KETA TA'UK

Maibee agora Nai hatete, Nia nebee kria ona o, Oh Jacó, no Nia nebee forma o, Oh Israel, “Keta tauk, tanba Hau hola fali o tiha ona, Hau bolu ona o ho o nia naran. O mak Hau nian.” Isaias 43:1 BK

Iha Isaias 43: 1 Maromak ko'alia ba ninia povu ho mensajen kona-ba esperansa no korajen: 

 "Keta tauk, tanba Hau hola fali o tiha ona, Hau bolu ona o ho o nia naran. O mak Hau nian.” Isaias 43:1 BK

Liafuan sira-ne'e fó-hanoin ita kona-ba ita-nia se no ita ne'e se nian.

Maromak mak ita-nia Kriador no mós ita-nia redentor. Nia mak Ida ne'ebé forma ita, no nia homan ita hamutuk iha ita-nia inan nia knuuk laran (Salmo 139:13), no nia mak Ida ne'ebé fo redensaun ba ita, no Nia lori fali ita ba relasaun di'ak ho Maromak liuhusi Na'i Jesus.

Ita bele hakmatek ho dame hodi hatene katak Maromak iha lalehan la haluha ita no la husik ita, maibé Maromak ne'ebé kria universu hatene no tau matan ba ita. 

Kuandu Maromak hatete: "Keta ta'uk," nia la haluha dezafiu ne'ebé ita hasoru. Nia rekoñese duni ita-nia ta'uk tan ne'e Nia fó komfortu iha Ninia prezensa. Dala barak ita ta'uk tanba ita sente mesamesak ka la iha serteza, maibé Maromak nia promesa ne'e klaru: Nia bolu ona ita-nia naran no ita ne'e mak Maromak nian. Ita mak Maromak nian, maski ita hasoru dezafiu saida de'it. 

Maski ita la'o iha tempu ne'ebé la iha serteza, hasoru susar ka dezafiu ruma, ka lori todan ruma iha ita-nia laran, versikulu ida ne'e konvida ita atu hakmatek iha lia-loos katak ita hetan ona redensaun, Na'i koñese ita no hadomi ita.

Maromak Ninia xamada ne'e sei la nakdoko. Ohin loron, hamriik metin iha promesa ne'e no la'o ba oin ho korajen, tanba ita hatene katak ita nunka mesak tamba Maromak sempre tau matan ba nia.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

KETA HANOIN RESIN KONA BA ITA-NIA MORIS

Nunee Hau dehan ba imi: keta hanoin resin kona ba imi nia moris, atu haan saida ka atu hemu saida; no kona ba imi nia isin lolon, atu hatais saida. Laos imi nia moris iha folin liu fali ai haan, no imi nia isin lolon iha folin liu fali ropa? Mateus 6:25 BK

Tempu hira mak ita gasta ona hodi hanoin kona-ba saida mak ita bele han ka saida mak ita tenke hatais? Serake ita prekupa kona-ba ita-nia moris sufisiente ka lae? 

La sala atu halo planu hahán ba semana sira oin mai ka atu kria orsamentu anuál, maibé Jesus esplika katak hanoin resik la ajuda: 

"Nunee Hau dehan ba imi: keta hanoin resin kona ba imi nia moris, atu haan saida ka atu hemu saida; no kona ba imi nia isin lolon, atu hatais saida. Laos imi nia moris iha folin liu fali ai haan, no imi nia isin lolon iha folin liu fali ropa?" Mateus 6:25 BK

Jesus nunka dehan atu ita lalika hanoin kona-ba buat bazika ne'ebé ita presiza. Maibé Nia hatete katak labele hanoin resik kona-ba ne'e. 

Maromak hatene saida mak ita presiza molok ita husu. Maromak hatene Ita-nia orasaun antes ita husu. 

Rekoñese ita-nia presiza isin nian bele fo hanoin ita kona-ba ita-nia presiza espirituál nian. Maromak konvida ita atu tau fiar ba Nia hanesan fornesedor. 

Tuirmai, iha kapítulu ne'ebé hanesan Mateus 6), Jesus fó-hanoin Ninia dixipulu sira katak se Maromak fornese ba manu fuik no ai-funan sira, Nia sei fornese buat barak liután ba Ninia povu. Tuirmai , Nia hatutan tan: " Maibee buka uluk Maromak nia reinu, no Ninia moris loos; no Nia sei foo tan buat hotu nee ba imi" Mateus 6:33 BK

Moris mak liu fali ai-han ne'ebé ita han, hemu no hatais. Tuir loloos, Jesus mak moris. Nia mak " dalan, lia-loos, no moris" (João 14: 6). 

Entaun, mai ita buka uluk Maromak. Mai ita halo serbisu ne'ebé Maromak fó mai ita, no tau fiar ba Nia atu fó buat ne'ebé ita presiza. No mai ita lalika gasta tempu hanoin resin kona-ba ita-nia moris.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More

Maromak hahú, Maromak sei kompleta

Hau laran metin katak Nia nebee hahuu halo servisu diak iha imi sei halo too kompletu iha Jesus Kristu nia loron. Filipe 1:6 BK

Bainhira apóstolu Paulo ema sulan tiha iha komarka laran tamba haklaken ba ema kona-ba Jesus, nia haruka karta esperansa ida ba ninia kolega sira iha Filipe. Parte balu husi karta ne'e dehan: 

 "Hau laran metin katak Nia nebee hahuu halo servisu diak iha imi sei halo too kompletu iha Jesus Kristu nia loron" Filipe 1:6 BK

Maski apóstolu Paulo hakerek karta ba ema espesífiku sira iha Igreja iha apóstolu sira-nia tempu, maibé ninia liafuan sira-ne'e sei loos nafatin ba Igreja globál ohin loron. 

Hanoin to'ok kona-ba ne'e: Se mak hahú buat ida ne'ebé ita bolu moris? Se mak kria mundu ne'e no buat hotu iha mundu ne'e? Se mak halo universu ne'e? Se mak tau ita-boot iha mundu ne'e - iha tempu ne'ebé loos iha Ita-nia istória? Se mak halo ita-nia isin, ita-nia neon, ita-nia forsa, no ita-nia hahalok úniku sira? Se mak hahú serbisu di'ak ne'e? 

Antes ita moris, Maromak hanoin ona ita. Antes ita bele la'o ka ko'alia, ka iha mehi ba ita-nia an rasik, Maromak iha ona planu. Antes ita hatene atu buka Maromak ka atu la'o tuir Nia ka atu adora Nia, Maromak halo ona serbisu iha ita-nia leet - iha ita, hale'u ita, no liuhusi ita. 

Dala ruma ita sente katak iha ita-nia moris ne'e, ita gasta de'it ita-nia tempu no okupa spasu de'it, la ho objetivu ne'ebé real. Maibé, Maromak Iha intensaun duni kria ita no ita-nia ezistensia la'os eru ida. Liutan ida ne'e... 

Maromak sempre kompleta buat ne'ebé Nia hahú. 

Istória ne'e seidauk remata. Bainhira Kristu fila fali mai ba daruak (João 14:1-3), Maromak nia serbisu liuhusi Ninia povu sei remata.

Maibé molok to'o iha tempu ne'ebá, mai ita haka'as an atu halo Maromak nia serbisu di'ak iha ita-nia laran. 

Mai ita hahi'i nia iha buat hotu ne'ebé ita halo. 

Mai ita fiar katak Nia sei remata buat ne'ebé nia hahú ona.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Read More