Maromak hatudu no fakar sai ninia domin

Reflesaun Roma 4:16-5:11 

Serake ita fiar duni katak Maromak hadomi tebes ita? Maromak nia domin sei nunka husik ita, no nia sei nunka para atu hadomi ita. Ninia domin ba ita boot liu fali ita-nia sala sira no nia hakarak ita simu ninia domin liuhusi fiar/fé. 

La hanesan ho ema barak nia hanoin, Maromak hadomi ita no hakarak fó moris ba ita. Nia fó moris ba ema mate (Roma 4:17). Maromak fó moris-hias ba Jesus husi mate. Loron ida ema hotu ne'ebé mate ona, iha Kristu, sei hetan moris-hias. Iha tempu ne'ebá, Jesus hatete katak nia mai atu nune'e ita bele hetan moris, no moris to'o nakonu resin (João 10: 10). 

Paulo kontinua esplika kona-ba Abrão nia fiar. Abrão fiar ba Maromak Ninia promete katak nia no Sara sei iha oan, maski ida-ne'e imposivél ba ema. 

Ita aprende kona-ba Abrão "Nia la lakon fiar ho laran ru-rua kona ba Maromak nia promesa, maibee nia fiar metin no foo glória ba Maromak. Abrão laran metin katak Maromak bele halo tuir duni buat nebee Nia promete ona. Roma 4:20-21 BK

Maibé Paulo hatete katak justifikasaun liuhosi fé la'os de'it ba Abrão, "maibee liafuan nee hakerek ba ita mós. Maromak sei sura ida nee ba ita nebee fiar ba Nia nebee halo Nai Jesus moris hias ona hosi mate. Roma 4:24 BK. Ita mos justifikadu ka sai ema loos iha Maromak Ninia oin "Maromak entrega Jesus tanba ita nia sala sira, no Nia moris hias ona hodi ita bele sai ema loos" Roma 4:25 BK

Paulo kontinua ko'alia kona-ba konsekuénsia husi faktu ne'e. "Nee duni tanba ita sai loos ona liu hosi fiar, ita iha dame ho Maromak liu hosi ita nia Nai Jesus Kristu. Liu hosi Nia ita iha mos dalan atu tama ba grasa, nebee agora ita hamriik hela tanba ita fiar. No ita haksolok iha esperansa ba Maromak nia glória, Roma 5:1-2. Ita bele hakbesik no ko'alia kada loron ba Maromak no la iha tan bareira entre ita ho Maromak.

No la'os nee deit, maibee ita haksolok iha tempu terus, Roma 5:3. Ita bele haksolok ho ita-nia terus sira: "Tanba ita hatene katak tempu terus foo pasiénsia, no pasiénsia prova ita nia karakter, no karakter nee foo esperansa. No esperansa la halo ita moe, tanba Maromak fakar tiha Ninia domin ba ita nia fuan laran liu hosi Espíritu Santu nebee Nia foo ona ba ita". Roma 5:3-5

Maromak nia domin halo ita-nia laran sai nakonu. Esperiensia kona-ba Maromak nia domin mak buat ne'ebé kle'an tebes. Espíritu santu mak serbisu beibeik atu ajuda ita sente Maromak nia domin. Se imi nunka hetan esperiénsia husi espíritu santu ne'ebé hakonu imi-nia laran, ha'u enkoraje imi atu husu Maromak atu hakonu imi agora. 

Paulo hatete tan kona-ba Maromak nia domin. Nia dehan katak maski ita kontra Nia, Nia haruka Jesus mai mate ba ita. "Maibee Maromak hatudu Ninia domin ba ita ho ida nee: Bainhira ita sala nain hela, Kristu mate tanba ita, Roma 5:8

Liuhosi dalan ne'e mak ita hatene katak Maromak hadomi ita. Aman husik ninia Oan-Mane mesak no haruka nia ba mate iha krús. Maski ita la merese atu simu ne'e, tamba ita mak ema sala-na'in, maibé Jesus mate tanba ita. Maromak la salva ninia oan rasik. Nia hadomi tebes Ita. 

Se Maromak hadomi tebes Ita, Ita bele fiar katak Ita-nia futuru sei sai seguru. "Tanba se bainhira ita mak inimigu hela, ita konsege dame malu ho Maromak liu hosi Ninia Oan Mane nebee mate, oinsaa liu tan, bainhira ita dame malu ona, ita bele hetan salvasaun liu hosi Ninia moris, Roma 5:10 

Nai, obrigadu ba Ita-Boot tanba Ita hadomi tebes ha'u to'o Ita mate tanba ha'u. Ha'u husu atu Na'i fakar ita-nia domin ba ha'u-nia laran liuhusi espíritu santu, no ajuda ha'u atu sente ita-nia domin ne'ebé kle'an ba ha'u.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

🪷🪷🪷🪷🪷🪷🪷🪷🪷🪷🪷

Referensia, Roma 4:16-5:11

Roma 4:16-25

16 Tanba nee promesa depende ba fiar, atu nunee promesa bele mai liu hosi grasa. No bei-oan hotu bele simu promesa nee - laos deit sira nebee halo tuir lei maibee sira mos nebee lao tuir Abraão nia fiar. Nia mak aman ba ita hotu.

17 Hanesan ema hakerek nanis ona, “Hau halo o sai aman ba nasaun barak.” Abraão fiar ba Maromak nebee halo ema mate sai moris fali no bolu buat nebee la iha atu mosu mai.

18 Maski esperansa la iha, Abraão iha esperansa atu fiar katak nia sei sai aman ba nasaun barak. Tanba Maromak foo hatene ba nia, “O nia bei-oan sira sei sai hanesan nee.”

19 Nia la sai fraku iha ninia fiar bainhira nia hanoin ninia isin rasik, nebee hanesan mate ona (tanba nia maizoumenus tinan atus ida), no mos bainhira nia hanoin Sara nia oan fatin nebee la bele hetan oan.

20 Nia la lakon fiar ho laran ru-rua kona ba Maromak nia promesa, maibee nia fiar metin no foo glória ba Maromak.

21 Abraão laran metin katak Maromak bele halo tuir duni buat nebee Nia promete ona.

22 Tanba nee mak Maromak sura Abraão nia fiar nudar moris loos.

23 Liafuan nebee hakerek, “sura ba nia”, la hakerek ba nia deit.

24 Maibee liafuan nee hakerek ba ita mos. Maromak sei sura ida nee ba ita nebee fiar ba Nia nebee halo Nai Jesus moris hias ona hosi mate.

25 Maromak entrega Jesus tanba ita nia sala sira, no Nia moris hias ona hodi ita bele sai ema loos.

Roma 5:1-11

1 Nee duni tanba ita sai loos ona liu hosi fiar, ita iha dame ho Maromak liu hosi ita nia Nai Jesus Kristu.

2 Liu hosi Nia ita iha mos dalan atu tama ba grasa, nebee agora ita hamriik hela tanba ita fiar. No ita haksolok iha esperansa ba Maromak nia glória.

3 No laos nee deit, maibee ita haksolok iha tempu terus. Tanba ita hatene katak tempu terus foo pasiénsia,

4 no pasiénsia prova ita nia karakter, no karakter nee foo esperansa.

5 No esperansa la halo ita moe, tanba Maromak fakar tiha Ninia domin ba ita nia fuan laran liu hosi Espíritu Santu nebee Nia foo ona ba ita.

6 Tanba bainhira ita sei fraku hela, no tempu too ona, Kristu mate tanba sira nebee la hamtauk Maromak.

7 Susar atu hetan ema nebee prontu atu mate tanba ema moris loos, maibee karik ema ida bele brani atu mate tanba ema diak.

8 Maibee Maromak hatudu Ninia domin ba ita ho ida nee: Bainhira ita sala nain hela, Kristu mate tanba ita.

Read More

Dalan ba Eskritura

Depois Filipe loke ninia ibun, no hahuu hosi eskritura nee, nia foo sai evanjelhu kona ba Jesus ba ema Etiópia nee. Apostolu 8:35

Kuandu ita loke Maromak Nia Liafuan, ita kaer Tezouru/rikusoin ida iha ita-nia liman. 

Eskritura lidera ona Maromak nia povu ba jerasaun oioin - halo transformasaun no influensia ba moris ema barak nian/inkontavél, iha tempu oinoin, no hosi kultura oioin. Maromak nia Liafuan mak tezouru ida, ne'e mak tezouru ne'ebé iha ita-nia liman. 

Dala ruma, Maromak nia Liafuan bele hamosu dezafiu balu. Oinsá mak ita bele komprende istória iha ninia kontekstu no hanorin oioin iha Maromak nia Liafuan? 

"Depois Filipe loke ninia ibun, no hahuu hosi eskritura nee, nia foo sai evanjelhu kona ba Jesus ba ema Etiópia nee" Apostolu 8:35

Iha Apostolu 8, Filipe, mak ema ne'ebé tuir Jesus, nia enkontra funsionáriu importante ida husi rai-Etiopia ne'ebé lee livru Isaias, maibé nia la komprende. Philip ajuda nia atu komprende eskritura ne'ebé nia lee daudauk (Isaias 53: 7-8) ne'ebé ko'alia kona-ba Jesus no nia mate tanba ema hotu nia sala. Philip fahe Evanjellu ho mane ne'e hodi hatudu ba nia oinsá profesia sira iha tempu uluk hatudu ba Mesias, Jesus, no buat hotu ne'ebé nia sei halo atu halo salvasaun no redensaun ba ema. 

Philip hatudu ba nia katak husi livru lei sira to'o profeta sira, eskritura hotu hatudu sai kona-ba ita-nia Salvador. Ema Etiopia ne'e la komprende buat ne'ebé nia lee daudauk, no Maromak uza ida-ne'e nu'udar oportunidade atu loke ninia matan ba Evanjellu. 

Bainhira ita lee Biblia, husu ba ita-nia an: Hau komprende saida mak ha'u lee daudauk? 

Bainhira mane ne'e loke ninia an atu komprende Eskritura, nia hasoru Jesus no ninia domin. Nia tau fiar ba Nia ho ninia laran tomak, no ninia espíritu transforma ba eternidade.

Ita mós bele hetan transformasaun iha ita-nia moris. Favor hanoin katak: 

 1. Bíblia konta istória kona-ba salvasaun liuhusi Jesus no livru ida-idak husi Biblia hatudu dalan ba Jesus;

 2. Jesus moris no fiél atu hatudu ninia an ba ema nia laran. 

 3. Ita la mesak de'it iha ita-nia viajen Biblia nian. Hanesan Maromak haruka Filipe atu hanorin ema husi rai-Etiopia, nia mós dala barak uza ema sira ne'ebé hale'u ita atu ita aprende hosi sira. 

Ohin loron, haka'as an atu hanoin kle'an kona-ba eskritura. Bainhira ita halo ne'e, buka Jesus iha eskritura laran. Husu ba Maromak saida mak Biblia hatete kona-ba Ninia karakter. No husu ba Ita-nia an: Oinsa mak ida-ne'e bele ajuda ha'u-nia moris? Oinsá mak ida-ne'e bele transforma ha'u?

Iha versíkulu ne'e nia rohan, Biblia hatete katak mane husi rai-Etiopia kontinua nia viajen ho haksolok. Se ita hatene katak Maromak nia domin ba ita boot tebes, oinsá mak ita labele haksolok?

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

🪷🪷🪷🪷🪷🪷🪷🪷🪷🪷🪷

Read More

Oinsá mak Maromak bele halo ita sai ema ne'ebé loos?

Reflesaun bazeia ba Roma 4: 1-15 

Oinsá mak ita bele sai ema ne'ebé loos iha Maromak nia oin? Oinsá mak Maromak bele "halo ita sai loos" iha ninia oin? Ida-ne'e mak buat ne'ebé ita presiza haka'as an iha ita-nia moris tomak no iha esperansa atu hetan buat ne'ebé di'ak liu?  

Paulo hatete: "Lae. Buat maraviloza ida akontese liuhosi Jesus nia moris, mate no moris-hias. Agora ita bele simu justisa ne'e nu'udar prezente ne'ebé gratuita. Ita simu ida-ne'e la'ós tamba serbisu maka'as tebes, maibé ho fé (Roma 4:1-5). 

Pergunta ida-ne'ebé ema husu beibeik mak: Se Jesus mate tanba ita-nia sala, saida mak akontese ba sira ne'ebé moris ona molok iha Jesus mai? Purezemplu iha Timor karik, ita-nia bei-ala sira nunka rona kona-ba Jesus, oinsá ho sira-nia destinu?

Paulo hatene katak pergunta hanesan ne'e sei mosu. No nia antisipa halo esplikasaun uza  Abrão nia kazu. Karik ninia inimigu sira dehan katak Abrão sai loos tanba rezultadu hosi ninia hahalok-di'ak, ne'ebé halo nia gaba nia an (Roma 4:2). Paulo hatete katak Eskritura deklara katak "Abrão fiar ba Nai, no Nai sura fiar nee nudar moris loos ba nia (Roma 4:3, Jénesis 15:6 BK). Fraze ne'e implika katak ida ne'e prezente la'ós buat ne'ebé ita sosa (Roma 4:5). 

Se ita serbisu maka'as no halo serbisu ne'ebé di'ak, ita merese hetan saláriu; ita la bolu ita-nia saláriu nu'udar prezente. Maibé se ita haree katak serbisu ne'e boot liu ba ita, katak serbisu ne'e so Maromak de'it mak bele halo, no ita tau fiar ba Nia atu halo serbisu ne'e...... Ida ne'e mak buat ne'ebé halo ita sai loos ho Maromak hosi Maromak, (Roma 4:4-5). 

Karik Paulo nia inimigu sira dehan katak prezente ne'e so disponivél de'it ba ema judeu sira (ema sira ne'ebé halo sirkunsizaun). Maibé Paulo hatete katak ema judeu sira halo sirkunsizaun depoisde Maromak deklara Abrão loos (Jenesis 17), tanba ne'e, Maromak fó bénsaun no justifikasaun ba moris loos tamba fé ne'e ba ema judeu sira ne'ebé hetan sirkunsizaun no mós ba ema ne'ebé la hetan sirkunsizaun (ema Jentiu sira), (Roma 4: 9-10). 

La'os sirkunsizaun mak halo ema sai loos iha Maromak Ninia oin. Maibé ne'e mak selu/seal/sinál ida. Oinsaa Maromak sura ida nee ba nia? Ida nee molok ka depois nia hetan sirkunsizaun? Laos depois, maibee molok nia hetan sirkunsizaun. Nia simu sirkunsizaun nudar sinál ida nebee hatudu katak nia iha ona moris loos liu hosi fiar molok nia hetan sirkunsizaun" Roma 4:10-11

Istória kona-ba Abraao hatudu momoos katak ema konta Abrão nu'udar ema laran-loos la'ós tanba ninia hahalok, sirkunsizaun ka ukun-fuan, maibé tanba Maromak nia grasa liuhosi fé ba Jesus. Se Abrão sai ema loos tanba fé, nia mak Aman ba ema hotu ne'ebé iha fé (inklui ema sira ne'ebé seidauk hetan sirkunsizaun, Roma 4:11-12). 

Krús ne'e efetivu durante tempu hotu. Liuhusi buat ne'ebé Jesus halo iha kruz, ema sira ne'ebé nunka rona kona-ba Nia maibé tau fiar ba Maromak hetan moris loos iha Maromak Ninia oin tanba sira-nia fé. 

Serake ita presiza komprende buat hotu ne'e atu bele hetan moris loos liuhusi fé? Lae ida. Moris loos iha Maromak ne'e liuhosi fé, nune'e ita la presiza atu komprende buat hotu-hotu maibé ita presiza fé ba Maromak. Tan ne'e mak kumpre Maromak nia promesa ne'e depende kompletamente ba tau fiar ba Maromak no ba ninia dalan sira, no depois kaer metin ba Maromak no saida mak nia halo. Maromak nia promesa mak prezente ne'ebé puru (Roma 4:16).

Aman, obrigadu barak ba lia-loos ne'ebé furak katak Ami hetan moris loos iha Maromak Nia oin liuhusi Jesus nia mate ba ami, no liuhusi fiar ba nia. Ajuda ami atu komprende lia-loos ne'e ho kle'an liután no esplika ho klaru liután, atu nune'e ema barak bele hatene liután kona-ba bénsaun boot sira ne'ebé Ami hetan husi fiar.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

🪷🪷🪷🪷🪷🪷🪷🪷🪷🪷🪷

Referensia

Roma 4:1-15 Biblia Kadi 

1 Entaun ita bele dehan saida kona ba Abraão, nebee ita nia bei-ala tuir isin? Nia manaan saida?

2 Tanba se Abraão sai loos liu hosi hahalok, nia bele gaba aan. Maibee laos iha Maromak nia oin.

3 Tanba Eskritura dehan saida? “Abraão fiar ba Maromak, no Maromak sura fiar nee nudar moris loos.”

4 Agora, ba nia nebee servisu, ninia patraun la sura ninia kolen nudar prezenti ida, maibee nudar buat nebee merese atu simu.

5 No ba nia nebee la servisu maibee fiar deit ba Ida nebee halo ema sai loos nebee seidauk konhese Maromak, ninia fiar nee sura nudar moris loos.

6 David mos koalia kona ba haksolok ba ema nebee Maromak sura nudar ema moris loos ketak hosi ninia hahalok:

7 Haksolok ba sira nebee hetan perdaun hosi sira nia hahalok aat,

no Maromak taka ona sira nia sala.

8 Haksolok ba ema nebee Nai la sura ninia sala.

9 Laran haksolok nee só ba deit sira nebee hetan sirkunsizaun ka ba mos sira nebee la hetan sirkunsizaun? Tanba ita dehan ona katak Maromak sura Abraão nia fiar nudar moris loos.

10 Oinsaa Maromak sura ida nee ba nia? Ida nee molok ka depois nia hetan sirkunsizaun? Laos depois, maibee molok nia hetan sirkunsizaun.

11 Nia simu sirkunsizaun nudar sinál ida nebee hatudu katak nia iha ona moris loos liu hosi fiar molok nia hetan sirkunsizaun. Nunee nia sai aman ba ema hotu nebee fiar maski sira la hetan sirkunsizaun hodi Maromak bele sura moris loos ba sira mos.

12 No nia mak aman ba sira nebee hetan sirkunsizaun, nebee laos hetan sirkunsizaun deit, maibee sira mos lao tuir Abraão nia fiar nebee nia iha molok nia hetan sirkunsizaun.

13 Tanba Abraão no ninia bei-oan sira hetan promesa katak nia sei simu mundu nudar liman rohan. Promesa nee la mai liu hosi lei maibee liu hosi moris loos nebee mai hosi fiar.

14 Tanba se sira nebee halo tuir lei mak simu liman rohan nee, entaun fiar sai mamuk no promesa nee la iha folin.

15 Tanba lei lori mai Maromak nia laran hirus. Maibee se lei la iha, entaun sala nebee kontra lei mos la iha.

Read More