Hadomi Maromak nia Liafuan

Hau rai O nia liafuan iha hau nia fuan laran,

hodi nunee hau la bele halo sala hasoru O. Salmu 119:11

Kuandu ita hakarak aprende abilidade foun, ita haka'as an atu aprende buat hotu ne'ebé ita bele kona-ba ne'e. 

Artista sira koko sasán no téknika oioin atu hadi'a sira-nia arte. Múzika na'in sira prátika sira-nia múzika, atu bele hanoin no hadi'a knananuk ne'ebé sira aprende daudauk. Arkitektu no enjeñeiru sira hanoin no prátika matemátika avansadu hodi dezeña no harii estrutura seguru sira. 

Ita uza ita-nia tempu no hanoin atu uza buat sira-ne'e ho didi'ak. 

Liurai David hakarak hatene Maromak. Nia hatene katak atu hatene Maromak, nia presiza hatene Maromak nia Liafuan, tanba nia hatene katak Eskritura sei hanetik nia atu la halo sala hasoru Maromak. Nia mós hakerek: 

 "Hau sei medita ba O nia mandamentu sira, no haree tu-tuir O nia dalan sira. Salmu 119:15

Ita mós bele aprende ida-ne'e: se ita hakarak hatene Maromak, hatene Jesus, entaun ita presiza hatene Maromak nia Liafuan. 

Ita mós presiza uza ita-nia tempu atu hatene Maromak nia Liafuan, hanesan ita uza ita-nia hanoin atu estuda istória ka matemátika, ita mós bele uza ita-nia hanoin no tempu atu hatene Maromak nia Liafuan. Ita tenke hanoin kle'an kona-ba Eskritura no hanoin didi'ak kona-ba buat ne'ebé Jesus hanorin ona mai ita. Kuandu ita halo ida-ne'e, ita rai ninia Liafuan furak iha ita-nia laran no ida-ne'e hanetik ita atu la halo sala hasoru Nia. 

Ita bele hatene didi'ak saida mak Maromak hakarak no dezeju liuhusi lee Eskritura. 

Ninia Liafuan fó ita fronteira, matadalan no diresaun. Ninia Liafuan hatudu ninia hakarak no hahalok ka karakter. Ninia Liafuan fó sai ba ita atu hatene se mak Maromak, no ita bele hatán ho haksolok no halo tuir Nia. Entaun ohin ita sei fó ita-nia tempu ba saida? Iha dalan saida de'it mak ita bele rai Maromak nia Liafuan iha ita-nia laran?

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Hadomi malu tebe-tebes ho domin maun-alin

Hadomi malu tebe-tebes ho domin maun-alin nian. Buka uluk atu foo onra ba malu. Roma 12:10

Maromak kria ona ita atu moris iha komunidade. Kuandu Maromak kria ema, nia kria ita no tau ita iha família ne'ebé hadomi ita. Ohin, ita bolu família ne'e nu'udar Igreja. 

Maromak nia intensaun mak ita bele moris iha familia fiar na'in seluk nia laran. Nia lakohi ita atu moris mesak de'it ka haketak an husi ema seluk. Ita moris la'ós atu moris mesak de'it. 

Maski Ita-nia família hasoru susar oioin, maibé Maromak hakarak ninia família atu hadomi no kuida. No iha Roma 12 Paulo hakerek kona-ba karakter ka kualidade hosi Maromak nia família sira. 

Paulo hatete katak ita tenke dedika an ba malu ho domin. Ida-ne'e katak ita tenke la'o hamutuk ho ema seluk liuhusi tempu moris oioin. Ita labele husik ema bainhira sira hasoru susar iha moris. 

Paulo mós fó laran-manas mai ita atu hatudu respeitu ba ema seluk. Duke buka rekoñesimentu, ita tenke fó onra no enkoraja malu. Duke buka buat ne'ebé di'ak liu ba ita, ita tenke buka uluk ema seluk nia di'ak. 

Maibé Jesus hatete katak mundu ne'e sei rekoñese ita nu'udar ninia dixipulu liuhusi dalan ne'ebé ita hadomi. Ida-ne'e katak ita presiza hadomi ema seluk ho loloos, la'ós finji hadomi sira. No fatin ne'ebé ita presiza hatudu respeitu ba Maromak mak iha ita-nia família espirituál nia laran. Duke husik Maromak nia família haketak an tamba foti an, ita-nia hakarak mak atu fó onra ba ema sira ne'ebé hale'u ita. 

Se ita la aprende oinsá atu hadomi ema ne'ebé la'o tuir Jesus, ita sei la hatene oinsá atu hadomi ema ne'ebé la halo tuir Jesus.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Deklara Ninia glória iha nasaun sira nia leet

Deklara Ninia glória iha nasaun sira nia leet,

no Ninia milagre sira iha povu hotu nia leet!

1 Krónikas 16:24 BK 

1 Krónikas 16:24

Livru 1 Cronicas hakerek istória kona-ba Liurai David no Salomão nia ukun. Iha libru ne'e hakerek mós kona-ba genealogy /jerasaun husi Izrael nia suku sira no mós hakerek kona-ba importansia hosi adorasaun no templu iha povu nia moris. 

Versíkulu 1 Cronicas (Tawarikh) 16: 24 mak parte ida husi knananuk hahi'i nian no agradese bainhira transporta Arka Aliansa nian ba Jeruzalein. Liafuan ne'e foka liu ba haklaken Maromak nia glória no hahalok furak sira ba nasaun jentiu sira no mós ba nasaun hotu. Versíkulu ne'e hatudu natureza Maromak nian hanesan Maromak ne'ebé universal no inclusivu ba nasaun hotu no mós responsabilidade atu habelar koñesimentu kona-ba Maromak nia kmanek ba ema hotu. 

Iha versíkulu ida-ne'e ita bele haree kona-ba konseitu kona-ba evangelismu/haklaken. Evanjelismu mak aktu habelar evanjellu kristaun nian ho objetivu atu halo ema seluk sai fiar kristaun. Iha versíkulu ida-ne'e ita bele haree katak hahalok haklaken Maromak nia glória iha nasaun jentiu sira-nia leet no hahalok furak sira-ne'e mak hanesan konvite atu haklaken no fahe koñesimentu kona-ba Maromak ba ema husi dalan moris nian hotu. Ida-ne'e reflete misaun boot ne'ebé Jesus fó iha Testamentu Foun, ne'ebé nia haruka ninia dixipulu sira atu ba halo dixipulu ba nasaun hotu (Mateus 28:18-20). 

Versikulu ne'e mós ko'alia kona-ba konseitu Maromak nia salvasaun ne'ebé inklusivu no universal ba mundu tomak. Ida-ne'e hatudu katak Maromak nia glória no ninia hahalok furak sira la'ós de'it ba grupu ema ka nasaun ida, maibé nia hakarak atu fahe ba ema hotu, maski sira-nia etniku, kultura, ka sosiál la hanesan. Bíblia hatete katak Maromak nia domin no salvasaun disponivel ba ema hotu ne'ebé buka nia, no katak ninia grasa la iha limitasaun ka la iha fronteira. 

Liután ne'e, eskritura ne'e mós hatudu importansia hosi fó sasin kona-ba Maromak nia fidelidade no laran-di'ak. Bainhira ita deklara Maromak ninia glória no hahalok furak sira, ema kristaun la'ós de'it fahe mensajen kona-ba Maromak nia kmanek ba ema seluk, maibé mós atu fó sasin kona-ba Maromak nia kbiit iha ema seluk nia moris rasik. Ida-ne'e hanesan fo korajen ba ema seluk no hatudu impaktu hosi poder transformativu hosi ita-nia relasaun ho Maromak. 

Simbolikamente, aktu deklarasaun Maromak nia glória no hahalok furak sira iha nasaun mós reprezenta mandatu divinu ba fiar-na'in sira atu sai nu'udar embaixador ba Maromak nia reiñu iha mundu. Ida-ne'e hanesan avizu ida kona-ba responsabilidade atu sai naroman iha mundu ne'ebé nakonu ho nakukun laran, no atu ativamente partisipa lori Maromak nia reiñu ba oin liuhosi fahe mensajen esperansa, redensaun, no salvasaun ba ema seluk. 

Ikusmai, 1 Cronicas (Tawarikh) 16: 24 sai nu'udar apelu boot ba ema kristaun atu haklaken Maromak nia evanjelu ba mundu. Versikulu ne'e fo emfaze ba Maromak Nia salvasaun ne'ebé universal no inklusivu, no fo emfaze mós kona-ba importansia hosi evanjelismu no fo sasin kona-ba Maromak Ninia fidelidade. Versikulu Ida ne'e dezafia fiar na'in sira atu habelar Maromak Ninia mensajen domin no redensaun ba ema hotu, no kumpri mandatu divinu atu sai ambassador ba Maromak Nia reiñu iha mundu.

1 Krónikas 16:24

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More