Tuir Jesus la signifika ema hotu gosta ita. La'os ema hotu bele la'o tuir Jesus Ninia hanorin. la iha ema ida bele mai iha Jesus, se Aman Maromak la fó lisensa atu mai.
Tuir Jesus, la fasíl. Maibé, ida ne'e mak dalan ba moris nian. Jesus hatete “Hau mak dalan, lia loos no moris. Ema ida la bele hakbesik Aman, só deit liu hosi Hau" João 14:6
Jesus Ninia hanorin mós la fasíl. Dixipulu sira hatete “Liafuan nee todan. See mak bele rona?” João 6:60 BK. Jesus Ninia hanorin todan tebes tamba soke ho pratika ka fiar komún iha ita-nia komunidade, nune'e, ohin loron hanesan ho tempu Jesus nian ita lee iha evanjellu João 6:66 dehan "Liu tiha tempu nee, Jesus nia eskolante sira barak fila kotuk no lakohi lao tan ho Nia" iha inisiu kapitulu ita lee ema barak tuir Jesus, ikus mai ema barak husik hela Jesus. Ha'u-nia esperiensia, ema barak gosta rona versikulu sira ne'ebé tuir sira-nia hakarak, maibé banhira Maromak Ninia lia-fuan xoke ho pratika fiar lokal, ema fila kotuk ba lia-loos Jesus nian.
Bainhira ita komesa kompara ita-nia fiar traditionál ho Jesus Ninia hanorin, halo ita la gosta Jesus Ninia hanorin. Iha kondisaun ida hanesan ne'e lia-loos Maromak nian ofende ema sira ne'e "Maibé Jesus hatene katak ninia dixípulu sira muramura kona-ba neʼe, no nia dehan ba sira: “Ida-neʼe halo imi sidi ka?". Partikularmente, ema sira ne'e la gosta tamba saida mak Jesus reklama kona-ba Ninia aan. Jesus dehan "Nia mak paun moris", Nia hanorin atu tau fiar ba Nia no Nia fó moris rohan-laek.
La'os de'it ema senti dutrina ne'e todan, maibé sira mós odi. Seraké iha ita nia moris tamba de'it Pastor sira ko'alia lia-loos hosi Bíblia halo sira sai ita-nia inimigu? Ha'u lembra Padre Juvito foin dadauk durante Finadu bainhira ko'alia kona-ba mate-bian hetan reasaun maka'as los. Jesus hatete "Mundu la bele odi imi, maibee mundu odi Hau. Tanba Hau foo sasin kona ba sira, katak buat nebee sira halo mak aat" João 7:7. Ema akuza Jesus hanesan lohi-teen "No iha povu nia leet ema murmura barak kona ba Nia. Balu dehan, “Nia ema diak.” Ema seluk dehan, “Lae; Nia lori povu ba dalan sala.” João 7:12. Konsekuensia boot bainhira ita desidi tuir ema ne'ebé ema barak odi no lagosta.
Bainhira ema barak fila kotuk lakohi tuir tan Jesus, ida ne'e halo Nia tristi, no Jesus husu ba Ninia dixipulu sira "Nunee Jesus dehan ba sira nain sanulu resin rua, “Imi mos hakarak baa ka?” Simão Pedro hataan ba Nia, “Nai, ami atu baa ho see loos? O mak iha liafuan moris rohan laek nian. Ami fiar no hatene duni katak O mak Ida Nebee Santu hosi Maromak.” João 6:67-69 BK
Ida ne'e lia-loos ne'ebé iha podér boot. Jesus iha lia-fuan kona-ba moris rohan-laek. Nia mak Santu hosi Maromak no Nia ita tenke banati no la'o tuir.
Maromak tulun ita no lori ita ba moris rohan-laek 🙏
Ref. John 6:60-7:13
Ema Barak Husik Jesus
60 Bainhira Ninia eskolante sira rona tiha liafuan nee, barak dehan, “Liafuan nee todan. See mak bele rona?” 61 Maibee Jesus hatene iha Ninia laran katak Ninia eskolante sira murmura kona ba liafuan nee. Nunee Nia dehan ba sira, “Liafuan nee halo imi monu ka? 62 Entaun imi hanoin nusaa, se karik imi haree Ema Nia Oan sae ba fatin nebee uluk Nia hela? 63 Espíritu mak foo moris; isin la folin buat ida. Liafuan nebee Hau koalia ona ba imi mak espíritu no moris. 64 Maibee imi balu la fiar.” Tanba Jesus hatene hori uluk kedas,i see mak la fiar, no ida nebee sei faan Nia. 65 No Nia dehan, “Tanba nee mak Hau dehan ba imi katak la iha ema ida bele mai iha Hau, só deit nia nebee Aman foo lisensa atu mai.”
66 Liu tiha tempu nee, Jesus nia eskolante sira barak fila kotuk no lakohi lao tan ho Nia. 67 Nunee Jesus dehan ba sira nain sanulu resin rua, “Imi mos hakarak baa ka?” 68 Simão Pedro hataan ba Nia, “Nai, ami atu baa ho see loos? O mak iha liafuan moris rohan laek nian. 69 Ami fiar no hatene duni katak O mak Ida Nebee Santu hosi Maromak.” 70 Jesus hataan ba sira, “Laos katak Hau rasik mak hili imi nain sanulu resin rua? Maibee ema ida hosi imi mak diabu ida.” 71 Nia koalia kona ba Judas, Simão Iskariotes nia oan. Tanba nia mak ida nebee sei faan Jesus, maski nia mak ida hosi sira nain sanulu resin rua. João 6:60-71
João 7:1-13
Jesus Tuir Festa Tenda
1 Tuir mai, Jesus lao ba-mai iha Galileia. Nia la lao ba-mai iha Judeia, tanba ema Judeu sira buka atu oho Nia. 2 Ema Judeu sira nia Festa Baraka besik ona.a 3 Nunee Ninia alin sira dehan ba Nia, “Sai hosi fatin nee, no baa Judeia, hodi O nia eskolante sira mos bele haree buat nebee O halo. 4 Tanba se karik ema ida hakarak sai ema konhesidu, nia la servisu sub-subar deit. Se O halo buat sira nee, hatudu aan ba mundu.” 5 Tanba Ninia alin sira mos la fiar ba Nia. 6 Jesus dehan ba sira, “Hau nia tempu seidauk too. Maibee imi nia tempu iha nafatin. 7 Mundu la bele odi imi, maibee mundu odi Hau. Tanba Hau foo sasin kona ba sira, katak buat nebee sira halo mak aat. 8 Imi sae ba no tuir festa nee. Hau lab baa festa nee tanba Hau nia tempu seidauk too.” 9 Koalia tiha nunee, Nia hela iha Galileia.
10 Maibee bainhira Ninia alin sira baa tiha ona, depois Nia mos sae ba festa. Nia la baa hodi ema hatene, maibee Nia baa nonook deit. 11 Ema Judeu sira buka Nia iha festa, no dehan, “Nia iha nebee?” 12 No iha povu nia leet ema murmura barak kona ba Nia. Balu dehan, “Nia ema diak.” Ema seluk dehan, “Lae; Nia lori povu ba dalan sala.” 13 Maibee ema la koalia kona ba Nia iha ema barak nia oin tanba sira tauk ema Judeu sira.
0 comments:
Post a Comment