Fiar ba naroman bainhira imi sei iha naroman ne'e (João 12:36)

Iha 2Korintu 6:2, Apostolu Paulo hatete "Tebes, agora mak tempu nebee loos; tebes, agora mak loron salvasaun nian". Maromak Ninia lia-fuan iha Ebreu 3:15 mós hatete "Ohin loron, se imi rona Ninia lian, la bele ulun toos hanesan iha tempu uluk nebee imi kontra hasoru Hau".  

Tambasá mak bainhira ita rona ona lia-loos tenke simu no la bele halo laran toos? Nia razaun mak hanesan Tiago (Jesus Ninia irmaun Ida) iha Libru Tiago 4:14 hatete "Maibee imi la hatene loron aban nee sei lao oinsaa. Saida mak imi nia moris? Imi mak abu-abu, nebee mosu mai too tempu uitoan deit no la kleur lakon fali" 

Maromak Ninia lia-fuan ne'e fo hanorin ba ita katak ita-nia moris ne'e bele hakotu kualkér tempu, bele agora, aban, bainrua ita lahatene. Libru Provérbio fo atensaun katak sira ne'ebé ulun-toos sei hasoru sira-nia destinu derepente "Nia nebee simu disiplina dala barak maibee sei iha ulun toos, nia sei tohar derepenti, no ita la bele kura nia" Provérbio 29:1 BK

Maromak ninia lia-fuan sira iha leten nia tema esensiál hanesan ho mensajen ne'ebé Jesus ko'alia ba ema sira iha Jeruzalen tinan 2000 liu-ba (João 12:20-22). Tema esensiál mak ne'e "LABELE HEIN, LABELE ADIA"

Literalmente Jesus ko'alia ba ema sira iha momentu ne'eba no ba ita agora katak Ninia serbisu haklaken sei remata. Sira-nia biban atu rona no responde ba Ninia hanorin sei la iha tan ona " “Oras too ona, atu Ema Nia Oan simu glória" João 12:23.

Ita sira ne'ebé rejeita Jesus Ninia lia-fuan, sei iha risku moris iha nakukun nia laran "Naroman sei iha imi nia leet too tempu uitoan tan. Lao ba bainhira imi sei iha naroman, hodi nakukun la hadau imi. Tanba ema nebee lao iha nakukun laran la hatene nia baa nebee" João 12:35. Jeralmente Jesus hakarak ko'alia ba ita sira ne'ebé rona evanjellu (Lukas 7:22-23), haree evidensia Maromak nian, labele halo laran toos......... "No Jesus hataan ba sira, “Fila fali ba, no foo hatene ba João kona ba buat nebee imi haree no rona nee, katak ema matan delek sira bele haree, ema ain kudeik sira bele lao, ema moras lepra sira sai moos, ema tilun diuk sira bele rona, ema mate sira moris fali, no ema kiak sira rona liafuan diak. 23 Haksolok ba ema nebee la monu ba sala tanba Hau.”

Jesus fó hanorin ba ita katak so sira ne'ebé sai "nudar Ninia oan sira! Ka oan ba naroman (1Joao 3:1) mak bele evita forsa nakukun. Tempu Ida, ba sira ne'ebé ignora Maromak ninia lia-fuan sei baku reen-toos no sei laiha razaun katak sira nunka rona Maromak Ninia lia-loos. Konsidera Na'i Maromak ninia lia-fuan tuir Mai:

 "Tanba Maromak nia laran hirus mosu mai hosi lalehan hasoru ema nia hahalok nebee la hamtauk no la loos. Tanba liu hosi hahalok la loos ema hanehan lia loos. 19 Tanba buat nebee ema bele hatene kona ba Maromak, ema bele hatene mo-moos deit, tanba Maromak hatudu ona buat sira nee ba ema. 20 Tanba maski ema la haree ho matan buat nebee Maromak nian, katak Ninia kbiit rohan laek no Ninia karakter nudar Maromak, sira sei bele hatene mo-moos. Tanba dezde Nia kria mundu, ema bele kompriende buat sira nee liu hosi buat nebee Nia halo ona. Nunee ema la iha razaun atu la fiar. Roma 1:18-20

Mai ita rona no halo tuir Na'i Maromak ninia lia-fuan, bainhira Nia sei fo biban.

Referensia: Ebreu 3, João 12, Lukas 7, Roma 1, 1 João 3, Proverbios 29, Tiago 4, 2 Kor 6

✝️✝️✝️✝️✝️✝️✝️✝️✝️✝️✝️✝️

Agora ita rona ona Maromak Nia futarlia, no Maromak dehan nune'e: 

Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16

Maromak mós hatete nune'e:

Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?

Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12

Maromak akonpaña ita hotu nia moris ohin loron no ba oin.

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏