Biblikamente, oinsa atu labele halo sala?

Versu prinsipal: Salmu 119:11

                        Salmu 119:11

Hau rai Ó-nia liafuan iha ha'u-nia fuan laran, hodi nune'e hau labele halo sala hasoru Ó. Salmu 119:11

Ita-nia fuan hanesan rai ne’ebé simu fini. Buat ne’ebé ita tau iha fuan-laran sei influensia ita-nia hanoin, liafuan no hahalok. Se ita sempre hanoin buat aat, ita-nia hahalok bele sai aat. Maibé se ita tau Maromak Nia Liafuan iha fuan-laran, Liafuan ne’e bele ajuda ita atu hili dalan loos.

Iha Salmu 119:11, hakerek-na’in dehan katak nia rai Maromak Nia Liafuan iha nia fuan-laran atu labele halo sala hasoru Maromak. Ne’e la signifika katak nia nunka halo sala, maibé nia hakarak Maromak Nia Liafuan sai matadalan ba nia moris.

Tanbasá mak importante atu rai Maromak nia Liafuan iha ita-nia fuan?

1. Atu ita bele reziste tentasaun.

Bainhira ita hasoru tentasaun atu bosok, na’ok, halo violénsia ka halo buat ne’ebé kontra Maromak Nia hakarak, ita presiza lembra Bíblia nia hanorin. Hanesan Jesus bainhira Diabu koko Nia, Jesus uza Eskritura atu hatán no rejeita tentasaun (Mateus 4:1–11).

2. Atu ita halo desizaun ne’ebé loos.

Dala ruma ita tenke hili entre buat ne’ebé fasil no buat ne’ebé loos. Se ita hatene Maromak Nia Liafuan, Nia bele ajuda ita atu hili dalan ne’ebé tuir Maromak Nia hakarak. Ezemplu, iha serbisu fatin, ita bele hili atu ko’alia loos maski ita bele lakon benefísiu ruma.

3. Atu ita ko’alia no trata ema seluk ho di’ak.

Bíblia hanorin ita atu hadomi, perdua, respeita no ajuda ema seluk. Se ita rai hanorin hirak ne’e iha fuan, ita sei aprende atu la responde ho hirus bainhira ema halo ita triste.

Oinsá mak ita bele pratika ida-ne’e?

1. Lee Bíblia loroloron, maski versu ida ka rua de’it.
2. Memoriza versu importante ne’ebé bele ajuda ita iha tempu susar.
3. - Hanoin kona-ba versu ne’ebé ita lee no husu: “Oinsá mak hau bele aplika ida-ne’e ohin?”
4. Bainhira hasoru tentasaun, para uluk no lembra Maromak Nia Liafuan.
5. La rai Liafuan iha memória de’it; aplika nia iha ita-nia hahalok.

Ezemplu simples: Se ita memoriza Filipenses 2:3 kona-ba humildade, bainhira ita iha diskusaun ho kolega ka membru família, ita bele lembra atu rona ema seluk no la hanoin ita-an de’it.

Pergunta ba ita-an: Saida mak ita tau iha ita-nia fuan-laran loroloron? Serake Ita fó tempu atu lee no memoriza Maromak Nia Liafuan, ka ita-nia hanoin nakonu liu ho buat mundu nian?

Liafuan importante: Maromak Nia Liafuan la’ós atu ita lee de’it. Ita tenke rai Nia iha fuan-laran, lembra Nia iha tempu susar, no moris tuir Nia hanorin loroloron. Bainhira ita halo ida-ne’e, Liafuan Maromak nian sei ajuda ita atu hili dalan loos no evita sala atu ita bele nafatin la'o iha dalan ba lalehan.

Orasaun: Aman Maromak, ajuda hau atu hadomi no rai Ita-nia Liafuan iha hau-nia fuan-laran. Bainhira hau hasoru tentasaun, ajuda hau atu lembra Ita-nia hanorin no hili buat ne’ebé loos. Orienta hau-nia hanoin, liafuan no hahalok atu tuir de'it ita boot nia hanorin. Iha jesus nia naran, ha'u harohan. Amen.

🙏 MAROMAK FO BENSAUN🙏🏻

Click iha ne'e  atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏