Saida mak akontese ba avo sira ne'ebé mate la hatene Jesus?

Eskritura xave: Roma 5: 8 

                                  Roma 5: 8 

Maibé Maromak hatudu Ninia domin ba ita ho ida ne'e: Bainhira ita sala nain hela, Kristu mate tanba ita. Roma 5:8

Ita barak husu pergunta difisil: 

"Saida mak akontese ba ita-nia bei'ala sira ne'ebé mate antes sira hatene kona-ba Jesus?" 

Karik ita-nia avo, inan-aman, ka família seluk nunka iha oportunidade atu lee Biblia ka rona ho klaru kona-ba Kristu. Serake Maromak kondena de'it sira tanba sira la hatene Jesus? 

Bíblia fó resposta importante ida: Maromak mak domin, imparsiál, no justu. 

Maromak hatene naroman ka lia-loos saida mak ema ida-idak simu durante sira-nia moris.

Roma 5: 8 hatete katak Maromak Nia domin boot tebes to'o Kristu mate ba ema sala-na'in sira. Maromak Nia salvasaun la limite de'it ba ita-nia família nia background, orijin, língua, ka tempu ne'ebé ita moris mai. 

Bíblia hatete: "La'os Juis ba mundu tomak sei halo loos? Jénesis 18:25

Maromak hatene ema hotu di'ak liu fali ita. Nia hatene buat ne'ebé ita-nia bei'ala sira hatene, buat ne'ebé sira la hatene, oportunidade saida mak sira iha, no buat ne'ebé iha sira-nia laran. 

Jesus hatete katak ema sei simu responsabilidade tuir naroman ne'ebé sira simu (Lucas 12:47-48). Paulo mós esplika katak Maromak bele fó sai Ninia ezisténsia no grasa liuhusi kriasaun no konxiensia (Roma 1: 19-20; 2:14-16). 

Tan ne'e, ita labele julga katak ema ida la hetan salvasaun tan de'it sira la hatene Jesus Nia naran. 

Maibé oinsá mak ema ida bele hetan salvasaun se la iha Kristu? Ida ne'e mós importante. La iha ema ida mak hetan salvasaun see la ho Kristu. 

Jesus mak Salvador mesak de'it (Apos 4: 12). Ninia mate iha kruz mak sai nu'udar baze ba salvasaun ba ema hotu. 

Ema sira ne'ebé moris antes Jesus mai, hetan salvasaun liuhusi tau fiar ba Maromak Nia promesa sira. Abrão mak ezemplu di'ak ida. Nia " fiar Maromak, no ida ne'e konsidera hanesan moris loos" (Roma 4: 3). 

Oinsá ho ema sira ne'ebé hela dook no nunka rona Evanjellu? 

Ita bele fiar katak Maromak sei julga ema ne'e ho justu. Ita la hatene buat hotu ne'ebé Maromak hatene. 

Saida mak akontese bainhira ema ida mate? 

Bíblia hanorin katak ema ne'ebé mate la moris no hela iha fatin ruma. Mate hanesan toba-dukur (João 11: 11-14; Eclesiastes 9:5). 

Akontesimentu boot tuirmai ba sira ne'ebé fiar ba Maromak mak resuresaun ka moris-hias. 

Jesus dehan: "Keta admira kona ba ida nee, tanba oras sei mai bainhira ema hotu ne'ebé iha rate laran sei rona Ninia lian, no sira sei sai mai." João 5:28-29

Tan ne'e, ita la presiza hanoin katak ita-nia bei'ala sira ne'ebé mate ona hetan terus iha fatin ruma ohin loron. Ita bele tau sira iha Maromak Nia liman no tau fiar ba Ninia julgamentu ne'ebé perfeitu. 

Saida mak ita tenke halo ohin loron? 

Duke gasta ita-nia enerjia tomak hodi hanoin kona-ba saida mak akontese ba ema ne'ebé mate ona, ita tenke husu: 

"Saida mak ha'u halo ona ho naroman ne'ebé Maromak fó mai ha'u?" 

Se ita hatene Jesus, la'o tuir Ninia hanorin ohin. Labele hein!

Se Ita seidauk estuda Biblia ho sériu, hahú estuda ohin. Labele hein!

Se iha ema ruma ne'ebé sei moris iha ita-nia família ne'ebé seidauk hatene Jesus nia hanorin, fahe Ninia domin no hanorin lia-loos ba sira. Keta hein!. 

Ita-nia bei'ala sira-nia oportunidade liu tiha ona. Ita-nia oportunidade mak ohin. 

Roma 5: 8 fó esperansa furak mai ita: Maromak hadomi ita kuandu ita sei sala-na'in hela. Nia la hein to'o ita sai ema perfeitu. Nia haruka Kristu mai atu salva ita. 

Tan ne'e ita bele husik ita-nia bei'ala sira iha Maromak ne'ebé domin na'in no justu nia liman. Ita bele fiar katak Juis ba mundu tomak sei sempre halo buat ne'ebé loos. 

Kuandu ita sei moris hela, mai ita simu Maromak Nia domin, la'o tuir Jesus, no ajuda ema seluk atu hatene kona-ba Jesus Ninia hanorin sira.

Pergunta ne'e la'ós de'it: "Saida mak akontese ba sira ne'ebé mate ona?" Pergunta ba ita mak: " Saida mak ha'u sei halo ba Jesus ohin?" 

Kuandu ita tau fiar ba Maromak Nia justisa, simu Kristu nlNia grasa salvasaun, no fahe Ninia domin ba sira ne'ebé sei moris hela, ita kontinua la'o hamutuk ho laran-metin iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Oinsá mak ema sira neʼebé mate iha antigu Testamentu hetan salvasaun?

Eskritura xave: Roma 5: 8 

Maibé Maromak hatudu Ninia domin ba ita ho ida ne'e: Bainhira ita sala na'in hela, Kristu mate tanba ita. Roma 5:8

                                   Roma 5:8

Karik Ita hanoin: "Jesus mate maizumenus tinan 2,000 liubá. Oinsá ho Abrão, Moises, David no ema seluk ne'ebé moris antes Jesus mai? Oinsá mak sira bele hetan salvasaun kuandu Jesus seidauk mate? 

Ne'e mak pergunta importante ida. 

Resposta ne'ebé simples mak: Maromak salva ema iha Testamentu tuan liuhusi Maromak Nia grasa hanesan mós Nia salva ita ohin loron, liuhusi fiar ba Jesus. Maibé ninia diferensa mak: sira haree ba futuru no hein Mesias ne'ebé atu mai, maibé ita haree fali ba kotuk ba Mesias ka Salvador ne'ebé mai ona.  

Sira tau fiar ba Maromak Nia promesa sira.

Husi tempu uluk kedas, Maromak promete katak Salvador ida sei mai. 

Bainhira Adão no Eva monu ba sala, Maromak promete katak ikus mai samea ne'e sei lakon (Genesis 3:15). Liutiha tempu balu, Maromak promete ba Abrão katak liuhusi ninia família "nasaun hotu iha mundu sei hetan bénsaun" (Genesis 22: 18). 

Abrão fiar ba Maromak. Bíblia hatete: 

 "Abrão fiar ba Maromak, no Maromak sura fiar ne'e nu'udar moris loos.” Roma 4:3

Abrão la hatene Jesus Nia naran hanesan ita hatene ohin loron. Nia la haree krús. Maibé nia tau fiar ba Maromak Nia promesa sira. 

Sakrifísiu sira iha Testamentu Antigu mós fó-hanoin kona-ba Jesus Ninia sakrifísiu. Kuandu ema sala-na'in ida lori bibi-malae oan ida hodi halo sakrifísiu, bibi ne'e la kasu nia sala. Ida-ne'e hanesan símbolu ida-ne'ebé hatudu katak Kristu ne'ebé sei mai mate iha kruz hodi kasu sala.

Tuirmai João Batista hatete ba Jesus: 

 “Haree ba, Maromak Nia Bibi Oan neʼebé kasu mundu nia sala!” João 1:29

Sakrifísiu husi Testamentu Antigu mak hanesan sinál trafiku ida iha dalan. Sinál ne'e la'ós destinasaun. Sinal ne'e hatudu fatin ka destinasaun ne'ebé ita atu ba.

Maibé, oinsá ho ema ne'ebé halo sala no mate maibé sira nunka hatene buat hotu kona-ba Maromak nia planu? 

Maromak ne'e justu no hatene ema hotu nia laran. Abrão tau fiar ba buat ne'ebé Maromak promete ona ba nia. Ita responsavel ba naroman no lia-loos ne'ebé Maromak fó mai ita (Deuteronomio 29:29, Roma 2:12-16).

Maromak la salva ema tanba sira komprende detallu hotu kona-ba planu salvasaun nian. Nia salva ema tanba Ninia grasa, ne'ebé ema ida simu liuhusi fiar. 

Grasa ne'ebé hanesan mós disponivél ba ita ohin loron. 

Ita hatene liu fali Abrão. Ita hatene katak Jesus mai ona. Ita hatene katak Nia mate tanba ita-nia sala no moris hi'as fali ona (1 Korinto 15: 3-4). 

Tan ne'e, ita iha razaun ne'ebé di'ak liu atu tau fiar ba Maromak. 

Ohin loron, ida-ne'e signifika saida ba ita? 

Karik Ita hanoin: "Hau halo ona buat-aat barak liu. Maromak labele fó perdua ha'u." Maibé haree fali Roma 5: 8. Kristu mate tanba ita kuandu ita sei sala-na'in hela. 

Jesus la hein ita to'o sai ema di'ak antes Nia hadomi ita. Se ita halo ona sala, mai ba Jesus ohin. Se ó dook ona husi Maromak, fila fali ba Nia. Se Ita hakanek ona ema ruma, husu perdua no halo buat ne'ebé loos. Se Ita sente la merese, hanoin-hetan krús ne'ebé Jesus mate ba. 

Ita-nia salvasaun la depende ba ita-nia di'ak. Ida-ne'e depende ba Maromak Nia domin no depende ba Kristu nia sakrifísiu. Ita nia parte so fiar no obedese ka halo tuir de'it.

Ema sira iha Testamentu Antigu hetan salvasaun liuhosi tau fiar ba Maromak Nia promesa atu salva ema. Ita hetan salvasaun liuhusi tau fiar ba Salvador ne'ebé mai ona. 

Salvador ida de'it. Sakrifísiu ida de'it. Grasa ida de'it. No Salvador ne'e mak Jesus Kristu. 

Bainhira ita tau fiar ba Maromak Nia grasa ne'ebé fo esperansa ba ema hotu, mai ita haree ba Jesus no kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More

Monu ba terus, Nai la husik ita mesak

Ema haleu ami iha sor-sorin, maibé sira la kaer metin ami. Dalan atu sai la iha, maibé ami la lakon esperansa. Ema haterus ami, maibé Maromak la husik ami. Sira riba ami, maibé ami la rahun. 2 Korinto 4:8-9

                           2 Korinto 4:8-9

Paulo hatene saida mak terus. 

Ema hatama nia iha komarka tanba nia haklaken kona-ba Jesus (Efeso 3: 1). Maromak hatete nanis ona ba nia katak nia sei hetan terus tanba ninia serbisu ba Kristu (Apos 9:16). 

Paulo nia moris la fasil. Ema baku nia, rejeita nia, dadur nia, no dala ruma iha perigu mate nian. Maibé nia la rende. 

Tanbasá? Tanba nia hatene katak Maromak la husik nia. 

Paulo hatete katak ema kristaun mak hanesan " sanan rai" - sanan halo hosi rai-mean baibain (2 Korinto 4: 7). Sanan rai-mean la forsa no ladún iha valór boot. Maibé buat ne'ebé folin-boot bele rai hela iha nia laran. 

Paulo dehan katak ita fraku, maibé Maromak poderozu.

Ohin loron, ida-ne'e katak sá ba ita? 

Dala ruma la'o tuir Jesus bele hamosu problema. 

Karik Ita-nia família la komprende kona-ba Ita-nia fiar. 

Karik Ita-nia kolega sira hamnasa Ita tanba Ita lakohi hamutuk ho sira halo buat ruma ne'ebé sala. 

Karik ita lakon oportunidade atu serbisu tanba ita hili onestidade duke bosok. 

Karik ema ko'alia aat kona-ba Ita tanba Ita halo tuir Maromak nia hanorin. 

Karik ita serbí Maromak, maibé ema la hafolin ita-nia serbisu. 

Iha momentu sira hanesan ne'e, hanoin-hetan Paulo nia liafuan: 

"Hetan terus, maibé Maromak la husik hela ami." 

Ema bele rejeita Ita, maibé Maromak sei la abandona Ita. 

Ema bele komprende sala Ita, maibé Maromak hatene Ita-nia laran. 

Karik ita lakon buat ruma tanba ita hili buat ne'ebé loos, maibé ita la lakon Maromak. 

Paulo mós hatudu buat ida ne'ebé importante ba ita: terus la signifika katak Maromak husik hela ita. Paulo hatete: "Ami sempre lori Nai Jesus nia mate iha ami nia isin atu nunee Jesus nia moris bele mosu mai iha ami nia isin." 2 Korinto 4:10

Ita-nia esperiénsia susar sira bele sai oportunidade atu hatudu Jesus Nia karakter. 

Kuandu ema ruma insulta Ita, hatán ho laran-di'ak. 

Kuandu ema ruma hatudu hahalok la loos ba Ita, keta buka atu selu fali. 

Kuandu ema rejeita ita, kontinua halo buat ne'ebé loos. 

Kuandu ita sente kole, halo orasaun no husu Maromak atu fó forsa. 

Kuandu Ita sente mesamesak, hanoin-hetan katak Maromak besik hela ho ita. 

Paulo mós hatudu katak Maromak bele lori ema hamutuk fali iha situasaun susar sira. Onesimus ne'ebé haketak an husi ninia patraun iha tempu balu, sai nu'udar alin doben ida iha Kristu (Filemon 15-16; Koloso 4:9). Paulo mós bolu Onesimus nu'udar Kristu Nia atan no halo orasaun ba ema fiar-na'in sira (Filipe 1: 1-3; Koloso 1: 1-2). 

Mensajen ne'e klaru: 

La'o tuir Jesus, la signifika ita libre hosi problema. Maibé ida-ne'e signifika katak ita sei nunka hasoru problema mesak de'it. 

Karik ema hanehan ita, maibé ita sei la rahun.

Karik sai konfuzaun, maibé Ita la presiza lakon esperansa. 

Ema bele fó terus ba ita, maibé Nai sei la husik ita.

Ita bele monu, maibé Maromak sei foti ita. 

Entaun, buat saida de'it ne'ebé ita hasoru ohin loron, kontinua tau fiar ba Jesus. 

Ita-nia terus la'os rohan ba istoria moris nian. Maromak sei hamutuk nafatin ho ita. 

Kuandu ita mantein fiél bainhira hasoru susar oioin, ita bele kontinua la'o ho fiar iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More