Sei di'ak tebes se ita nia hanoin sira ne'e di'ak hotu. Infelizmente maioria hosi hanoin sira ne'e mak negativu no sai hanesan veneno. Novidade di'ak mak Bíblia bele sai mata dalan atu ezamina ita nia pensamentu.
Mai ita rona Bíblia nia Konsellu kona-ba oinsá ita tenke hanoin:
"Ikusliu, maun-alin sira, kontinua hanoin kona-ba buat hotu neʼebé loos, buat hotu neʼebé dignu, buat hotu neʼebé justu, buat hotu neʼebé puru, buat hotu neʼebé furak, buat hotu neʼebé merese respeitu, no buat hotu neʼebé eselente no buat hotu neʼebé merese hahiʼi". Fil. 4:8
Maromak Nia futarlia iha Fil. 4:8 hanesan teste boot ida ba ita, kona-ba saida mak ita tenke hanoin.
Versikulu ne'e ko'alia mai ita atu hanoin buat ne'ebé: 1) loos; 2) buat hotu neʼebé dignu; 3) buat hotu neʼebé justu; 4) buat hotu neʼebé puru/moos; 5) buat hotu neʼebé furak (lovely/amavél/manis); 6) buat hotu neʼebé merese respeitu (Good report/boa fama/sedap didengar); 7) buat hotu neʼebé eselente/excelente/kebajikan no 8) buat hotu neʼebé merese hahiʼi (Worthy of praise/louvor/patut dipuji).
Mai ita haree liafuan sira ne'e idaidak tuir mai:
1. Loos (Verdadeiro/True)
Buat ida inportante liu atu konsidera iha ita nia moris mak: "Seráke hanoin sira ne'e loos?" Dalabarak ita nia hanoin sira ne'e la loos. Ita presiza fokus lia loos. Saida mak lia-loos? Buat ne'ebé loos tenke aliña ho Na'i Maromak Nia futarlia. "Halo sira santu ho lia-loos. Ita-nia liafuan mak lia-loos" João 17:17
2) buat hotu neʼebé dignu (Noble/Nobre/Mulia).
Tanba ita Maromak Nia oan, ita tenke tau ita nia an aas. Ita nia pensamentu tenke aas hanesan Liurai universu nia oan. Maibé hanesan Maromak Nia oan, ita labele arogan, labele permiti ita nia an atu hanoin ne'ebé ladi'ak.
3) buat hotu neʼebé justu (Right/correto/adil)
Ema barak mak hakarak sai ema ne'ebé justu, sai ema ne'ebé nunka sala. Maibé dalabarak ita la permiti dezezu sai ema justu ba ita pensamentu. Hanoin buat ne'ebé justu (correcto) signifika hanoin ne'ebé tenke akurat no apropria atu gia ita nia moris.
4) buat hotu neʼebé puru/moos
Atu ita-nia hanoin no laran moos, ita tenke hili atu hanoin buat ne'ebé iha etik; di'ak; no onestu.
5) buat hotu neʼebé furak (lovely/amavél/manis)
Atu ita iha hanoin ne'ebé furak signifika ita tenke fokus ba buat ne'ebé furak ka bonita iha moris.
6) buat hotu neʼebé merese respeitu (Good report, admirable/boa fama/sedap didengar)
Ema hotu-hotu hakarak hetan respeitu no hakarak naran di'ak. Fokus ita nia pensamentu ba buat sira ne'ebé ema gosta rona, maibé tenke aliña ho Na'i Maromak Nia futarlia. Karik ida ne'e Na'i Maromak Nia futarlia, mesmu ema lagosta rona, ita tenke hatete nafatin.
7) buat hotu neʼebé eselente/excelente/kebajikan
Di'ak hosi buat di'ak hotu-hotu mak eselente. Bainhira ita nia hanoin eselente la iha buat ida mak di'ak liu ka esepsionál. Pensamentu ne'ebé eselente lori ita ba moris eselente.
8) buat hotu neʼebé merese hahiʼi (Worthy of praise/louvor/patut dipuji).
Pensamentu saida mak merese atu ita hanoin? Pensamentu kona-ba Maromak. Kona-ba Na'i Maromak Nia dalan, Ninia planu, Ninia kriasaun, nsst. Seguru atu hatete katak bainhira ita nia pensamentu fokus ba Maromak, hanesan bust ne'ebé di'ak no merese duni.
Ita bele ezamina ita nia pensamentu loronloron. Bainhira ita halo ne'e, to'o loron ida, ita la presiza ezamina tan, tanba ita hatene ita nia pensamentu prienxe ona estandarte Fil. 4:8.
Ita sei labele ajusta pensamentu negativu hotu ne'ebé tama mai ita nia hanoin dala ida de'it, maibé ita bele halo ita nia hanoin libre hosi hanoin negativu idaida. Halo ida ne'e liuhosi lee no medita Na'i Maromak Nia futarlia loronloron.
✝️✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin.
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
 |
| Fil. 4:8 |
0 comments:
Post a Comment