak ) to'o ona ba ó." 

Maromak bele hatán ba Paulo nia presiza tanba Maromak mak nia presiza, no Maromak hamutuk ho Paulo. Influensia ne'ebé Paulo iha ne'e tanba Maromak hili atu hatudu Ninia podér liuhusi Paulo. 

Hanesan Paulo, ita bele gaba an kona-ba ita-nia fraku hodi nune'e Maromak bele hetan gloria ka kréditu ba buat boot hotu ne'ebé akontese ba ita. 

Karik ita-nia situasaun la muda, maibé dala barak ita-nia halerik muda hosi "Maromak favor muda sofrementu ne'e" ba "Maromak, bainhira ha'u hetan sofrementu, hatudu mai ha'u oinsá Ita uza ida-ne'e ba Ita-nia glória no ha'u-nia di'ak." 

Entaun, buat saida de'it ne'ebé ita hasoru, hatene ba katak Maromak besik hela. Nia haree Ita, no nia hadomi Ita. Foti tempu balu ohin loron no husu Maromak atu hatudu oinsá Nia haforsa ita. Hakbesik ba Nia, no husik Nia haforsa ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Laran ne'ebé hakarak tuir Maromak

Haʼu-nia maluk doben, keta halo tuir hahalok neʼebé aat, maibé halo tuir hahalok neʼebé diʼak. Ema neʼebé halo diʼak mai husi Maromak. Ema neʼebé halo aat seidauk koñese Maromak. 3 João 1:11 TMF

Kuandu ita kuda fini masán, ita hein katak ai masán sei moris. Fini no abut sira mak determina tipu ai-huun sira ne'ebé moris iha rai. 

Hanesan ne'e mós, kuandu ita partensi ba Maromak, ita hein katak buat di'ak no hahalok loos sei krese iha ita-nia moris. Ita-nia hahalok mak refleta fini oioin ne'ebé ita kuda ona. 

Dalan ida-ne'ebé ita bele hatene Maromak nia serbisu iha ita-nia moris mak liuhosi haree ai-fuan sira ne'ebé ita prodús. Sinál ida kona-ba moris ne'ebé krese no tuir dalan Maromak nian mak moris ida ne'ebé hakarak halo tuir Maromak nia Liafuan. So ema ne'ebé gasta tempu ho Maromak de'it mak sei prodús hahalok hanesan ne'e iha sira-nia moris. 

Joao fó atensaun mai ita atu hanoin didi'ak kona-ba ai-fuan sira ne'ebé ita prodús iha ita-nia moris. Kuandu ita partensi ba Maromak, no ita gasta tempu ho Nia, ita-nia moris sei naturalmente prodús buat di'ak no moris ne'ebé loos. 

Ninia ojetivu la'os atu orgullu kona-ba hahalok di'ak hira mak ita prodús ona, maibé atu kultiva fuan- laran ne'ebé hakarak halo buat di'ak ba ema seluk hodi Na'i Jesus Nia naran. Ita la'os ema ne'ebé perfeitu, maibé ita-nia laran tenke dezezu atu tuir Maromak.

Foti momentu balu hodi hanoin kona-ba Ita-nia pensamentu no asaun iha semana kotuk. Serake ita-nia hanoin no asaun sira hatudu relasaun ne'ebé besik ba Maromak? Hanoin to'ok kona-ba pasu balu ne'ebé ita bele halo atu kria ritmu ne'ebé regular atu gasta tempu ho Maromak.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Haklaken ba mundu tomak

No Nia dehan ba sira, “Baa mundu tomak, no foo sai evanjelhu ba kriasaun hotu-hotu” Marcos 16:15 BK

Antes Jesus husik hela mundu no sa'e ba lalehan, nia halibur ninia dixipulu sira ne'ebé hamutuk ona ho nia durante tinan tolu nia laran. Bainhira sira tuur haleu meza hodi han, Jesus haruka sira atu kontinua serbisu ne'ebé nia hahú ona. 

Jesus uza maioria hosi ninia Ministériu haklaken kona-ba Maromak nia Ukun ne'ebé mai dadauk. Tan ne'e, responde ne'ebé loos ba Maromak Ninia reiñu ne'ebé to'o mai mak arepende katak fila kotuk ba hahalok-aat no fiar ba Jesus. 

Liafuan primeiru husi Jesus iha Evanjellu Marcos mak iha Marcos 1:15, no liafuan sira-ne'e avizu ka fó sai katak Maromak nia Ukun mai dadauk ona. No Jesus nia liafuan ikus ba ninia dixipulu sira, hahú iha Marcos 16:15, hanesan kontinuasaun hosi anunsiu primeiru ne'ebé nia fó sai ona iha inisiu. Jesus mós husu ita atu kontinua fó sai liafuan di'ak husi Evanjellu. 

Liafuan di'ak ne'e mak Jesus lori Maromak nia Ukun mai iha rai, no liuhusi ninia mate no moris-hias, nia fornese dalan ba ema hotu atu hetan moris foun iha Nia. 

Knaar fó sai kona-ba Jesus, ka atu fó-hatene ema seluk kona-ba Jesus, ne'e mak buat primeiru ne'ebé Jesus husu ba ninia dixipulu sira atu halo bainhira nia husik hela mundu. Ko'alia ba ema seluk kona-ba buat ne'ebé Jesus halo ona ba sira mak buat ne'ebé importante liu hotu ne'ebé ita bele halo ba ita-nia tempu. Ita simu ona prezente ne'ebé boot liu hotu - moris rohan-laek hamutuk ho Maromak. Maibé prezente furak ne'e mós disponivél ba mundu tomak.

Tan ne'e, foti tempu balu ohin loron atu halo orasaun ba sira ne'ebé la hatene esperansa ne'ebé Jesus fo. Halo orasaun atu sira bele hetan salvasaun, halo orasaun mós atu iha oportunidade atu fahe istória fiar nian ba sira. 

Konta historia kona-ba Jesus la signifika katak ita tenke hamriik iha dalan sira hodi hakilar, maibé ne'e katak ita tenke buka atu iha konversa ne'ebé iha valor ho ema seluk kona-ba Jesus. Kuandu ita fó-hatene ema seluk kona-ba moris foun no kona-ba Maromak nia Ukun ne'ebé disponivél ba sira, ita kontinua serbisu ne'ebé Jesus husik hela ba ita atu halo.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Maromak nunka muda

Nai, o nia Maromak, mak iha o nia laran, Nia mak asuwain ida nebee sei salva o; Nia sei sai haksolok kona ba o ho laran kontenti; Nia sei hamaus o ho Ninia domin; Nia sei dansa no kanta makaas kona ba o. Sofonias 3:17 BK

Entre tinan 640 to'o tinan 608 molok Kristu, profeta Sofonias ko'alia ba povu Izrael. Nia fó avizu ba sira kona-ba Maromak nia julgamentu, maibé nia mós fó-hanoin sira kona-ba Maromak nia promesa ba sira-nia futuru. 

 "Nai, o nia Maromak, mak iha o nia laran (iha imi-nia leet), Nia mak asuwain ida nebee sei salva o; Nia sei sai haksolok kona ba o ho laran kontenti; Nia sei hamaus o ho Ninia domin; Nia sei dansa no kanta makaas kona ba o" Sofonias 3:17 BK

Ita la'os ema Izrael iha tinan 640 antes de Kristu, maibé nu'udar ema ne'ebé estuda Maromak nia Liafuan, ita mós bele hetan komfortu husi Sofonias nia liafuan. 

Ita hatene katak Maromak mai iha ita-nia leet liuhusi Jesus no nia fó ninia espíritu ba ita kuandu ita fiar (João 1:14; Galasia 4:6). Ita mós hatene katak Maromak hadomi tebes ita (João 3:16, 1 Joao 4:16). Paulo hanorin katak Maromak nia dame sei guarda ita-nia laran no neon iha Kristu Jesus kuandu ita halo orasaun ba Nia (Filipinas 4: 6-7). 

Tan ne'e, maski ita la'ós profeta Sofonias ninia audensia orijinál, maibé ita bele hetan komfortu tanba ita hatene katak Maromak mak hanesan iha jerasaun hotu. Nia sei iha ita-nia leet, nia sei salva nafatin ema, nia sei haksolok nafatin ho ita, no nia sei taka nafatin Ninia oan sira ho Ninia domin ne'ebé la iha rohan. 

Nia nafatin ita-nia Maromak ne'ebé kbiit boot, no Nia tau matan ba sira ne'ebé mai no bolu Nia. 

Tan ne'e, ohin loron, uza tempu atu fó agradese ba Maromak no refleta Ninia fidelidade no ninia karakter ne'ebé la muda. Tuirmai, lee fali Sofonias 3:17 no ko'alia sai versu ne'e ho lian maka'as ba Ita-nia an no ba Ita-nia família.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Valór ema seluk nian iha tempu susar

Belun ida hadomi nafatin hela deit, no maluk ida moris mai ba tempu susar. Provérbiu 17:17

Mundu ne'ebé hale'u ita koko atu dada ita atu depende-ba ita-nia an rasik de'it, maibé Maromak kria ita atu ita depende ba malu. Ba komunidade. Ba moris ne'ebé la'ós mesak de'it. 

Autór Proverbios hatete nune'e: "Belun ida hadomi nafatin hela deit, no maluk ida moris mai ba tempu susar" Provérbiu 17:17 BK

Ita hotu sei hasoru susar - dalaruma bainhira iha tempu ita la espera. Maski nune'e, belun ida-ne'ebé tau matan didi'ak ba ita iha tempu sira ne'e valor boot tebes, maun-alin sira nia domin ne'ebé inkondisionál ema ida sei labele troka, no viziñu sira-nia ajuda iha tempu susar mak valor boot tebes mós.

Ita presiza malu liu fali buat ne'ebé ita realiza: emosionalmente, pratikamente no espirituálmente.

Se Ita-Boot prekupadu los iha moris, iha ne'ebé ita ita ladún prekupa ho ita-nia kolega di'ak sira, ou karik ita ladún tau matan ba ita-nia familia rasik, agora mak tempu atu prioritiza sira fali.

Karik iha konflitu balu ne'ebé seidauk rezolve ho kolega ka membru familia no Ida ne'e neneik neneik estraga ita-nia relasaun, agora mak tempu atu hasai tiha ita-nia orgullu no restaura fali ita-nia relasaun ho sira. 

Se ita haka'as an atu luta mesak de'it, agora mak tempu atu husik ema seluk ajuda ita. Telefoni ba sira, haruka SMS ba sira, ka vizita sira. Se ita la onestu no vulnerabél sei susar ba ita atu hetan ajuda. 

La'ós de'it ita presiza ema, maibé ema sira-ne'e mós presiza ita.

Ita iha kbiit, prezente, talentu, no personalidade ne'ebé úniku ba ita no fó benefísiu ba ema no ema sira ne'e mós benefisiu hosi ita. Tanbasá mak ita hakoi talenta no rekursu seluk ne'ebé ita iha se buat sira ne'e bele fo benefisiu ba ema seluk? 

Dala ruma ita presiza husu ajuda ba ema no dala ruma ema presiza ajuda hosi ita.

Serake ita presiza ajuda, ka serake ita bele fo ajuda? Serake ita bele ajuda, ka ita iha tempu adisionál, osan, konsellu ka matenek atu fó ba ema? 

Se ita koko atu izola aan, keta haluha katak Maromak kria ita atu moris hamutuk.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

#GodsWord #hopechannel #hopechanneltimorleste #awrtimoleste #RTL#dalanbalalehan.blogspot.com

Read More

Konvite ba deskansa

Tanba ema nebee tama ona ba Maromak nia fatin deskansa mak deskansa ona hosi ninia servisu hanesan Maromak mos deskansa hosi Ninia servisu. Ebreu 4:10

Ita prekupa ba serbisu barak atu sustenta moris. Ita balu hakarak serbisu kontinua no lakoi deskansa. Ita buka dolar liuhosi serbisu to'o dolar didi'ak.

Observa deskansa loron dahitu, loron Sabadu nian, permiti ita tama ba ritmu ne'ebé hanesan ho Maromak estabelese bainhira Nia kria mundu ne'e. Eskritura hatete ba ita katak kuandu Maromak deskansa husi ninia serbisu, ne'e tanba ninia serbisu hotu ona (Jenesis 2: 1).

Jenesis 2:1-3 hatete "Nunee lalehan no rai kompletu ona, ho buat hotu nebee iha laran nee. Iha loron hitu, Maromak nia servisu nebee Nia halo remata ona. Nunee Nia deskansa iha loron hitu hosi Ninia servisu hotu nebee Nia halo ona. Maromak foo bensaun ba loron hitu, Nia halo loron nee santu, tanba iha loron nee Nia deskansa hosi Ninia servisu hotu nebee Nia halo iha kriasaun nee"

Iha Ebreu 4:10, autór hatudu katak Maromak deskansa nune'e ita mós presiza deskansa, nia dehan: "Tanba ema nebee tama ona ba Maromak nia fatin deskansa mak deskansa ona hosi ninia servisu hanesan Maromak mos deskansa hosi Ninia servisu". Maromak konvida ita atu haksolok iha Ninia prezensa no hola parte iha Maromak nia ksolok. 

Deskansa ne'e la'ós kona-ba deskansa hosi serbisu di'ak sira. Maibé ida ne'e kona-ba tau fiar ba Maromak nia serbisu ne'ebé kompletu ona. La iha serbisu di'ak ne'ebé halo ita merese hetan Maromak nia domin. Tamba buat sira-ne'e asegura ona liuhusi Jesus nia serbisu hotu ne'ebé remata ona iha kruz. Bainhira ita tama ba ritmu deskansa nian ne'ebé Maromak haruka, ita bele hetan kontente ba ita-nia moris tomak. 

Maromak bolu ita atu la halo buat hotu mesak de'it, maibé buka dame iha Jesus nia serbisu hotu ne'ebé remata ona iha krús.

Hatun ó-nia todan, la'ós tanba baruk teen maibé submete ka rende an ba Maromak. Fiar katak Maromak ne'ebé kria mundu ne'e mós tau matan ba Ita.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Halo orasaun ba ema ne'ebé halo aat ita

Foo bensaun ba sira nebee foo malisan ba imi, no halo orasaun ba sira nebee koalia aat ba imi. Lucas 6:28

Durante Jesus nia serbisu haklaken, nia kontinua hanorin atu troka pratika komún ne'ebé ema halo. Iha tempu ne'ebá, ulun-nain relijiaun sira la'o dook ona hosi halo tuir Maromak nia ukun-fuan. Jesus nia hanorin ajuda sira atu hanoin fila fali kona-ba Maromak Ninia ukun-fuan, maibé dala barak nia halo ida-ne'e ho dalan ne'ebé halo ema hakfodak. 

Ita barak hanoin katak ita halo serbisu ne'ebé di'ak bainhira ita hadomi ema seluk. Maibé se ita hakarak onestu, maioria hosi ita uza ita-nia tempu hodi hadomi ema ne'ebé hadomi ita. Fasil liu ba ita atu hadomi ema ne'ebé kolega ho ita. Bainhira ita iha fiar malu iha tempu naruk, fasil ba ita atu hadomi. 

Jesus hatete katak hadomi ema ne'ebé hadomi Ita la sufisiente. Iha Lucas 6:28, Nia dezafia ita liutan. Nia hatete katak ita tenke haraik bénsaun ba sira ne'ebé ko'alia aat ita, no ita tenke halo orasaun ba sira ne'ebé halo aat ita. 

Se ema ruma halo ona aat ba Ita, ka ema ruma ko'alia ladi'ak kona-ba Ita, entaun Ita hatene katak susar ba Ita atu hadomi ema sira ne'e. Susar atu hadomi ema ne'ebé la hatudu domin. Maibé Jesus halo ida ne'e duni. Bainhira ita sai ema aat liu, nia hadomi nafatin ita. 

Se ita sente susar atu haraik bénsaun ba ema ne'ebé halo aat ba ita, hahú ho orasaun. Husu Maromak atu halo mamar ita-nia laran liuhosi orasaun. Husu ba Maromak Ninia justisa iha situasaun espesifiku, maibé mós husu atu bele restaura fila fali. 

 Ema hotu ne'ebé eziste mak ema ne'ebé Jesus hakarak hadomi. No kuandu ita haka'as an atu hadomi ema ne'ebé la hatudu domin, ita hatudu Jesus Ninia domin ba ema ne'ebé presiza hadomi. Nu'udar ita halo orasaun ba ema ne'ebé halo sala ba ita, ita mós bele sai hanesan Jesus. 

Foti minutu balu atu halo orasaun agora. Husu Maromak atu ajuda ita haburas domin ba ema ne'ebé hale'u ita. Se iha ema ruma ne'ebé hakanek Ita, husu Maromak atu hahú kura Ita-nia laran. Halo mós orasaun ba ema ne'e. Husu Maromak atu hamutuk ho sira, atu ajuda sira, no atu halo sira-nia laran sai mamar. Obrigadu ba Jesus tanba nia hadomi ita maski ita la hatudu domin ba Nia.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Pasa hosi mate ba moris eterna

Tebes, tebes, Hau dehan ba imi, ema nebee rona Hau nia liafuan, no fiar Ida nebee haruka Hau mai, nia hetan moris rohan laek. Nia sei la hetan kastigu. Nia muda hosi mate ba moris. João 5:24 BK

Liafuan Amen mai husi língua antigu Aramaiku. Lia-fuan ne'e sobrevive iha lian-gregu iha Testamentu foun no mós iha língua modernu sira. Dala barak tradusaun ne'e tradús ho liafuan "tebes" . Hodi uza liafuan ne'e iha fraze nia rohan mak dalan ida atu hatudu lia-loos, ka esperansa. Tan ne'e mak dala barak ita taka orasaun ho liafuan "amen". Maibé, uza deklarasaun ida-ne'e iha inisiu hosi fraze signifika buat ne'ebé totalmente diferente. Iha kultura ne'ebà, Jesus uza "Amen, Amen, Lego hymin... - "tebes, tebes Ha'u hatete ba imi" - signifika nia hatete katak ema ida-idak iha koñesimentu personal absoluta. Ne'e la'ós tamba buat ne'ebé nia aprende ka ema hanorin. Maibé faktu hatudu katak ida ne'e tebes duni. 

Ida-ne'e ligadu ho Jesus nia liafuan iha (João 5:23). Sira ne'ebé simu Kristu, simu ona Maromak. Ne'e katak simu moris rohan-laek. La simu Jesus katak la simu Maromak. Sira ne'ebé la simu Jesus sei hetan julgamentu (João 3:36). Jesus nia kbiit ba moris no mate espirituál prova ona iha parte balu liuhosi Ninia podér ba moris no mate fiziku nian (João 20:30-31). 

Jesus uza liafuan moris rohan-laek iha tempu agora. Ne'e katak ema ne'ebé tau fiar ba Kristu, agora daudauk iha moris rohan-laek. Sira pasa ona "hosi mate ba moris" akontese ona. Deskrisaun pasa hosi mate ba moris so uza iha Testamentu Foun de'it no so uza hosi João iha fatin 2 de'it, ida mak iha João 5:24 no ida seluk mak iha 1 Joao 3:14. "Ita hatene katak ita husik ona mate no agora ita moris, tanba ita hadomi maun-alin sira. Nia nebee la hatudu domin mak hela nafatin iha mate"

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷

Read More