No Jesus hatán ba nia, “Marta, Marta, ó preokupa no hanoin resin kona ba buat barak. Maibé ó presiza buat ida de'it. Maria hili tiha ona parte ida ne'ebé di'ak, no ema ida sei la foti ida ne'e hosi nia.” Lucas 10:41-42 BK
Iha Lucas 10:38-42, Jesus ba vizita irman nain-rua, Marta no Maria. Marta prekupa loos, haka'as an atu serbí Jesus ho didi'ak. Maibé, Maria hili atu tuur iha Jesus Nia ain no rona ba Ninia liafuan sira. Marta sai hirus no husu Jesus atu fó-hatene Maria atu ajuda nia. Iha momentu ne'ebá mak Jesus fó sai lia-loos espirituál ida ne'ebé importante.
Jesus hatete: “Marta, Marta, o preokupa no hanoin resin kona ba buat barak. Maibee o presiza buat ida deit. Maria hili tiha ona parte ida nebee diak, no ema ida sei la foti ida nee hosi nia.” Jesus la dehan katak serbí ka serbisu ne'e sala. Duke halo nune'e, nia hanorin katak hakbesik ba Nia tenke sai prioridade liu buat hotu.
Marta nia problema mak la'ós ninia serbisu, maibé ninia prekupasaun barak kona-ba buat ne'ebé nia halo. Nia husik ninia prekupasaun dada nia laran sai husi Jesus. Maria hili "buat ida-ne'ebé presiza" buat ne'e mak tempu hamutuk ho Nai, rona ba Ninia lian, no aprende husi Nia. Desizaun ne'e halo Jesus kontente tanba relasaun espirituál importante liu fali halo atividade sira.
Iha ita-nia moris loroloron nian, dala barak ita hanesan Marta. Ita sibuk ho ita-nia serbisu, família, responsabilidade, no mós atividade igreja nian. Atividade sira-ne'e di'ak, maibé atividade sira ne'e labele troka ita-nia tempu ho Maromak. Kuandu ita haluha atu tuur iha Jesus Nia ain liuhusi orasaun no Ninia Liafuan, ita sai laran-taridu no laran la hakmatek.
Jesus fó-hanoin ita katak, so buat ida de'it mak nesesariu: ne'e mak relasaun privadu ho Maromak. Buat seluk tenke mai depoisde relasaun ho Maromak. Bainhira ita tau uluk Jesus, ita-nia serbisu sei sai haksolok, no ita-nia laran sei hetan dame.
Ohin loron, Jesus konvida ita atu hili buat ne'ebé di'ak liu. Mai ita slow down, rona Ninia Liafuan, no tau Nia iha sentru hosi ita-nia moris. Desizaun loroloron nian ne'e ajuda ita atu fokus nafatin, no la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment