Konformi libru Jénesis, Na'i Maromak kria buat hotuhotu iha loron neen nia laran antes Nia deskansa iha loron dahitu Lee Jénesis 2:1-3)
Maske nune'e, tuir survei ida ne'ebé halo iha tinan 2017 ne'ebé publika iha 2018 hatete katak 70% hosi ema Kristaun ne'ebé ba igreja, kultu iha loron Domingo, uitoan (5%) mak kultu iha loron dahitu ka loron sábadu, loron sexta feira (1%) no Segunda (1%). Restu (23%) la iha loron deskansa ba halo kultu nian (Earls, 2018).
Mai ita haree, evidensia saida mak Bíblia fo mai ita kona-ba loron kultu nian.
Dahuluk mai ita lee iha Ebreu "Assim ainda fica para o povo de Deus um descanso, como o descanso de Deus no sétimo dia.Hebreus 4:9 NTLH"
Tradusaun iha dalen tetun hanesan tuir mai:
*Entaun, sei iha deskansa Sabdu nian ba Maromak nia povu, Ebreu 4:9 BK;
*Neʼe duni, sei iha hela loron deskansa nian ba Maromak nia povu, neʼebé mak loron Sábadu, Ebreu 4:9 TL.
Tuir versikulu iha leten, Na'i Maromak Ninia Lia-fuan dehan sei iha loron Ida, atu Maromak Ninia povu bele halo deskansa sabátiku. Sei iha loron kultu ne'ebé loos, mak loron dahitu la'os loron dahuluk (Domingo)
Maibé ema Balu dehan loron dahitu Ka loron sábadu ne'e Na'i Jesus apaga ona. Ida ne'e ema mak dehan, maibé Na'i Jesus nunka dehan. Saida mak Na'i Jesus dehan mak hanesan tuir mai
*Keta hanoin katak Hau mai atu halakon Lei ka Profeta sira.Hau mai la'os atu halakon, maibee atu kumpri, Mateus 5:17 BK
*Keta hanoin katak haʼu mai atu halakon Ukun-Fuan ka Profeta sira-nia liafuan. Haʼu mai laʼós atu halakon, maibé atu kumpre, Mateus 5:17 TMF
Santifikasaun loron sábadu, hanesan Na'i Maromak Ninia ukun-fuan dahaat (Éxodus 20:8-11). Tuir Mateus 5:17 Na'i Jesus mai atu kumpri la'os atu halakon Na'i Maromak Ninia ukun-fuan.
Hanesan ema Kristaun, ita tenke banati tuir Na'i Jesus. Mai ita haree saida mak Na'i Jesus halo iha loron Sábadu? Tuirmai Jesus bá Nazaré, fatin neʼebé nia sai boot, no hodi tuir ninia toman iha loron Sábadu, nia tama ba sinagoga, no hamriik atu lee, Lukas 4:16. Tuir versu ne'e Na'i Jesus ba sinagoga iha loron Sábadu la'os Domingo.
Hafoin Na'i Jesus moris hi'as,Nia nunka haruka Ninia dixipulu sira atu hanoin no santifika loron Domingo. Ezemplu, Paulo rasik santifika loron Sábadu, hanesan hakerek iha Apostolu 17:2 hanesan tuir mai: "Entaun, tuir Paulo nia toman, nia tama ba sinagoga iha loron Sábadu tolu tuituir malu hodi hanorin sira kona-ba Eskritura". Lee mós iha Apostolu 18:4 "Sábadu-Sábadu nia hatoʼo diskursu iha sinagoga hodi halo ema Judeu no Gregu sira sai fiar-naʼin"
Ita lee iha versikulu sira iha leten, Na'i Jesus no Apostolu Paulo nia toman mak ba reza iha loron dahitu, loron Sábadu. Iha Apostolu 18:4 hatete Kada Sábadu nia ba tama ba uma orasaun nian, la'os Sábadu Ida Ka 2 de'it maibé kada Sábadu.
Pergunta ba ita mak ne'e, seraké ita bele konkorda ba malu atu hili loron ruma atu ita bele reza hamutuk? klaru bele, maibé ida ne'ebé iha podér atu santifika mak Maromak, no Maromak santifika ona loron dahitu, ita iha direitu saida atu muda?
Ita-nia dever hanesan Na'i Maromak Ninia Kriasaun mak obedese. Na'i Maromak mak Kriadór no nia mak manda.
Loron ne'ebé mak Na'i Maromak haruka ita atu hanoin no santifika? Nia resposta mak iha Éxodus 20:8-11
"8 Hanoin no santifika loron Sábadu. 9 Imi tenke halo imi-nia serbisu hotu durante loron neen, 10 maibé loron dahitu mak loron Sábadu ba Na'i, imi-nia Maromak. Imi labele halo serbisu ida, katak imi no imi-nia oan-mane no oan-feto, imi-nia atan-mane no atan-feto, imi-nia animál-hakiak, no mós ema estranjeiru neʼebé hela iha imi-nia sidade laran; 11 Tanba durante loron neen Na'i kria lalehan, rai, tasi no buat hotu neʼebé iha laran, no nia deskansa iha loron dahitu. Tan neʼe mak Na'i haraik bensaun ba loron Sábadu no halo loron neʼe sagradu, Éxodus 20:8-11
Na'i Jesus Ninia liafuan iha João 14:15 dehan "Se imi hadomi haʼu, imi sei halo tuir haʼu-nia ukun-fuan sira"
Igreja balu ne'ebé hanorin ba Ninia sarani sira atu santifika loron Domingo ho razaun tanba Na'i Jesus moris hi'as iha loron Domingo, maibé la iha versikulu ida iha Bíblia mak ko'alia kona-ba mudansa loron kultu nian hosi loron dahitu ba loron dahuluk. Iha Bíblia so ko'alia kona-ba loron Sábadu, loron dahitu.
Agora fila fali ba ita idaidak ninia desizaun. Seraké ita hakarak tuir Na'i Maromak Ninia ukun-fuan ka lae? Iha Apostolu 5: 29 Pedro hatete Ba lideransa Judeu sira nune'e "Pedro no apóstolu sira seluk hatán: “Ami tenke halo tuir Maromak nuʼudar ukun-naʼin duké halo tuir ema"
Kuidadu ho hanorin sira ne'ebé kontrariu ho Na'i Maromak Ninia futar-lia. Bíblia ko'alia nanis ona kona-ba kondisaun hanesan ne'e sei akontese. Mai ita lee 2 Pedro 2:1-3 hanesan tuir mai:
"Maibé hanesan uluk profeta falsu sira mosu iha Maromak nia povu nia leet, nuneʼe mós mestre falsu sira sei mosu iha imi-nia leet. Sira ho subasubar deʼit sei forma grupu oioin hodi estraga imi-nia fiar no sira mós sei nega ida neʼebé sosa ona sira; nuneʼe sira sei halakon lalais sira-nia an. 2 Liután neʼe, ema barak sei halo tuir sira-nia hahalok aat neʼebé sira halo toʼo la sente moe, no ema sei koʼalia aat kona-ba dalan lia-loos nian tanba sira, 3 No mós, sira sei aproveita imi ho kaan-teen liuhusi liafuan bosok. Maibé sira-nia kastigu neʼebé deside nanis ona iha tempu uluk, sei la demora, no sira sei lakon mohu duni"
Kuidadu mós atu interpreta Bíblia liuliu Epistola dixipulu Paulo nian. Relasiona ho Epistola Paulo nian ne'ebé dalaruma susar atu kompriende, Apostolu Pedro fo konsellu hanesan tuir mai ne'e " Tuir loloos, nia hakerek ona kona-ba buat sira-neʼe iha ninia karta hotu. Maibé iha karta sira-neʼe, iha buat balu neʼebé susar atu komprende, no ema neʼebé laran namlele neʼebé la komprende buat sira-neʼe, SIRA BOBAR LIA kona-ba neʼe, hanesan sira mós halo ba Eskritura sira seluk, no neʼe sei halo sira hetan destroisaun"
Tanba iha Bíblia iha Sábadu barak, maibé Sábadu loron dahitu iha Éxodus 20:8-11 ne'e refere ba loron dahitu ne'ebé Na'i Maromak santifika kedas iha jardin Eden. Lee Jénesis 2:1-3. Santifikasaun loron dahuluk, mesmu ema barak mak tuir maibé la iha referensia iha Bíblia.
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
Referensia:
Churchgoer Views and Practice by Aaron Earls 2018. Life way research, accessed on 01-05-21 in https://lifewayresearch.com/2018/12/04/most-churchgoers-see-sunday-as-sabbath/
Bíblia Kadi (BK)
Tradusaun mundu foun (TMF)
Tradusaun libre (TL).
