Ita hadomi tanba Maromak hadomi uluk ita. 1 João 4:19 BK
Kada relasaun hotu iha ita-nia moris ne'ebé ita estabelese - família, amizade, ka mós relasaun di'ak ho ema seluk iha igreja - hahú ho ema ida-ne'ebé foti pasu dahuluk.
Domin nunka moris iha izolamentu, maibé domin krexe tanba iha ema ida mak hatudu uluk domin ne'e. Hanesan ne'e mós, domin ba Maromak la'ós buat ne'ebé ita mak hahú.
Eskritura hatete ho klaru: "Ita hadomi tanba Maromak hadomi uluk ita" 1 João 4:19. Maromak Nia domin la'os resposta ida ba ita-nia laran-di'ak. Maibé Maromak Nia domin ne'e mak fonte no fundasaun ba ita-nia moris espirituál tomak.
1. Maromak Nia domin mai uluk (Roma 5:8)
Maromak hadomi ita antes ita hatene Nia, antes ita hili Nia, no maski ita sei sala-na'in hela. Kuandu ita sei dook hosi Maromak, Nia hatudu domin ba ita. Tanba Ninia domin mak mai uluk, ita bele hetan seguransa.
2. Maromak Nia domin transforma ita (2 Korinto 5: 14-15).
Kuandu ema ida hadomi tebes Ita, ida-ne'e muda Ita-nia hahalok. Sa tán, Maromak Ninia domin!
Ninia domin rezulta ba arrependementu, obedese, no dezezu atu buka Maromak. Ita hadomi Maromak la'ós tanba ta'uk, maibé tanba gratidaun, tanba agora ita komprende katak Maromak Nia laran-sadi'a kle'an tebes.
3. Maromak Nia domin hanorin ita atu hadomi ema seluk (1 Joao 4: 11).
Kuandu ita esperiensia Maromak Nia domin, ita bele hadomi ema ne'ebé la merese atu hetan domin, fó perdua ba ema ne'ebé la merese atu hetan perdua, no hatudu laran-di'ak ba ema ne'ebé hakanek ita. Ita mós sai hanesan kanál ba domin ne'ebé salva ita.
Se Maromak hein ita to'o ita sai perfeitu antes nia bele hadomi ita, ita sei la iha esperansa. Tan ne'e, Maromak bolu ita atu hadomi ema seluk ho pasiénsia, laran-sadi'a no laran-di'ak ne'ebé nia hatudu ona mai ita.
Maromak nia domin mak hun ba buat hotu ne'ebé ita halo iha ita-nia vida Kristaun. Ita halo orasaun, serbí, adora, no obedese tanba Nia hadomi uluk ita. Loron-loron, fó hanoin ita-nia an: "Maromak hadomi ha'u." Husik lia-loos ne'e hametin ita-nia fiar, fó komfortu ba ita-nia laran, no dirije ita atu la'o iha dalan ba lalehan.
No hanoin-ba katak dalan ba lalehan hahú hosi simu no hatán ba Maromak nia domin.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment