Bíblia hanorin katak ita tenke moris tuir saida mak halo Na'i Maromak kontenti. Tanba influensia mundu nian, ita ema Kristaun fokus liu ba buat ne'ebé tuir loloos ita labele halo duké ida ne'ebé tuir loloos ita tenke halo.
Ita tenke hanoin ita nia responsabilidade hanesan Na'i Maromak Nia oan. Na'i Maromak bolu ita atu haketak an hosi hahalok mundu nian, atu fó influensia positivu ba ema atu sira la'o tuir Na'i Maromak Nia futarlia, sai ema ne'ebé diferente, haklaken Na'i Nia futarlia, sai ezemplu ba ema atu banati tuir iha ita nia moris tomak.
Bainhira ita moris tuir estilu mundu nian, ita sei la iha deferensa ho ema seluk, ne'ebé la'os Kristaun. Bíblia hó klaru hanorin mai ita atu labele moris tuir mundu nia hakarak maibé transforma no hafoun ita nia hanoin tuir Na'i Maromak Nia hakarak. Konsidera versu tuir mai ne'e :
"Keta halo tuir mundu neʼe, maibé transforma imi-nia an hodi hafoun imi-nia hanoin, atu nuneʼe imi bele hatene loloos kona-ba Maromak nia hakarak neʼebé diʼak no perfeitu no halo Maromak kontente" Roma 12:2
Oinsá ita hafoun ka renova ita nia hanoin? Liuhosi halo tuir Na'i Maromak Nia futarlia, ita renova ita nia hanoin.
Bainhira ita renova ita nia hanoin tuir Na'i Maromak Nia futarlia, ita nia hakarak, hanoin no atitude sei aliña ho Na'i Maromak Nia hakarak. Bainhira ita halo ida ne'e, ita la haree buat hotu iha ita nia moris liuhosi ita nia matan, maibé tuir Na'i Nia matan. Ita sei la moris tuir buat ne'ebé ita haree deit maibé tuir buat ne'ebé ita labele haree, alias fé. No fé mai hosi rona Na'i Maromak Nia futarlia (Roma 10:17).
Bainhira ita renova ita nia hanoin, naturalmente, ita nia tendensia sei halo tuir Na'i Maromak Nia hakarak duké ita nia hakarak. Ida ne'e Na'i Maromak bolu ita sira ne'ebé hanaran an ema Kristaun atu halo no prátika iha ita nia moris tomak.
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| Roma 12:2 |
Amem🙏
ReplyDelete