Favór nota katak, la iha dalan ne'ebé sala ka loos liu atu komesa lee Bíblia. Na'i Maromak ko'alia ba ema idaidak hó maneira ne'ebé diferente. Ita libre atu esperimenta kona-ba oinsá lee Eskritura; dalaruma han tempu uitoan atu kompriende maneira ida ne'ebé di'ak liu ba ita.
Tuir mai maneira balu ne'ebé dalaruma bele ajuda lee Na'i Maromak Nia futarlia:
Dahuluk, halo orasaun.
Na'i Maromak hakarak ko'alia hó ita bainhira ita rona Nia. Na'i Maromak dala barak uza Nia futarlia atu fó diresaun ba ita, resposta pergunta balu, no ajuda kompriende Na'i Maromak Nia natureza. Tan ne'e konvida Na'i Maromak antes lee Bíblia no husu ajuda bainhira konfundi kona-ba buat balu. Purezemplu ita bele halo orasaun hanesan tuir mai: Na'i hatudu buat foun ruma hosi Sagrada Bíblia atu hau bele banati tuir ka bele hatete "Ajuda ha'u atu kompriende parte ida ne'e etc.
Daruak, hatene ojetivu.
Na'i Maromak sei hatudu buat balu mai ita liuhosi Espiritu Santu, maibé Na'i Maromak la hatudu buat hotu iha tempu ida de'it. Karik nune'e, la iha buat ida. Ida ne'e la signifika, ita uza maneira ne'ebé sala. Lee Bíblia la'os hanesan ema tau vistu ba lista naruk ne'ebé ita halo, ka halo Na'i Maromak hadomi ita ka atu hetan resposta ba pergunta hotu ne'ebé ita iha, maibé objetivu lee Bíblia mak atu hatene Maromak. Tan ne'e labele tau espetativa ne'ebé barak demais. Hanoin de'it katak atu hatene Na'i Maromak di'ak liu.
Datoluk, prátika iha moris loronloron.
Na'i Maromak la hakarak ita lee de'it ninia futarlia maibé Nia hakarak ita tau iha ita nia asaun. Tan ne'e labele lee de'it, maibé tau atensaun kona-ba oinsá ita bele aplika iha ita nia moris hosi loron ba loron. Biarbá Na'i hatudu Ninia lia loos, grasa, no domin iha Ninia liafuan atu muda ita nia hanoin no sei muda ita nia liafuan, asaun no ita nia relasaun.
Dahaat, fahe Na'i Ninia futarlia ba ema seluk.
Na'i Maromak ko'alia mai ita liuhosi Nia futarlia maibé mós liuhosi Nia ema sira. Tan ne'e Bainhira ita Ko'alia ba ema kona-ba Na'i Maromak Nia futarlia, ita bele mós aprende buat balu ne'ebé ita lahetan ka diskobre bainhira ita estuda mesak.
Igreja ne'ebé loos, nia hanorin tenke bazeia ba Na'i Maromak Nia futarlia hanesan Kristu no Apostolu sira hatudu mai ita. Tan ne'e mai ita banati tuir igreja dahuluk iha inisiu no fahe no ko'alia kona-ba Maromak Nia futarlia ba ema seluk. Karik ita iha pergunta ruma, husu! La presiza halo buat hotu mesak de'it, ema seluk dalaruma bele ajuda ita.
Dalimak, lee Bíblia tuir nia kontestu.
Asegura katak, ita kompriende Na'i Nia futarlia iha nia kontestu.
Lalika lee Bíblia barak ka hotu iha tempu ida de'it. Ita bele komesa hó lee uitoan. Koko purezemplu kapítulu ida kada loron. Di'ak liu lee uitoan maibé kompriende duké barak mas la hatene buat ida.
Saida mak temi iha leten, hanesan ezemplu ba maneira balu atu inisia estuda bíblia rasik. Bainhira estuda bíblia bele mistura maneira sira iha leten. Bele tenta dekór versu balu, rona Bíblia audio etc.
Ksolok ba ema neʼebé la halo tuir ema aat nia konsellu No la hamriik iha ema sala-naʼin sira-nia dalan No la tuur hamutuk ho ema neʼebé hakribi buat neʼebé loos. Maibé nia gosta tebes Na'i nia ukun-fuan. Nia lee no medita Ninia ukun-fuan loron no kalan. Nia sei sai hanesan ai-hun ida neʼebé kuda besik bee-dalan, Ai-hun neʼebé fó fuan tuir ninia tempu, Ninia tahan sira sei la sai namlaek. No nia sei hetan susesu iha buat hotu neʼebé nia halo. Salmo 1:1-3
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| Salmo 1:1-3 |
Amin🙏
ReplyDelete