Pratika Orasaun

Fiar nafatin ba Nia, Oh povu, loke imi-nia fuan laran iha Ninia oin. Maromak mak ita-nia fatin seguru. Salmu 62:8 BK 

                           Salmu 62:8 

Orasaun la'ós tenke buat ne'ebé komplikadu no formál. Orasaun mak tempu ida ne'ebé ita loke ita-nia laran ba Maromak hanesan ita ko'alia ho ita-nia belun di'ak ida. Iha Salmo 62:8, David konvida ita atu tau fiar ba Maromak iha tempu hotu no fakar sai buat ne'ebé iha ita-nia fuan-laran ba Maromak. Ida-ne'e katak ita bele ko'alia ho onestu ba Maromak kona-ba ita-nia ta'uk, luta, sala, esperansa no ita-nia presiza sira. Orasaun ne'ebé loos ne'e praktikál tamba bele ajuda liga ita-nia moris loroloron nian ho lalehan. 

Iha 1 Liurai 19: 1-18, Elias sente deskorajen, ta'uk, no kolen depoisde ninia vitoria iha Foho Karmel. Nia halai ba rai-fuik no husu Maromak atu foti tiha nia moris. Maibé Maromak rona ba ninia atan ne'ebé kole. Na'i la la rejeita Elias tamba ninia fraku sira. Duke halo nune'e, nia fó ai-han, deskansa, komfortu no fo instrusaun ho laran-mamar. Ida-ne'e hanorin ita katak orasaun la'ós de'it ita halo iha tempu ita iha forsa, maibé mós liuliu iha tempu desperadu sira. Maromak prekupa kona-ba Ninia oan sira-nia laran-susar. 

Jesus mós hanorin orasaun ne'ebé praktikál iha Mateus 6: 5-8. Nia fó alerta atu labele halo orasaun hodi fo impresaun ba ema seluk liuhosi halo orasaun naruk. Orasaun la'ós performance ka dezempeñu ida. Maromak hateke ba itania laran-moos, la'ós saida mak aperese ka haree hosi li'ur. Jesus hatete katak Aman Maromak haree buat hotu inklui segredu sira no hatene saida mak ita presiza antes ita husu nia. Tan ne'e, orasaun nee estabelese bazeia ba relasaun di'ak ho Maromak la'os repete liafuan mamuk sira ne'ebé hanesan no la iha folin. 

Iha Lucas 11: 2-4 no Mateus 6: 9-15, Jesus hanorin modelu orasaun ne'ebé koñesidu hanesan Orasaun Ami Aman. Orasaun ne'e hanorin ita kona-ba balansu iha orasaun. Ita hahi'i Maromak Nia naran, buka Ninia hakarak, husu paun loroloron nian, konfesa ita-nia sala, fó perdua ba ema seluk, no husu protesaun espirituál hosi Maromak. Orasaun ne'e praktikál tanba orasaun ne'e hanorin ita kona-ba parte hosi ita-nia moris tomak, hanesan adorasaun, ita-nia presiza fiziku, ita-nia relasaun, perdua, no vitória hasoru tentasaun. 

Daniel 9:4-19 fó ezemplu ida tan kona-ba prátika orasaun. Daniel la'os de'it konfesa ninia sala, maibé mós ninia povu nia sala sira. Iha ninia orasaun, Daniel hatudu haraik-an, hatudu laran-moos, no foka ba Maromak Nia laran-sadi'a. Daniel hatene katak orasaun ne'ebé loos inklui arrependementu no dependensia ba Maromak. Nia la tau fiar ba ema nia laran-di'ak, maibé nia husu ba Nai Nia kompaixaun. 

Dala ruma ita mós la hatene oinsá atu halo orasaun ho didi'ak. Iha momentu sira hanesan ne'e, Roma 8:26-27 fó komfortu boot ba ita. Espíritu santu ajuda ita-nia fraku sira no ajuda ita atu halo orasaun tuir Maromak Nia hakarak. Maski ita-nia liafuan la perfeitu, maibé lalehan komprende ita-nia laran halerik. 

Orasaun ne'ebé praktikál, la limite de'it iha igreja ka eventu espesiál sira. Maibé orasaun ne'ebé praktikál mak la'o ho Maromak loroloron. Ita bele halo orasaun bainhira ita serbisu, estuda, halo viajen, iha terus laran, ka bainhira halo desizaun ruma. Orasaun fó forsa ba ema ne'ebé fraku, matenek ba ema ne'ebé konfuzaun, dame ba ema ne'ebé laran-taridu, no esperansa ba ema ne'ebé deskorajen. Kuandu ita halo orasaun barak liután, ita bele tau fiar ba Maromak liután iha situasaun hotu-hotu.

Ohin loron, mai ita simu Maromak Nia konvite atu fakar sai saida mak iha ita-nia laran ba Maromak. La iha susar ida mak todan liu, no la iha problema ne'ebé ki'ik liu atu Nai bele rona. Orasaun muda ita-nia moris tanba ida-ne'e lori ita atu iha komuñaun ho Maromak ne'ebé moris. 

Biarba devosaun ida ne'e enkoraje ita estabelese orasaun ne'ebé praktikál iha ita-nia moris, bainhira ita kontinua la'o daudauk iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Orasaun hosi Daniel, Enoc, & Moises

Bainhira Daniel rona katak surat regulamentu ne'e asina ona, entaun nia fila fali ba nia uma. Iha nia kuartu laran iha janela sira ne'ebé nakloke no hateke ba rai Jerusalém; iha loron ida nia hakneak, halo orasaun no hahii ba nia Maromak dala tolu, hanesan bai-bain nebee nia sempre halo ona. Daniel 6:10 BK 

                                Daniel 6:10

Orasaun mak bénsaun boot ida-ne'ebé Maromak fó ona ba Ninia povu. Liuhusi orasaun, ita ko'alia ho Maromak, hetan forsa, no hakbesik liután ba Nia. Ita bele haree Daniel, Enoc no Moises nia moris nu'udar ezemplu furak tolu kona-ba orasaun ne'ebé forte. 

Daniel mak ema ne'ebé halo orasaun ho fiél. Maski liurai halo dekretu lei ne'ebé bandu atu halo orasaun, maibé Daniel kontinua halo orasaun loron ida dala tolu hanesan baibain (Daniel 6: 10). Nia la husik sentimentu ta'uk hapara nia halo orasaun. Daniel tau fiar ba Maromak iha situasaun hotu, no Maromak fó matenek, aten-barani no protesaun ba nia. Nia halo orasaun regularmente no fiél. 

Enoc hanorin ita lisaun importante seluk tan kona-ba orasaun. Livru Genesis 5: 22-24 hatete katak Enoc la'o hamutuk ho Maromak. Ninia moris tomak mak ko'alia loroloron ho Maromak. Loroloron nia moris besik ho Maromak. Roma 12: 12 fó korajen ba ema kristaun atu kontinua halo orasaun ho fiél, hanesan Enoc kontinua iha ligasaun ho Maromak. 

Moises hatudu ba ita kona-ba podér hosi orasaun intersesaun. Dala barak nia halo orasaun ba povu Izrael maski sira halo sala hasoru Maromak. Iha livru Exodo 32:31–32 , Moises halerik ba Maromak atu fo perdua ba ema Israel depoisde sira adora estátua karau-oan halo hosi osan mean. Nia hadomi tebes povu ne'e no hamriik iha Maromak Nia oin hodi ajuda sira. Dalabarak tan, Moises halo orasaun iha tempu susar no iha tempu ne'ebé presiza (Exodo 15:25; Deuteronomio 9:25). 

Ema nain-tolu ne'e hanorin ita kona-ba parte orasaun ne'ebé diferente. Daniel hanorin ema atu fiél, Enoc hanorin ema atu iha relasaun loroloron ho Maromak, no Moises hanorin oinsa halo orasaun intersesaun ba ema seluk. Sira hotu hatudu ba ita katak orasaun la'ós de'it halo iha situasaun emerjensia, maibé tenke sai ita-nia estilu moris loroloron. 

Bíblia hatete katak ita tenke "kontinua halo orasaun" (1 Tesalonika 5:17). Ita bele halo orasaun bainhira ita la'o, serbisu, deskansa, ka estuda. Maromak sempre prontu rona ita-nia orasaun. 

Ohin loron, mai ita halo orasaun hanesan Daniel, Enoc, no Moises, ne'ebé fiél, besik ba Maromak, no nakonu ho domin ba ema seluk. Bainhira ita kontinua halo orasaun loroloron, ita hametin ita-nia fé no kontinua la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Moses halo intersesaun ba Nasaun

Depois Moisés ba hasoru fali Nai no hatete, “Povu ne'e halo ona sala boot. Sira halo maromak hosi osan mean. Favór ida, fó perdaun ba sira nia sala, se lae, hamoos tiha hau nia naran hosi Ó-nia livru ne'ebé Ó hakerek ona.” Exodu 32:31-32 BK 

                    Exodu 32:31-32 

Moises la'ós de'it sai nu'udar lider ba Izrael, maibé nia mós ema ne'ebé halo orasaun maka'as. Ezemplu ida-ne'ebé boot liu mak ita bele haree iha livru Exodo 32:31-32. Bainhira ema Izrael halo sala hodi adora estatua karau-oan halo hosi osan-mean, Moises ba iha Maromak Nia oin no halo orasaun ba sira. Nia hatete: "Favór ida, fó perdaun ba sira nia sala, se lae, hamoos tiha hau nia naran hosi Ó-nia livru ne'ebé Ó hakerek ona.” Moises hadomi tebes povu to'o nia prontu atu sofre tanba sira. 

Ida-ne'e hatudu laran ne'ebé loos hosi intersesor. Intersesor mak ema ne'ebé halo orasaun ho laran-tomak ba ema seluk. Moises la haluha povu nia sala, maibé nia nafatin husu Maromak nia laran-sadi'a no perdua. 

Durante Moises nia moris tomak, dala barak nia halo orasaun ba ema Izrael iha situasaun susar sira. Iha livru Exodo 15: 25, nia halerik ba Nai bainhira bee ne'ebé moruk. Iha livru Exodo 17: 2-6, nia halo orasaun bainhira povu la iha bee. Maski povu Israel murmura hasoru nia, maibé Moises kontinua buka Maromak atu ajuda. 

Dala barak, nia sente ninia responsabilidade todan tebes. Livru Numeru 11: 11-15 hatudu katak Moises fó sai todan ne'ebé nia sente ba Maromak. Maibé nia la para atu halo orasaun. 

Moises mós tau fiar ba Maromak Nia laran-sadi'a no promesa sira. Livru Exodo 34:6 deskrebe Maromak hanesan laran sadi'a, grasa wain, pasiénsia, no nakonu ho domin. Moises hanoin-hetan Maromak Nia aliansa ho Abrão, Isaac, no Jacob (Exodo 32:13, no nia hatene katak Maromak Nia domin ba Ninia povu ne'e boot tebes (Deuteronomio 7:8).

Dala barak Moises halo orasaun ba nasaun Israel. Livru Deuteronomio 9: 19 no Livru Deuteronomio 10: 10 hatudu katak nia kontinua halo orasaun intersesaun. Nia la rende. 

Iha Testamentu foun, Jesus mós hanorin lisaun ne'ebé hanesan iha Evanjellu Lucas 18: 1-8, nia enkoraje ema kristaun atu halo orasaun no la lakon sira-nia esperansa. 

Ohin loron, Maromak mós bolu ita atu halo orasaun ba ema seluk, hanesan ita-nia família, ita-nia igreja, ita-nia nasaun, no sira ne'ebé dook husi Maromak. Hanesan Moises, ita tenke halo orasaun ho domin, fiar, no perseveransa.

Kuandu ita hamriik iha Maromak Nia oin hodi halo orasaun ba ema seluk, ita hatudu ninia laran-sadi'a no kontinua la'o iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More