Eskritura prinsipál: 1 Korinto 6: 18-7: 9
Halai hosi sala seksuál. Sala seluk hotu ne'ebé ema halo mak iha isin liur. Maibé nia ne'ebé halo sala seksuál mak halo sala hasoru Ninia isin rasik. 1 Korinto 6:18 BK
Bíblia fó mandamentu ne'ebé klaru: "Halai hosi sala seksuál" 1 Korinto 6:18. Paulo la hatete: "luta ho sala seksuál," ka " halimar ho sala seksuál." Nia hatete: "Halai husi sala seksuál!"
Tanbasá? Tanba sala seksuál mak iha kbiit boot tebes. Se ita hanoin katak ita iha forsa atu halimar ho tentasaun, ita sei fasilmente monu. Bíblia fó avizu: "Nune'e ema ne'ebé hanoin katak nia hamriik hela, nia tenki kuidadu katak nia la monu." 1 Korinto 10:12
Paulo fó dalan oioin atu halai husi sala seksuál.
Ulukliu, hanoin-ba katak Ita-nia isin mak Maromak nian. "Imi hatene ka lae katak imi-nia isin lolon mak templu ba Espíritu Santu ne'ebé iha imi-nia laran? Imi simu ona Espíritu ne'e hosi Maromak. Imi la'os imi nian." 1 Korinto 6:19. Jesus selu folin-boot atu salva ita. Tanba ita mak Maromak Nian, uza ita-nia isin atu fó glória ba Maromak, la'ós atu uza ba ba pekadu (1 Korinto 6:20).
Segundu, hasees an husi tentasaun. Keta haree buat ruma, lee buat ruma, ka vizita fatin ne'ebé nakonu ho hanoin sala-na'in. Jesus hatete katak sala dala barak hahú hosi ita-nia laran no matan (Mateus 5:27-28). Di'ak liu atu hasees an husi tentasaun duke halai-sai husi tentasaun ne'e.
Terseiru, se Ita kaben ona, fiél ba Ita-nia la'en ka feen. Iha 1 Korinto 7: 1-5, Paulo hanorin la'en no feen sira atu hadomi, respeitu no tau matan ba malu. Kaben-na'in ne'ebé di'ak no fiél bele proteje la'en no feen husi tentasaun.
Ba dala haat, se Ita boot seidauk kaben, uza tempu ne'e atu hakbesik liután ba Maromak. Paulo hatete katak ema ne'ebé la kaben bele hetan bénsaun kuandu sira moris hodi kontrola an no dedika an ba Nai (1 Korinto 7: 7-9). Atu kaben na'in ka lae, Maromak fó forsa atu iha moris ne'ebé moos hosi sala seksuál.
Liu-liu, hakbesik nafatin ba Jesus. Halo orasaun loroloron. Lee Biblia loroloron. Husu Espíritu Santu atu proteje ita-nia laran no neon. Kuandu tentasaun mosu, hanoin-hetan Jose iha Ejitu. Nia la hein no kontinua diskute kona-ba tentasaun, maibé nia halai tiha (Genesis 39:12).
Ohin loron, husu ba ita-nia an: "Serake hau halai husi sala seksuál ka ha'u hakbesik liután ba sala ne'e?" Keta hein to'o tentasaun sai forte liután. Halai ba Jesus. Nia bele fó vitória ba ita.
Bainhira ita fó onra ba Maromak ho ita-nia isin no hakbesik nafatin ba Kristu, ita sei moris ho moris ne'ebé moos no fó glória ba Nia.
Kuandu ita halai husi sala no la'o tuir Jesus loroloron, ita kontinua la'o ho seguru iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment