Ema ne'ebé la hatudu domin la koñese Maromak, tanba Maromak mak domin. 1 João 4:8 BK
Bíblia hanorin lia-loos ida-ne'ebé furak liu kona-ba Maromak: Maromak mak domin. Domin la'ós de'it buat ne'ebé Maromak halo, maibé ida-ne'e mak parte husi ninia natureza rasik. Tuir Eskritura, ema ne'ebé hatene duni Maromak sei aprende atu hadomi ema seluk tanba domin mai husi Nia (1 João 4: 7-19).
Husi inisiu kedas, Maromak kria ema tuir Ninia ilas rasik (Genesis 1:27). Ida-ne'e katak Maromak kria ita atu refleta Ninia karakter, inklui mós Ninia domin. Maibé ema barak sente la merese. Figura importante sira iha Biblia mós sente kiik no la vale iha Maromak Nia prezensa. Abrão husu ba Maromak saida mak nia bele hetan tanba nia la iha oan (Genesis 15: 2), no Gideon sente katak ninia família mak fraku liu iha ninia suku (Juiz 6:15). Maibé Maromak nafatin hadomi sira no bolu sira atu halo tuir Ninia hakarak.
Nu'udar ita-nia Kriador no Aman, Maromak merese atu hetan onra no respeitu (Malakia 1:6). Ninia podér boot tebes to'o foho sira nabeen iha Ninia oin (Salmo 97:5). Maski nune'e, Maromak ne'ebé poderozu mós hatudu Ninia domin no kuida ba ita ema maksalak.
Ita bele haree ezemplu ida-ne'ebé klaru kona-ba Maromak Nia domin iha Abrão no Isaac nia istória. Bainhira Abrão besik ona atu sakrifika ninia oan-mane, Isaac, Maromak fornese bibi-malae aman ida hodi troka nia (Genesis 22: 13-14). Eventu ne'e demonstra Maromak Nia domin ne'ebé boot tebes - bainhira Maromak fó Ninia Oan-Mane atu soi mundu.
Bíblia hatete: "Tanba Maromak hadomi tebes mundu to'o nia fó Ninia Oan-Mane mesak" (João 3:16). Kristu mate ba ita kuandu ita sei sala-na'in hela, ida ne'e hatudu katak Maromak hadomi tebes ita (Roma 5:8).
Maibé pekadu bele haketak ema husi Maromak. Bíblia esplika katak la'ós Maromak Nia kbiit mak la to'o, maibé ita-nia sala mak halo bareira entre ita ho Maromak (Isaias 59: 1-2). Tan ne'e mak Maromak haruka Jesus mai atu restaura fali ita-nia relasaun ne'ebé aat ho Nia.
Jesus revela Maromak Nia karakter perfeitamente. Kuandu ema haree Jesus, sira haree ona Aman Nia natureza no domin (João 14:9). Bíblia hatete katak Kristu mak reprezentasaun Maromak ne'ebé loos (Ebreu 1: 3). Liuhusi Jesus Nia moris, mate, no moris-hias, Nia dada ema hotu atu hakbesik ba Nia (João 12: 32).
Domin ne'ebé loos mós deskrebe iha Eskritura. Domin mak pasiénsia, laran-di'ak, la foti-an, no domin nunka falla (1 Korinto 13: 4-8). Ne'e mak domin ne'ebé mai husi Maromak no tenke sai buras iha Ninia povu nia laran.
Kuandu ita komprende katak Maromak mak domin, ita-nia moris komesa muda. Ita aprende atu tau fiar ba Maromak, simu Ninia perdaun, no hatudu Ninia domin ba ema seluk. Bainhira ita krexe liután iha domin ne'e no moris tuir Ninia karakter, ita kontinua la'o ho laran-metin iha Dalan ba Lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment