Oinsa ó monu tuun ona hosi lalehan, ... Tanba ó hatete ona iha ó-nia laran: Ha'u sei sa'e ba lalehan... Ha'u sei sai hanesan Maromak ne'ebé Aas Liu Hotu". - Isaias 14: 13-14
Foti-an mak hahalok ka atitude ne'ebé perigu liu iha ema nia laran. Iha versíkulu iha leten, profeta Isaias esplika kona-ba Lucifer ne'ebé foti-an no hakarak tau nia an iha Maromak nia leten. Duke satisfaz ho pozisaun ne'ebé Maromak fo ona ba nia, Lucifer hakarak poder, glória no autoridade ne'ebé partensi ba Maromak de'it. Ninia foti-an, rezulta ba kontra hasoru Maromak no ikusmai nia monu.
Ohin loron, hahalok foti-an sei afeta ema barak. Bíblia fó avizu ba ema fiar-na'in sira atu labele hadomi buat mundu nian - hanesan hakarak isin nian, hakarak matan nian, no hahalok foti-an. Buat sira-ne'e la mai husi Aman, maibé husi mundu, no buat sira-ne'e sei lakon hotu (João 2:15-17). Foti an dala barak lori ema atu hetan podér ka susesu, maibé hahaloj foti an halo sira haluha sira-nia dependensia ba Maromak.
Jesus hanorin dalan moris ne'ebé diferente. Nia hatete katak domin ba ema seluk mak ukun-fuan ida-ne'ebé boot liu (Marco 12:31). Domin ne'ebé loos la buka atu foti an liu fali ema seluk, maibé tau matan ba sira-nia moris di'ak. Foti-an haketak ema, maibé domin lori haraik-an no unidade.
Jesus Nia moris mak ezemplu di'ak liu kona-ba haraik-an. Maski Nia iha autoridade divinu, maibé Nia la kaer metin ba Ninia glória iha lalehan, maibé nia haraik-an no halo tuir to'o mate iha kruz. Tanba Ninia haraik-an no obedese, Maromak foti Nia no fó naran ba Nia aas liu fali naran hotu (Filipe 2: 5-11). Kristu Nia moris hatudu katak podér ne'ebé loos hetan liuhosi haraik-an no obedese ba Maromak.
Bíblia mós hanorin katak lideransa iha igreja mak responsabilidade boot ida (1 Timoteo 3: 1). Maski nune'e, sai lideransa labele ho motivu atu foti an ka hakarak foti ita-nia status. Lideransa espirituál tenke gia ho haraik-an, serbí no dedika an ba Maromak.
Ema ne'ebé foti-an buka atu haboot sira-nia an de'it, maibé ema ne'ebé haraik-an serbí Maromak no serbí ema seluk. Kuandu ita halo tuir Kristu Nia ezemplu no proteje ita-nia laran hosi foti-an, ita bele hakbesik liután ba Maromak no refleta Ninia karakter iha ita-nia moris.
Bainhira ita hili haraik-an liu fali foti-an, ida-ne'e sei ajuda ita fiél nafatin no kontinua la'o iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment