Iha Aiknanoik ne'e, liurai (ne'ebé reprezenta Aman Maromak) prepara festa no konvida "nia ema sira". Se mak Nia ema sira? Tuir eskritura, Maromak Nia ema sira mak ema Israel. Konsidera versu tuir mai " Tanba imi mak povu neʼebé santu ba Na'i, imi-nia Maromak, no Na'i, imi-nia Maromak, hili ona imi atu sai ninia povu neʼebé espesiál hosi nasaun hotu iha mundu" Deut 7:6.
Iha Aiknanoik ne'e "Nia ema sira" ka ema Israel sira ne'ebé nia konvida la mai (Mateus 22:8), entaun liurai haruka atu ba konvida ema sira iha dalan no fatin seluk (ema la'os Israel, ida nee ema Jentiu sira, inklui ita ema Timor) to'o ikus mai ema nakonu (Mt 22:9-10). Maibé iha problema ida, entre ema sira ne'e ida mak la hatais ropa kazamentu no Liurai haruka sira soe tiha nia ba li'ur (Mt 22:11-13)
Aiknanoik ida ne'e dalaruma bazeia ba kustume Oriental ne'ebé fornese ropa ka hatais ba bainaka sira, ne'ebé sira konvida ba festa. Purezemplu, iha kazu liurai Jehu bainhira nia halibur asembleia boot atu Adora Baal (2Reis 10:22), sira hasai ropa espesiál atu fó ema sira ne'ebé halibur atu hatais.
Sé tuir kustume nee, Hahalok ema ne'ebé "la hatais ropa kazamentu nian" hanesan Hahalok ne'ebé finje lakoi hatais ropa propriu no ida ne'e hanesan insulta ida ba liurai. Nia tama mai hó "ropa ne'ebé fo'er" (Isaiah 64:6) hosi nia moris tuan, la'os ropa mutin atu hasoru festa liurai nian (Ecclesiastes 9:8; Apokalipse 3:4-5) ne'ebé fornese ho gratuita.
Saida mak sintidu hosi "Ropa kazamentu"? Ropa kazamentu mak Kristu Nia loos (Sala la iha) ne'ebé taka ita nia sala.
Ema iha Aiknanoik ne'e nia dala ruma lakoi hatais ropa ne'ebé liurai fornese ona ka nia la prekupa atu troka hó hatais ne'ebé propriu ba okaziaun ne'e. Atu razaun ida ne'ebé de'it mak nia hili, nia hatudu katak nia la respeitu liurai ne'e, Nia oan no bainaka sira seluk. Tan ne'e provoka liurai hirus los.
Analiza eskritura sira (Apokalipse 3:4-5; Apokalipse 3:18; Apokalipse 19:8; 1Pedro 5:5; Isaiah 1:18; Salmo 109:18), kona ba "ropa" ne'ebé ema ne'e hatais hanesan karakter di'ak no aat ema idaidak nian. Tanba ne'e, "ropa kazamentu" iha ne'e la seluk la leet mak “hahalok santu” ne'ebé karik la iha, ita Labele haree Maromak (Ebreu12:14), no karakter ka hahalok santu ida ne'e mak Na'i Jesus prontu atu fó ba sira ne'ebé fiar loloos ba Nia.
Maromak Nia liafuan iha Roma 3:23 hatete katak "Ema hotu monu ona ba sala no lakon ona Maromak Nia Gloria" no Roma 6:23 hatete katak kolen hosi sala mak mate Rohan-laek".
Mai ita husu ita Nia an, iha mundu ne'e se mak sala la iha? Resposta mak "Zero" ka la iha. Tan ne'e ita presiza Na'i Jesus Nia loos, atu nune'e iha Loron julgamentu, Na'i Jesus Nia loos mak sei kobre ita Nia sala. Ita presiza hatais ropa propriu ba kazamentu Maromak nian ne'ebé deskrebe iha Apokalipse 19:7.
Oinsá ita bele hatais ropa kazamentu Maromak nian? Ita bele hatais ropa kazamentu Jesus nian bainhira ita kumpri Nia mandamentu sira hotu no halo Nia sai ita nia salvadór.
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment