Naroman mai ona mundu

Bainhira ita hanoin hikas Na'i Jesus mai moris  iha mundu nakukun ne'e,   Nia hanesan roman ne'ebé mai fo naroman ba mundu ne'ebé nakukun.

Iha inisiu bainhira Na'i Maromak kria mundu ne'e, Na'i ko'alia no naroman haketak an hosi nakukun Génesis 1:1-4). Na'i Maromak Nia prezensa mak fó roman.  Maibé roman  ne'e, hela la kleur no lakon bainhira Adão no Eva monu ba sala. No bainhira sira monu ba sala, Na'i Maromak Nia prezensa no Nia roman haketak an hosi ita ema.  Iha momentu neebá, istoria redensaun tenke hakerek.

Na'i Maromak Nia dezezu mak hakarak halo relasaun di'ak hó ita ema, tan ne'e Nia haruka roman ne'e atu lori ita sai hosi nakukun no fila fali ba Na'i Maromak Nia prezensa. Naroman ne'e mak Na'i Jesus ne'ebé mai moris iha ita leet (João 1:9).

João 1:9

Na'i Maromak Nia Oan-mane mesak mai moris iha mundu atu nune'e liuhosi perdaun ba sala ita bele iha  rekonsiliasaun hó Na'i Maromak. Atu hatutan fali relasaun ne'ebé kotu iha Jardin Eden.

Separasaun hó Na'i Maromak ne'ebé akontese iha Jardin Eden, halo ita moris iha nakukun laran. Na'i Jesus rezolve ida ne'e hó Nia  roman. Na'i Jesus hatete "Haʼu mak naroman ba mundu. Ema neʼebé laʼo tuir haʼu sei la laʼo iha nakukun laran, maibé sei hetan naroman neʼebé fó moris" João 8:12

Maun-alin sira iha Kristu, iha moris ne'e, saida de'it mak ita hasoru ohin loron, saida de'it mak ita halo ona, atu problema kiik ka boot, Na'i Maksoin mundu nian to'o mai ona ba ita (ba ó no ha'u). Biarbá Nia roman fo naroman iha fatin nakukun iha ita nia moris no restaura saida mak  lakon ona iha nakukun laran. Naroman ne'e iha ne'e ona no  ita la presiza moris iha nakukun laran tan.

Maun-alin sira iha Kristu, mai ita konvida Na'i Jesus mai moris iha ita nia moris loronloron, la'os tinan ida dala ida. Atu nune'e ita bele  esperiensia Na'i Nia domin iha ita nia moris loronloron.

✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12

Maromak akonpaña ita hotu nia moris ohin loron no ba oin.

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane  mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏

João 1:9