Fiar na'in sira bele aprende buat barak hosi versu ne'e. Job, Paulo no Simão Pedro, sai ezemplu ba ema ne'ebé Diabu hakarak haketak hanesan terigu hó nia kulit, maibé Diabu la iha autoridade atu halo ida ne'e bainhira la iha permisaun hosi Maromak.
Satanas, presiza permisaun hosi Maromak, bainhira nia atu koko ita nia fiar liuhosi susar no moras oinoin iha ita nia moris hanesan saida mak nia halo ba Maromak nia atan Job (Ba sira ne'ebé seidauk hatene historia Job, bele lee iha libru Job/Ayub iha Testamentu tuan).
La iha buat ida mak Satanas bele halo bainhira la iha permisaun hosi Maromak. No karik ita sai Maromak Nia oan, ita hatene katak buat hotu-hotu ne'ebé akontese iha ita nia moris, Maromak sei uza difikuldade sira ne'e ba ita nia benefisia no ba Maromak Nia Gloria- mesmuké iha tempu moras no susar ita sente hanesan Maromak husik hela ita.
Diabu baibain ataka ita, aproveita ita nia frakeza ka parte hosi ita nia moris ne'ebé vulneravél liu. Ita nia frakeza bele, porno, osan, rikusoin, telemovél, TV, tua, taru, droga, sigaru, etc. Liuhosi buat sira ne'e Diabu lasu no ataka ita. Identifika ita idaidak nia frakeza no husu Maromak atu ajuda ita sai hosi diabu nia lasu sira ne'e. Medita Na'i Maromak Nia futarlia loronloron no rezisti Diabu no nia sei halai hosi ita. Na'i Maromak Nia Nia futarlia hatete "Tan neʼe, hakruʼuk ba Maromak; maibé kontra hasoru Diabu, now nia sei halai husi imi" Tiago 4:7
Na'i Maromak Hatene saida mak di'ak liu ba ita idaidak. Tan ne'e haraikan no submete ba Maromak no la'o tuir Na'i Jesus Nia ain-fatin hosi Loron ba loron.
Maromak ne'ebé ita serbí mak Maromak ne'ebé hatene buat hotu-hotu (omniscient), poderozu (omnipotent) no Nia prezensa iha fatin hotu-hotu (omnipresent). Na'i Maromak sempre kuida ita hosi tempu ba tempu. La iha buat ida ka ema ida ne'ebé bele hasai ita hosi Na'i Maromak Nia liman, anaunser ita rasik ba desidi atu la'o hela Na'i Maromak no Nia Lia Loos.
Na'i Jesus fó atensaun ba Pedro kona-ba oinsa nia sei terus tanba Na'i Jesus Nia hanorin, maibé iha kazu Job, Maromak la fó hatene susar no terus ne'ebé nia sei infrenta. Nune'e mós ho Ita, dala ruma ita hatene tanba saida mak ita hasoru difikuldade oinoin, maibé mós dala ruma ita la hatene.
Kompriende ba katak hosi tempu ba tempu ita nia inimigu- Diabu Koko atu separa ita sira ne'ebé moris tuir Kristu nia hanorin hosi Na'i Maromak, maibé keta haluha katak Na'i Maromak hatene Kona-ba ida ne'e no nia permiti susar sira ne'e akontese ba ita tanba razaun balu.
Na'i Maromak hó Nia grasa permiti ita esperiensia susar oinoin iha ita nia moris ba ita nia di'ak no Na'i Maromak Nia Gloria. Liután ida ne'e, ita iha mediadór ida ne'ebé reza ba ita atu ita nia fé la monu (Lukas 22:32).
**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
 |
| Lukas 22:31 |
0 comments:
Post a Comment