Moises, atan ne'ebé haraik-an

Liuhusi fiar mak Moisés la simu atu ema bolu nia nuʼudar oan husi Liurai Ejitu nia oan-feto kuandu nia sai boot ona. Nia hili atu hetan terus hamutuk ho Maromak nia povu duké hetan ksolok ba tempu uitoan iha sala laran, tanba nia haree katak moe neʼebé nia hetan nuʼudar Kristu iha folin boot liu fali rikusoin Ejitu nian; basá nia hateke loloos ba kolen neʼebé nia atu simu. Ebreu 11:24-26 TMF

Ebreu 11:24-26 TMF

Moses boot Iha palasiu ida-ne'ebé iha podér boot liu iha mundu antigu - palásiu Farao nian iha rai-Ejitu. Apóstolu 7:22 hatete "No Moisés simu hanorin tuir ema Ejitu sira nia matenek hotu. No nia iha kbiit boot iha liafuan no hahalok" Nia iha priviléjiu, status sosiál aas, rikusoin no oportunidade. Tuir mundu nia standard Moises iha buat hotu ne'ebé nia presiza.

Maski nune'e, Maromak Nia Liafuan iha Ebreu 11: 24-26 hatete buat ne'ebé maraviloza ba ita. Bainhira Moises boot ona, nia lakohi ema bolu nia nu'udar Farao nia oan-feto nia oan-mane. Duke haksolok ho ema Ejitu nia ksolok no rikusoin, nia hili atu moris terus ho Maromak nia povu. Nia valoriza obedese ba Maromak liu fali rikusoin sira iha mundu. 

Desizaun ne'e hatudu katak Moses haraik-an. Maski nia iha edukasaun no influénsia husi liurai Ejitu, maibé nia la kaer metin ba ninia pozisaun. Nia rekoñese katak onra iha mundu ne'e temporariu de'it, maibé Maromak nia rekompensa mak ba nafatin. Moises hateke liu fali rikusoin sira iha rai-Ejitu no hanoin didi'ak kona-ba buat ne'ebé loos liu - mak fiél ba Maromak. 

Maski nune'e, Moises nia moris la perfeitu. Iha livru Exodo 2: 12 ita haree katak nia oho ema Ejitu ida-ne'ebé baku atan Ebreu ida. Hahalok ne'e obriga nia halai husi rai-Ejitu. Ida-ne'e fó-hanoin ita katak Maromak Nia atan sira mós iha frakeza. Maski nune'e, Maromak iha kbiit atu transforma ema ne'ebé prontu atu la'o tuir Nia. 

Liutiha tempu balu, Moises koñesidu kona-ba buat ne'ebé estraordinariu. Livru númeru 12: 3 hatete katak "Moisés mak ema ida nebee haraik aan tebe-tebes no liu fali ema hotu iha mundu laran". Hahalok haraik-an ne'ebe nia iha la'ós buat ne'ebé finje de'it. Maibe ne'e rezultadu hosi laran ne'ebé transforma hosi Maromak iha tinan barak nia laran, hein no serbí Maromak durante tinan barak nia laran. 

Ita aprende hosi Moses katak atu sai boot iha Maromak Nia ukun la mai hosi podér, rikusoin, ka reputasaun. Boot iha Maromak Nia ukun mai husi haraik-an no obedese ba Maromak Nia hanorin. Atan ne'ebé haraik-an prontu atu entrega an ba Maromak, rekoñese sala, no tau fiar ba Maromak Nia promesa sira ne'ebé aas liu fali rekompensa ne'ebé nia bele simu iha mundu ne'e.

Ohin loron, ema barak hakarak hetan rekoñesimentu, susesu, no komfortu. Maibé Moises fó-hanoin ita katak desizaun ne'ebé boot liu mak atu hafolin Maromak liu fali buat hotu. Kuandu ita hili atu fiél ba Maromak liu fali haksolok temporariu iha mundune'e, ita la'o iha dalan haraik-an nian. 

Ikusmai, Moises nia moris hatudu lia-loos ne'ebé boot liu: Maromak fó onra ba sira ne'ebé haraik-an iha Ninia oin. Fé ne'ebé loos la sukat ho rikusoin hira mak ita iha, maibé konformi oinsa ita entrega ita-nia an ba Maromak nia hakarak. 

Ba sira ne'ebé buka Maromak ho laran-moos, dalan haraik-an sei lori ita besik liután ba Maromak ne'ebé sei ajuda ita la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Hatene Ita-nia an

"Maromak, hatudu laran-sadi'a ba ha'u, ema sala-na'in ida!" - Lucas 18:13 

Lucas 18:13 

Jesus konta ai-knanoik ida kona-ba mane nain-rua ne'ebé ba templu hodi halo orasaun. Ida mak ema farizeu, no ida seluk mak ema kobradór impostu. Ema farizeu ne'e ho orgullu ko'alia kona-ba ninia hahalok-di'ak sira no agradese ba Maromak tanba nia la hanesan ho ema seluk. Maibé, kobradór impostu hamriik dook, haraik-an, no husu de'it Maromak nia laran-sadi'a. 

Jesus hatete katak  kobradór impostu ba uma  sai ema loos iha Maromak nia oin duke ema farizeu ne'e. Razaun ne'e  simples: kobradór impostu hatene nia an. Nia rekoñese katak nia pekadór no presiza Maromak nia laran-sadi'a, maibé ema farizeu ne'e hanoin katak nia ema loos ona.

Hatene ita-nia  an ho honestu ne'e  importante  iha  ita-nia relasaun ho Maromak.   Hahalok foti-an halo ema hanoin katak sira di'ak liu fali ema seluk, maibé haraik-an ajuda ita  haree ita-nia kondisaun ne'ebé loos. Jesus mós hanorin hanesan ne'e bainhira nia hatete katak kuandu ita ba festa, ita labele tuur iha fatin ne'ebé aas liu. Duke halo nune'e, ita tenke hili fatin ne'ebé kraik  no husik festa na'in  fó onra ba ita se nia hakarak (Lc 14: 8-10). Ida-ne'e hanorin ita atu hasees an husi foti-an no buka haraik-an. 

Kuandu ita hatene ita-nia fraku no sala sira, ita bele hakbesik ba Maromak ho laran-moos. Bíblia promete katak se ita konfesa ita-nia sala, Maromak sei fó perdua ba ita no hamoos ita husi buat hotu ne'ebé la loos (1 Joao 1:9). Maromak sempre prontu atu fó perdua ba sira ne'ebé ho haraik-an fila fali ba nia. 

Bíblia mós fó korajen  ba ema kristaun atu moris ho haraik-an ba malu. "Maromak kontra ema ne'ebé foti-an, maibé fó laran-sadi'a ba ema ne'ebé haraik-an" (1 Pedro 5:5). Ne'e katak Maromak fó bénsaun ba sira ne'ebé depende ba nia duke sira ne'ebé tau fiar ba sira-nia hahalok-di'ak rasik. 

Hatene ita-nia an bele ajuda ita atu komprende saida  mak ita  presiza hosi Maromak Nia grasa. Kuandu ita hakbesik ba Maromak ho haraik-an, komesa ita-nia sala, no tau fiar ba ninia laran-sadi'a, ita krexe  espiritualmente  no  haburas relasaun ne'ebé kle'an liután ho nia. 

Liuhosi moris  haraik-an no laran-moos iha Maromak nia oin, ita kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube:  Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Foti an

Oinsa ó monu tuun ona hosi lalehan, ... Tanba ó hatete ona iha ó-nia laran: Ha'u sei sa'e ba lalehan... Ha'u sei sai hanesan Maromak ne'ebé Aas Liu Hotu". - Isaias 14: 13-14 

Isaias 14: 13-14 

Foti-an mak hahalok ka atitude ne'ebé perigu liu iha ema nia laran. Iha versíkulu iha leten, profeta Isaias esplika kona-ba Lucifer ne'ebé foti-an no hakarak tau nia an iha Maromak nia leten. Duke satisfaz ho pozisaun ne'ebé Maromak fo ona ba nia, Lucifer hakarak poder, glória no autoridade ne'ebé partensi ba Maromak de'it. Ninia foti-an, rezulta ba kontra hasoru Maromak no ikusmai nia monu. 

Ohin loron, hahalok foti-an sei afeta ema barak. Bíblia fó avizu ba ema fiar-na'in sira atu labele hadomi buat mundu nian - hanesan hakarak isin nian, hakarak matan nian, no hahalok foti-an. Buat sira-ne'e la mai husi Aman, maibé husi mundu, no buat sira-ne'e sei lakon hotu (João 2:15-17). Foti an dala barak lori ema atu hetan podér ka susesu, maibé hahaloj foti an halo sira haluha sira-nia dependensia ba Maromak. 

Jesus hanorin dalan moris ne'ebé diferente. Nia hatete katak domin ba ema seluk mak ukun-fuan ida-ne'ebé boot liu (Marco 12:31). Domin ne'ebé loos la buka atu foti an liu fali ema seluk, maibé tau matan ba sira-nia moris di'ak. Foti-an haketak ema, maibé domin lori haraik-an no unidade. 

Jesus Nia moris mak ezemplu di'ak liu kona-ba haraik-an. Maski Nia iha autoridade divinu, maibé Nia la kaer metin ba Ninia glória iha lalehan, maibé nia haraik-an no halo tuir to'o mate iha kruz. Tanba Ninia haraik-an no obedese, Maromak foti Nia no fó naran ba Nia aas liu fali naran hotu (Filipe 2: 5-11). Kristu Nia moris hatudu katak podér ne'ebé loos hetan liuhosi haraik-an no obedese ba Maromak.

Bíblia mós hanorin katak lideransa iha igreja mak responsabilidade boot ida (1 Timoteo 3: 1). Maski nune'e, sai lideransa labele ho motivu atu foti an ka hakarak foti ita-nia status. Lideransa espirituál tenke gia ho haraik-an, serbí no dedika an ba Maromak.

Ema ne'ebé foti-an buka atu haboot sira-nia an de'it, maibé ema ne'ebé haraik-an serbí Maromak no serbí ema seluk. Kuandu ita halo tuir Kristu Nia ezemplu no proteje ita-nia laran hosi foti-an, ita bele hakbesik liután ba Maromak no refleta Ninia karakter iha ita-nia moris. 

Bainhira ita hili haraik-an liu fali foti-an, ida-ne'e sei ajuda ita fiél nafatin no kontinua la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More