JESUS BELE HALO BUAT NE'EBE IMPOSIVÉL

Maibé Jesus hateke ba sira, no dehan, “Ba ema, la bele; maibé ba Maromak, buat hotu bele.” Mateus 19:26 BK

Mateus 19:26

Atu komprende versikulu ne'e, ita presiza haree istória husi versíkulu anterior sira iha Mateus 19: 16-25. Mane joven ida-ne'ebé riku mai hasoru Jesus no husu: "Buat di'ak saida mak ha'u tenke halo atu hetan moris rohan-laek?" Nia hanoin katak nia bele ba lalehan liuhusi Ninia eforsu rasik. Jesus hatete ba nia atu halo tuir mandamentu sira, no mane joven ne'e dehan “Hau halo tuir ona buat sira nee hotu. Saida tan mak hau sei falta?” Mateus 19:20

Maibé Jesus hatene katak osan mak importante liu iha ninia laran. Tan ne'e, Jesus hatete: “Se o hakarak sai perfeitu, baa faan o nia sasaan, no foo ba ema kiak, no o sei hetan riku-soin iha lalehan. No mai tuir Hau.” Mateus 19:21. Mane joven ne'e la'o ho triste tanba nia hadomi liu ninia rikusoin duke Maromak. 

Tuirmai Jesus hatete ba ninia dixipulu sira katak susar tebes ba ema riku atu tama ba reinu lalehan - la'ós tanba osan ka riku-soin mak buat aat ida, maibé tanba ema tau fiar liu ba sira-nia rikusoin liu fali Maromak. Dixipulu sira hakfodak no husu: " Entaun se mak bele hetan salvasaun?" 

Jesus hatán ho lia-loos iha Mateus 19:26 “Ba ema, la bele; maibee ba Maromak, buat hotu bele.”

Ita labele salva ita-nia an liuhusi serbisu di'ak sira, osan, ka esforsu maka'as. Salvasaun ne'e imposivél ba ema, maibé posivél liuhusi Jesus Kristu. Nia mesak de'it mak bele fó perdua ba sala, muda ema nia laran, no fó moris rohan-laek. 

Buat saida de'it ne'ebé haree hanesan imposivél iha ita-nia moris - hanesan salvasaun ba ema neʼebé ita hadomi, relasaun familia ne'ebé aat, no problema ne'ebé ita hasoru iha moris. Karik ita hasoru problema sira ne'e, hanoin-ba katak Jesus bele halo buat ne'ebé imposivél. Bainhira ita tau fiar ba nia, ita tau ita-nia moris iha liman ne'ebé la iha limitasaun. 

La'o ho fé no fiar aan tamba ita hatene Jesus mak loke odamatan ba moris rohan-laek no lori ita atu la'o iha dalan ba lalehan. 

Orasaun: Nai Jesus, obrigadu tanba buat ne'ebé imposivél ba ami posivél ba ita. Ajuda ami tau fiar ba Ita-nia kbiit iha ami-nia moris tomak. Hametin ami-nia fiar bainhira ami la'o tuir Ita iha dalan ba lalehan. Amen.

Mateus 19:26

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Podér ne'ebé ita presiza

Tanba Espíritu ne'ebé Maromak fó ona ba ita laos Espíritu ta'uk maibé Espíritu ne'ebé iha kbiit, domin no halo ita kontrola aan. 2 Timóteo 1:7 BK

2 Timóteo 1:7

Iha versíkulu ida-ne'e, apóstolu Paulo hakerek ba pastor Joven ida naran Timoteo, ne'ebé dala ruma sente ta'uk no la iha serteza. Timoteo iha responsabilidade boot, no dezafiu sira ne'ebé hale'u nia halo nia la serteza. Apostolo Paulo fó-hanoin nia kona-ba buat ida ne'ebé importante tebes: ta'uk la mai husi Maromak. Maromak fó forsa, aten-barani no dame ba ninia oan sira. 

Lia-loos ne'e mós bale ba ita ohin loron. Dala barak ita sente ta'uk - ta'uk kona-ba futuru, ta'uk kona-ba fallansu, no ta'uk kona-ba oinsá ema nia hanoin ba ita. Maibé Maromak lakohi ta'uk atu kontrola ita-nia moris. Nia fó podér mai ita liuhusi Ninia espíritu santu. Podér ne'e bele ajuda ita hasoru problema oioin, hasoru tentasaun, no kontinua la'o ba oin maski hasoru susar iha moris. 

Maromak mós fó domin mai ita - domin ne'ebé ajuda ita atu fó perdua, hadomi ema seluk, no hatudu laran-di'ak. Kuandu domin hakonu ita-nia laran, ta'uk lakon ninia podér. 

No Maromak fó ita hanoin di'ak sira, ne'ebe signifika sabedoria, hanoin ne'ebé klaru, no kontrola ita-nia an. Ho Maromak nia ajuda, ita bele halo desizaun ne'ebé di'ak, hakmatek iha tempu susar, no tau fiar ba nia duke hanoin barak. 

Ohin loron, se ita sente fraku ka ta'uk, hanoin-hetan versikulu ne'e. Ita iha ona buat hotu ne'ebé ita presiza iha ita-nia laran tanba Maromak tau Ninia Espíritu iha ita-nia laran. Forsa ne'ebé Ita presiza mak la'os ita-nia forsa rasik - maibé Maromak nia forsa ne'ebé serbisu iha ita. 

La'o ho fiar aan. La'o ho domin. La'o ho dame. Kuandu Maromak hamutuk ho ita, la iha buat ida mak bele hapara Ninia hakarak ba ita-nia moris. No bainhira ita tau fiar ba Ninia Espíritu loroloron, Nia sei dirije ita ho seguru iha dalan ba lalehan. 

Orasaun: Nai, obrigadu tanba Ita la fó ami Espíritu ta'uk nian, maibé kbiit, domin, no hanoin ne'ebé loos. Ajuda ami atu tau fiar ba Ita-nia Espíritu no la'o ho korajen loroloron, bainhira ami la'o tuir Ita iha dalan ba lalehan. Amen.

2 Timóteo 1:7

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Maromak Ninia domin ba labarik sira

Maibé bainhira Jesus haree ida ne'e, Nia la kontenti, no dehan ba sira, “Husik labarik kiik-oan sira hakbesik mai Ha'u, no keta bandu sira. Tanba reinu lalehan mak sira nian.” Marcos 10:14 BK

Marcos 10:14

Iha versíkulu ne'e, Jesus hatudu Ninia domin ne'ebé kle'an ba labarik sira. Kuandu ema balu koko atu hapara labarik sira atu mai hasoru Nia, Jesus la kontente. Nia hatete ho klaru ba sira: "Husik labarik kiik-oan sira hakbesik mai Ha'u" Jesus simu sira ho liman nakloke. Nia haraik bénsaun ba sira, tau matan ba sira, no hatudu katak labarik sira folin-boot ba Maromak. 

Versíkulu ne'e hanorin ba ita katak labarik hotu importante ba Jesus. Nia haree sira-nia fiar ne'ebé simples, sira-nia inosensia, no sira-nia laran ne'ebé onestu. Karik labarik sira la hatene buat hotu, maibé sira fasil atu fiar. Jesus hatete katak Maromak Nia reinu partensi ba ema sira ne'ebé iha laran hanesan labarik - simples, haraik-an, no prontu atu fiar. 

Jesus nia domin ba labarik sira mós fó-hanoin ba ita katak ita tenke tau matan ba labarik sira, proteje sira, no lori sira ba Jesus. Maromak hakarak labarik ida-idak hatene katak Maromak hadomi sira, no sira importante no folin-boot iha MaromakNia oin. Maski labarik ida riku ka kiak, forte ka fraku, Jesus konvida sira hotu. La iha ema ida-ne'ebé ki'ik liu ka nurak liu atu hetan Ninia domin. 

Versíkulu ne'e mós ko'alia kona-ba ita nu'udar ema-boot. Jesus hakarak ita hasoru Nia ho fiar hanesan labarik - tau fiar tomak ba Nia, depende ba nia loroloron, no fiar Ninia promesa sira la ho laran ruarua. Kuandu ita haraik-an hanesan labarik ki'ik sira, ita-nia laran sai nakloke ba Maromak nia grasa no bénsaun. 

Ohin loron, hanoin-hetan katak Ita mak Maromak Nia oan doben ida. La prekupa ita-nia idade hira, Ninia liman nakloke atu simu Ita. La'o ba Nia ho laran hanesan labarik ida, no husik Ninia domin lori ita loroloron atu la'o iha dalan ba lalehan. 

Orasaun: Nai, obrigadu tanba Ita hadomi labarik hotu, inklui ami boot sira. Fó ba ami laran ne'ebé haraik-an hanesan labarik ki'ik sira. Ajuda ami atu hatudu Ita-nia domin ba labarik sira ne'ebé hale'u ami bainhira ami hotu la'o hamutuk ho Ita iha dalan ba lalehan. Amen.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More