Tanba ema ne'ebé foti aan, Nai sei hatuun nia; no ema ne'ebé haraik aan, Nai sei foti aas nia. Lucas 14:11 BK
Jesus hanorin lisaun importante ida kona-ba diferensa entre foti-an no haraik-an. Ema barak naturalmente hakarak hetan onra, respeitu, no tau iha fatin aas liu fali ema seluk. Maibé Jesus esplika katak iha Maromak nia ukun, valór sira ne'e diferente. Ema ne'ebé foti-an sei hatun, maibé ema ne'ebé haraik-an Maromak sei tane aas sira.
Bíblia fó avizu ba ema fiar-na'in sira atu labele hadomi mundu ne'e nia sasán sira. Mundu nia hakarak sira hanesan foti-an, ambisaun ka hanoin an de'it, no dezezu atu hetan rekoñesimentu, la mai husi Maromak no ikusmai sei lakon hotu (1 João 2:15–17). Bainhira ema hanoin de'it kona-ba sira-nia an no sira-nia susesu, dala barak sira haluha katak sira presiza Maromak.
Jesus esplika lisaun ne'e iha istória kona-ba ema farizeu no kobrador impostu. Ema farizeu ne'e ho orgullu ko'alia kona-ba ninia hahalok-di'ak sira, maibé kobradór impostu ho haraik-an husu Maromak Nia laran-sadi'a. Jesus hatete katak kobradór impostu fila ba uma justifikadu ka sai ema loos iha Maromak Nia prezensa (Lukas 18: 9-14). Istória ne'e hatudu katak Maromak hafolin liu ema nia laran ne'ebé haraik-an no laran-moos duke buat ne'ebé haree di'ak hosi li'ur de'it.
Hahalok haraik-an mós envolve rekoñese ita-nia sala no buka Maromak Nia perdaun. Bíblia promete katak se ita konfesa ita-nia sala, Maromak sei fó perdua ba ita no hamoos ita husi buat hotu ne'ebé la loos (1 João 1:9). Ema ne'ebé haraik-an rekoñese sala sira no depende ba Maromak Nia laran-sadi'a.
Moises mak ezemplu ida tan kona-ba ema ne'ebé haraik-an. Maski nia iha oportunidade atu goza rikusoin no kbiit husi rai-Ejitu, maibé nia hili atu hetan terus hamutuk ho Maromak Nia povu duke haksolok temporariu sira (Ebreu 11:24-26). Ninia desizaun hatudu katak nia hafolin liu Maromak Nia promesa sira duke glória mundu nian.
Jesus mak ezemplu boot liu kona-ba haraik-an. Kuandu Jesus Nia dixipulu sira ko'alia kona-ba se mak boot liu iha sira-nia leet, nia esplika katak ida ne'ebé boot liu mak ida ne'ebé serbí ema seluk (Lukas 22:24-27). Apóstolu Paulo mós esplika kona-ba oinsá mak Kristu haraik-an hodi husik glória iha lalehan no sai atan, no mós fó Ninia moris hodi mate iha krús (Filipe 2: 3-8).
Foti-an foka liu ba ita-nia an rasik, maibé haraik-an foka liu ba Maromak no ema seluk. Kuandu ita hili haraik-an, ita permiti Maromak forma ita-nia karakter no dirije ita-nia moris. Bainhira ita halo tuir Kristu Nia ezemplu kona-ba haraik-an, ita kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment