Ha'u mak uvas huun, imi mak sanak sira. Ema neʼebé hela iha Ha'u, no Ha'u iha nia, ema neʼe sei fó fuan barak. Tanba ketak hosi Ha'u, imi la bele halo buat ida. João 15:5 BK
Jesus uza dezeñu ne'ebé simples maibé iha kbiit atu esplika kona-ba moris kristaun nian. Jesus dehan katak Nia mak uvas-hun no Ninia dixipulu sira mak ramu sira. Hanesan ramu sira tenke iha ligasaun ho uvas-hun atu hetan moris no fó fuan, ema kristaun mós tenke iha ligasaun ho Kristu hodi bele iha moris espirituál ne'ebé metin.
Iha João 15: 1-11, Jesus esplika katak Aman Maromak mak toos-nain ne'ebé tau matan ba uvas. Nia aparu ramu sira atu nune'e sira bele krexe di'ak liu no fó fuan barak liután. Nune'e mós, Maromak serbisu iha ita-nia moris atu ajuda ita krexe iha fiar no karakter. Bainhira ita hela iha Kristu, Ninia moris refleta liuhusi ita no ita-nia moris hahú fó fuan espirituál hanesan domin, obedese no fidelidade.
Hela ho Kristu mós katak halo tuir Ninia mandamentu sira. Bíblia hatete katak ita hatudu domin ba Maromak liuhusi halo tuir Ninia mandamentu sira, no Ninia mandamentu sira la todan (1 Joao 5: 3). Kuandu ita hadomi duni Kristu, halo tuir Ninia mandamentu hanesan buat neʼebé halo ita kontente la'os hanesan buat todan ida.
Jesus mós fó konvite ba ema kristaun ida-idak. Nia dehan katak Nia hamriik iha odamatan no dere. Se ema ruma rona Ninia lian no loke odamatan, Nia sei tama no hamutuk ho sira (Apokalipse 3: 20). Ida-ne'e hatudu katak Kristu hakarak atu iha relasaun di'ak no besik ho ita.
Se la ho Kristu, ita labele fó fuan espirituál ne'ebé dura. La ho Maromak, ita-nia forsa, matenek no laran-di'ak la sufisiente. Maibé kuandu ita nafatin iha relasaun di'ak ho Jesus liuhusi fiar, orasaun, no halo tuir nia ukun-fuan sira, Ninia moris sei refleta iha ita-nia moris.
Hela ho Kristu lori moris ne'ebé loos, ksolok, no iha ojetivu moris nian. Bainhira ita iha relasaun di'ak ho Maromak loroloron no husik Ninia liafuan dirije ita-nia moris, ita iha fiar ne'ebé metin liután no kontinua la'o ho laran-metin iha Dalan ba Lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment