Versu prinsipál: 1 Koríntios 10:6–12
Agora, buat sira ne’e akontese ba sira nu'udar ezemplu. No buat sira nee hakerek hodi fó hanoin ba ita, ne'ebé moris iha tempu nia rohan. 1 Korinto 10:11
Bíblia la hakerek de’it istória kona-ba ema ne’ebé fiél no halo buat di’ak. Bíblia mós hatudu istória kona-ba ema ne’ebé dezobedese ba Maromak, adora ídolu, halo imoralidade seksuál, koko Maromak, hirus no kontra Maromak.
Tanbasá mak Maromak permite istória hirak ne’e atu hakerek iha Bíblia? Tanba Nia hakarak ita aprende husi sala sira ne’e, atu ita labele repete hahalok hanesan.
Iha 1 Koríntios 10:6–12, apóstolu Paulo uza esperiénsia povu Israel iha tempu uluk atu fó avizu ba kristaun sira iha Korintu. Maski Maromak lori Israel sai husi rai Ejitu, fó hahán manna no bee ba sira iha rai-fuik maran, ema barak nafatin la fiar no dezobedese ba Maromak.
Paulo esplika katak buat hirak ne’e hakerek ona atu sai ezemplu no avizu ba ita. Nia hakarak ita aprende husi sira-nia sala, atu ita labele monu iha tentasaun hanesan.
Saida mak Maromak hakarak ita aprende husi istória hirak ne’e?
1. Labele hakarak buat aat. (1 Korínto 10:6)
Povu Israel iha rai-fuik maran hakarak buat ne’ebé la halo Maromak kontente. Sira haluha bénsaun ne’ebé Maromak fó ba sira no kontinua halo tuir sira-nia hakarak rasik.
Ita mós tenke kuidadu ho ita-nia hakarak sira. Dala ruma ita hakarak osan, rikusoin, ksolok ka benefísiu rasik to’o ita lakon prinsípiu moris loos nian no haluha Maromak.
Prátika: Bainhira ita hakarak halo buat ida, husu ba ita-an: “Serake buat ne’e halo Maromak kontente? Serake asaun ne'e ajuda ka estraga hau-nia relasaun ho Nia?”
2. Labele adora ídolu. (1 Koríntios 10:7)
Povu Israel halo ídolu no adora nia, maski sira hatene katak Maromak mak lori sira sai husi rai Ejitu.
Ita mós bele iha ídolu iha ita-nia moris, maski ita la adora imajen ka estatua ruma. Bainhira osan, serbisu, popularidade, telemóvel ka divertimentu sai importante liu Maromak, buat hirak ne’e bele sai mós ídolu ba ita.
Prátika: Tau Maromak iha fatin dahuluk. Labele husik buat mundu nian atu foti tempu no domin hotu ne’ebé ita tenke fó ba Maromak.
3. Labele halo hahalok imorál. (1 Korínto 10:8)
Paulo temi kona-ba povu Israel ne’ebé komete imoralidade seksuál. Hahalok ne’e lori konsekuénsia aat ba sira.
Ita mós moris iha mundu ne’ebé iha tentasaun barak liuhusi televizaun, internet no influénsia husi ema seluk. Ita tenke proteje ita-nia hanoin no hahalok.
Prátika: Hili buat ne’ebé ita haree no rona. Fó respeitu baxjuramentu kazal sira-nian, família no ema seluk. Bainhira tentasaun mai, sees husi situasaun ne’ebé bele lori ita ba sala.
4. Labele koko Maromak no labele murmura. (1 Koríntios 10:9–10)
Povu Israel dala barak komplika no murmura hasoru Maromak no Moisés. Maski Maromak ajuda sira, sira kontinua keixa no duvida Nia kuidadu.
Ita mós dala ruma murmura bainhira buat la lao tuir ita-nia hakarak. Ita bele murmura kona-ba família, igreja, serbisu ka situasaun moris nian.
Prátika: Bainhira problema mai, labele murmura de’it. Halo orasaun, agradese ba bénsaun ne’ebé ita iha, no buka solusaun ho fiar ba Maromak.
5. Labele fiar katak ita forte demais no labele monu. (1 Koríntios 10:12)
Paulo fó avizu: ema ne’ebé hanoin katak nia hamriik metin, tenke kuidadu atu Nia labele monu.
Dalaruma ita hanoin katak ita forte iha fiar, tanba ita ba igreja, lee Bíblia no halo orasaun. Maibé se ita la kuidadu, ita mós bele monu iha tentasaun.
Prátika: La depende ba ita-nia forsa rasik. Halo orasaun loroloron, estuda Bíblia, husu Espíritu Santu atu gia ita, no simu ajuda husi ema fisr nain sira bainhira ita presiza.
Oinsá mak ita bele uza istória Bíblia nian atu proteje ita-nia moris espirituál?
- Bainhira ita lee kona-ba ema ne’ebé dezobedese ba Maromak, aprende husi nia sala.
- Bainhira ita lee kona-ba ema ne’ebé fiél, aprende husi nia ezemplu di'ak sira.
- La repete hahalok aat maski ema barak halo hanesan ne’e.
- Ezamina ita-nia laran no husu Maromak atu hatudu ita-nia frakeza sira.
- Se ita monu ba sala, arrepende no fila fali ba Maromak.
- Ajuda ita-nia oan sira no família atu aprende husi istória Bíblia nian.
Pergunta ba ita-an: Bainhira hau lee istória kona-ba povu Israel ne’ebé dezobedese ba Maromak, serake ha'u aprende husi sira-nia sala ka hau kontinua halo buat hanesan ne’e iha hau-nia moris?
Liafuan importante: Maromak inspira profeta sira atu hakerek istória no mensajen iha Bíblia, atu ita bele aprende, hetan avizu no hatene dalan ne’ebé loos. Istória kona-ba rebeliaun no hahalok lafiar la hakerek atu ita lee de’it, maibé atu ita evita sala ne'ebé hanesan.
Lembra Paulo nia avizu iha 1 Koríntios 10:12: ema ne’ebé hanoin katak nia hamriik metin, tenke kuidadu atu nia labele monu. Tanba ne’e, labele fiar de’it ba ita-nia kapasidade. Loroloron, depende ba Maromak no husik Nia gia ita-nia moris.
Dalan ba Lalehan mak dalan ne’ebé ita aprende husi Maromak Nia Liafuan, rejeita sala no kontinua la'o tuir Jesus.
Orasaun: Aman Maromak, obrigadu tanba Ita fó Bíblia mai ami atu sai matadalan ba ami-nia moris. Ajuda ami atu aprende husi istória povu Israel nian no evita sira-nia sala. Proteje ami husi ídolu, tentasaun, orgullu no murmúra. Fó ami laran atu fiar no obedese ba Ita. Bainhira ami fraku, hametin no ajuda ami atu la monu iha tentasaun. Gia ami atu kontinua la’o iha Dalan ba Lalehan, no lao tuir Jesus loroloron. Iha Jesus nia naran, ami harohan. Amen.
🙏 MAROMAK FO BENSAUN🙏🏻
Click iha ne'e atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment