Jesus promete katak ita ne'ebé fiar ba Nia sei moris fali iha loron Ikus- la'os be kedas lalehan (Lee Evanjellu João 6: 39, 40, 44 no 54). Mai ita esplora.
Ita-hotu loron ida sei mate. Mate hanesan realidade boot ida ne'ebé ita hotu sei hasoru. Maibé novidade di'ak mak ne'e: ita ne'ebé fiar ba Jesus, Nia dehan moris iha mundu ne'e la'os rohan. "Hau mak Paun moris nian nebee tuun mai hosi lalehan. Se ema haan Paun nee, nia sei moris tinan ba tinan. Paun nebee Hau sei foo hodi mundu bele moris mak Hau nia isin.”See-see deit mak haan Hau nia isin no hemu Hau nia raan, nia hetan moris rohan laek. No Hau sei halo nia moris hias iha loron ikus" João 6:51,54
Jesus promete sei halo ita moris fali iha loron ikus (Hanoin ne'e didi'ak, IHA LORON IKUS, LA'OS BA KEDAS KADUNAN SANTU hanesan ema barak fiar) no ita sei moris ba nafatin. Ita bele kaer metin promesa ida ne'e katak ita-nia relasaun ho Jesus sei manan mate.
Iha dimensaun ba moris rohan-laek agora no ba futuru. Sira dehan "Nai, foo nafatin paun nee mai ami.” João 6:34. Jesus dehan ba sira katak sira bele hetan paun ne'e agora kedas 'Jesus dehan ba sira, “Hau mak Paun moris nian. Ema nebee mai ba Hau sei la hamlaha tan. No ema nebee fiar ba Hau sei la hamrook tan" João 6:35 ba oin no iha João 6:50-51 Jesus dehan sei kontinua to'o moris rohan-laek "Maibee Paun ida nee tuun mai hosi lalehan, no ema nebee haan Paun nee sei la mate. 51 Hau mak Paun moris nian nebee tuun mai hosi lalehan. Se ema haan Paun nee, nia sei moris tinan ba tinan. Paun nebee Hau sei foo hodi mundu bele moris mak Hau nia isin"
Mai ita rona ba Jesus Ninia hanorin la'os ema ninia hanorin (Apostolu 5:29). Maromak fó bensaun no tulun ita ba moris rohan-laek 🙏
Ref. Evanjellu João 6:25-59
25 Bainhira sira hetan Nia iha tasi sorin ba, sira dehan ba Nia, “Rabi, bainhira mak O too iha nee?” 26 Jesus hataan ba sira, “Tebes, tebes, Hau dehan ba imi: Imi buka Hau, laos tanba imi haree milagre sira, maibee tanba imi haan paun too bosu. 27 Keta servisu atu hetan hahaan nebee lakon mohu, maibee servisu atu hetan hahaan nebee dura too moris rohan laek. Ema Nia Oan sei foo hahaan nee ba imi. Tanba Aman Maromak tau tiha ona markaf ba Nia.” 28 Depois sira dehan ba Nia, “Saida mak ami tenki halo atu halao Maromak nia servisu?” 29 Jesus hataan ba sira, “Ida nee mak Maromak nia servisu, katak imi fiar ba Ida nebee Nia haruka mai.” 30 Nunee sira dehan ba Jesus, “Entaun sinál saida mak O sei hatudu, hodi ami bele haree no fiar O? O sei halo saida? 31 Ami nia bei-ala sira haan maná iha rai fuik, tuir liafuan nebee hakerek ona, ‘Nia foo paun hosi lalehan ba sira atu haan.’”g 32 Jesus dehan ba sira, “Tebes, tebes, Hau dehan ba imi katak laos Moisés mak foo paun hosi lalehan ba imi, maibee Hau nia Aman mak foo Paun lo-loos hosi lalehan ba imi. 33 Tanba Maromak nia Paun mak Nia nebee tuun mai hosi lalehan, no foo moris ba mundu.” 34 Sira dehan ba Nia, “Nai, foo nafatin paun nee mai ami.”
35 Jesus dehan ba sira, “Hau mak Paun moris nian. Ema nebee mai ba Hau sei la hamlaha tan. No ema nebee fiar ba Hau sei la hamrook tan. 36 Maibee Hau dehan ona ba imi, katak imi haree ona Hau, maibee imi la fiar. 37 Ema hotu nebee Aman foo mai Hau, sei mai iha Hau. No nia nebee mai iha Hau, Hau sei la duni sai. 38 Tanba Hau tuun mai hosi lalehan, laos atu halo tuir Hau nia hakarak, maibee atu halo tuir hakarak hosi Ida nebee haruka Hau mai. 39 Ida nebee haruka Hau mai, Ninia hakarak mak nee: katak Hau sei la lakon ema ida hosi ema hotu nebee Nia foo mai Hau, maibee Hau sei halo sira moris hias iha loron ikus. 40 Tanba nee mak Hau nia Aman nia hakarak: katak ema hotu nebee haree Oan Mane no fiar ba Nia, sei hetan moris rohan laek. No Hau sei halo nia moris hias iha loron ikus.
41 Entaun ema Judeu sira murmura kona ba Jesus, tanba Nia dehan, “Hau mak Paun nebee tuun mai hosi lalehan.” 42 No sira dehan, “Laos katak Nia mak Jesus, José nia Oan Mane? Laos katak ami konhese Ninia inan-aman? Nusaa mak agora Nia dehan, ‘Hau tuun mai hosi lalehan?’” 43 Jesus hataan ba sira, “Keta murmura ba malu. 44 La iha ema ida bele mai iha Hau, só deit Aman, nebee haruka ona Hau, mak dada nia. No Hau sei halo nia moris hias iha loron ikus. 45 Profeta sira hakerek nanis ona, ‘Maromak sei hanorin sira hotu.’h Ema hotu nebee rona no aprende tiha hosi Aman, sei mai iha Hau. 46 La iha ema ida nebee haree ona Aman, só deit Nia nebee mai hosi Maromak; Nia mak haree ona Aman. 47 Tebes, tebes, Hau dehan ba imi, ema nebee fiar mak hetan moris rohan laek. 48 Hau mak Paun moris nian. 49 Imi nia bei-ala sira haan maná iha rai fuik, no sira mate ona. 50 Maibee Paun ida nee tuun mai hosi lalehan, no ema nebee haan Paun nee sei la mate. 51 Hau mak Paun moris nian nebee tuun mai hosi lalehan. Se ema haan Paun nee, nia sei moris tinan ba tinan. Paun nebee Hau sei foo hodi mundu bele moris mak Hau nia isin.”
52 Nunee ema Judeu sira haksesuk malu no dehan, “Oinsaa mak Ema nee bele foo Ninia isin mai ita atu haan?” 53 Jesus dehan ba sira, “Tebes, tebes, Hau dehan ba imi, se imi la haan Ema Nia Oan nia isin, no la hemu Ninia raan, imi la iha moris iha imi nia laran. 54 See-see deit mak haan Hau nia isin no hemu Hau nia raan, nia hetan moris rohan laek. No Hau sei halo nia moris hias iha loron ikus. 55 Tanba Hau nia isin mak ai haan lo-loos, no Hau nia raan mak hemu lo-loos. 56 Ema nebee haan Hau nia isin, no hemu Hau nia raan, nia mak hela iha Hau, no Hau hela iha nia. 57 Hanesan Aman nebee moris mak haruka Hau mai, no Hau moris tanba Aman, nunee mos ema nebee haan Hau, sei moris tanba Hau. 58 Ida nee mak Paun nebee tuun mai hosi lalehan. No Paun nee la hanesan paun nebee imi nia bei-ala sira haan no depois sira mate. Tanba ema nebee haan hosi Paun nee sei moris tinan ba tinan.” 59 Jesus dehan buat sira nee iha sinagoga, bainhira Nia hanorin iha Kafarnaum.
