Ha'u la husu katak Ó hasai sira hosi mundu, maibé katak Ó proteje sira hosi aat nain. Sira la'os hosi mundu, hanesan Ha'u mós la'os hosi mundu. Halo sira santu liu hosi lia loos. Ó-nia liafuan mak lia loos. João 17:15-17 BK
Jesus halo orasaun ba Ninia dixipulu sira. Nia la husu Ninia Aman atu lori sira sai husi mundu. Maibé, nia harohan katak Maromak sei proteje sira husi buat-aat. Ita moris iha mundu ne'e, maibé ita labele moris hanesan mundu ne'e.
Ida-ne'e la fasil. Loron-loron ideia no hanoin ne'ebé sala hale'u ita. Ita haree ideia aat no buat aat oinoin sira iha televizaun, média sosiál, internét, eskola, serbisu, no dala ruma mós iha igreja.
Bíblia fó avizu mai ita: "Keta hadomi mundu, ka buat sira ne'ebé iha mundu. Se ema hadomi mundu, domin ba Aman la hela iha ema nia laran n'ee." 1 João 2:15. Bíblia mós hatete katak mundu ne'e nakonu ho hakarak isin nian, hakarak matan nian, no hakarak moris nian ne'ebé foti-an (1 João 2:16).
Ida-ne'e katak sá?
Hakarak isin nian mak hakarak pekadu nian. Ema hakarak halo sira-nia an kontente duke halo tuir Maromak.
Matan nia dezezu, halo ema sempre hakarak buat barak liután: hakarak osan barak liután, sasaan barak liután, no haksolok barak liután. Sira nunka satisfaz ka kontente ho buat ne'ebé sira iha.
Moris ne'ebé foti an, halo ema hanoin katak sira mak di'ak liu fali ema seluk. Sira hakarak no buka atu ema gaba sira, buka podér, buka popularidade duke fó glória ba Maromak.
Infelizmente, buat sira-ne'e mós bele tama ba igreja. Ema kristaun balu hanoin liu kona-ba osan duke serbí Maromak. Ema balu uza tempu barak liu iha média sosiál duke lee Biblia. Ema balu hakarak hetan pozisaun aas duke servisu ho haraik-an. Sira seluk tan halo tuir ema nia ideia, ema-nia hanorin liu fali Maromak nia Liafuan.
Oinsá mak ita bele evita hahalok mundu ne'e nian?
Jesus fó resposta ba pergunta ne'e. Nia halo orasaun hodi dehan: "Halo sira santu liu hosi lia loos. Ó-nia liafuan mak lia loos." João 17:17. Kuandu ita lee Biblia loroloron, halo orasaun, no hakbesik nafatin ba Jesus, Nia muda ita-nia laran. Espíritu santu fó forsa mai ita atu hatete "Lae" ba sala no " Loos" ba Maromak Nia hakarak.
Ohin loron, husu ba ita-nia an: "Hosi loron ba loron, serake ita sai hanesan Jesus liután ka hanesan mundu ne'e?" Keta husik mundu muda ita-nia hanoin. Husik Maromak Nia Liafuan muda Ita-nia moris.
Mundu ne'e sei lakon, maibé sira ne'ebé halo tuir Maromak Nia hakarak sei hetan moris rohan-laek (1 João 2:17).
Bainhira ita hili Maromak Nia lia-loos duke halo tuir mundu nia dalan, ita kontinua la'o ho laran-metin iha dalan ba lalehan.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment