No hau halo orasaun katak imi nia domin bele aumenta ba beibeik ho matenek no kompriensaun hotu, hodi imi bele hatene lo-loos saida mak diak liu. Nunee imi bele sai moos no la iha sala iha Kristu nia loron. Filipe 1:9-10 BK
Iha versíkulu sira-ne'e, apóstolu Paulo hato'o orasaun furak ba ema kristaun sira iha Filipe. Nia harohan katak sira-nia domin sei kontinua aumenta. Maibé domin ne'e la'ós de'it kona-ba sentimentu. Apóstolu Paulo hakarak sira-nia domin, koñesementu no sabedoria atu krese ka sai buras.
Nu'udar ema kristaun, importante tebes atu hadomi ema seluk. Maibé importante mós atu krese iha sabedoria ka matenek kle'an kona-ba Maromak Ninia dalan sira. Kuandu ita hatene didi'ak Maromak liuhusi ninia Liafuan, ita bele hadomi liután Maromak. Domin hanesan ne'e ajuda ita atu halo desizaun ne'ebé di'ak liu iha ita-nia moris loronloron. Ne'e ajuda ita atu hatene saida mak loos no saida mak di'ak liu iha ita-nia moris loronloron. Kuandu ita krese iha domin no sabedoria iha ita-nia moris, Ida ne'e halo Maromak kontente liután.
Na'i Jesus promete sei fila fali mai mundu ne'e (lee iha João 14:1-3). Nune'e Apóstolu Paulo mós hakarak ita atu sai "moos no la iha sala" bainhira Jesus fila fali mai mundu ida ne'e. Ida-ne'e signifika moris iha dalan ne'ebé fó glória ba Maromak no hasees an husi sala sira. Sala mak kontra Maromak Ninia ukun-fuan sira (1 João 3:4). Ita la bele hases an hosi Sala uza ita-nia forsa mesak de'it, maibé ho Maromak nia ajuda, ita bele kontinua krese espiritualmente loroloron.
Mai ita halo ida ne'e sai mós ita-nia orasaun hodi dehan: "Nai, ajuda hanorin mai ami ita-nia dalan loos sira. Fo mai ami kompriensaun, atu nune'e ami sempre hili buat ne'ebé loos no di'ak liu tuir ita boot Ninia hakarak. Ajuda ami atu moris ho laran-moos no fiél, atu halo Ita kontente"
Reflesaun:
Husu Maromak atu ajuda ita atu haburas domin no matenek. Hanoin to'ok kona-ba dalan ida-ne'ebé ita bele hatudu domin ne'ebé matenek no laran-di'ak ba ema seluk iha semana ne'e.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment