Serake susar bele haforsa ita-nia fiar?

Eskritura xave: Tiago 1: 2-4 

Hau-nia maun-alin sira, haksolok ba bainhira imi hasoru susar oi-oin. Tanba imi hatene katak bainhira sira koko imi-nia fiar, rezultadu mak imi tahan hela. Tahan to'o rohan atu nune'e imi bele sai perfeitu no kompletu, no la falta buat ida. Tiago 1:2-4

                               Tiago 1:2-4

La iha ema ida mak gosta problema. 

Ita triste kuandu lakon ita-nia servisu. Ita preokupa kuandu osan la to'o. Ita tanis kuandu ema ruma ne'ebé ita hadomi moras. Ita sente desapontadu kuandu ema hatudu hahalok-aat ba ita. 

Entaun Tiago hatete buat ne'ebé estrañu: 

"haksolok ba bainhira imi hasoru susar oi-oin." 

Serake Tiago hatete katak ita tenke kontente tanba ita iha problema? Lae. 

Nia hatudu katak ita bele iha esperansa iha ita-nia problema nia laran tanba Maromak bele uza tempu susar atu hametin ita-nia fiar. 

Susar sira bele hanorin ita atu iha pasiénsia 

Tiago hatete katak teste ba ita-nia fiar, hamosu pasiénsia (Tiago 1: 3). 

Hanoin kona-ba toos-nain ida. 

Toos-nain ida labele kuda fini ohin no espera atu han ai-fuan aban. Nia tenke hein. Nia rega bee ba ai-horis sira-ne'e, hasai du'ut aat, no hein to'o koá. 

Ita-nia moris kristaun bele mós hanesan ne'e. 

Dala ruma Maromak husik ita hasoru situasaun susar sira atu ita aprende atu tau fiar ba Nia no hein. 

Kuandu ita la hetan resposta kedas ba ita-nia orasaun, kontinua halo orasaun. 

Kuandu ita-nia família nia problema la hotu lalais, kontinua tau fiar ba Maromak. 

Kuandu susar ba ita atu halo serbisu, kontinua halo buat ne'ebé loos. 

Kuandu ema ruma hakanek Ita, husu forsa hosi Maromak atu fó perdua ba ema ne'e. 

Kada situasaun susar hotu-hotu bele sai oportunidade atu krexe liután. 

Susar bele halo ita maduru liután 

Tiago hatete: "Tahan to'o rohan atu nune'e imi bele sai perfeitu no kompletu, no la falta buat ida."Tiago 1:4

Liafuan "perfetu" iha ne'e katak maduru ka kompletu. Maromak hakarak ita atu sai ema kristaun ne'ebé forte no maduru liután. 

Ai-huun ida-ne'ebé moris iha fatin ne'ebé iha anin maka'as, dala barak iha abut ne'ebé kle'an. Nune'e mós, susar sira bele ajuda ita dezenvolve fé ne'ebé nia abut kle'an liután iha Maromak. 

Maibé iha buat importante ida: susar sira la automatikamente halo ita sai forte liután. 

Ita tenke husik Maromak serbisu iha ita-nia moris liuhusi susar sira-ne'e. 

Ema na'in rua bele hasoru problema hanesan. Ema ida sai hirus no la'o dook husi Maromak. Ida seluk hatete: "Nai, ha'u la komprende ida-ne'e, maibé ha'u sei kontinua tau fiar ba Ita." 

Ema segundu husik susar atu hametin fiar. 

Entaun saida mak ita bele halo bainhira problema mosu? 

Halo orasaun duke rende. 

Tuirmai, Tiago hatete: "Se imi ida falta matenek klean, nia bele husu ba Maromak. Maromak sei fó matenek kle'an ho laran luak no la buka sala. Maromak sei foo ba ema nee." Tiago 1:5

Lee Maromak nia Liafuan. Maromak Nia promesa sira fó forsa mai ita kuandu ita sente fraku. 

Ko'alia ho ema kristaun ne'ebé maduru. 

Keta terus mesak de'it. Husik ema seluk halo orasaun hamutuk ho Ita no fó korajen ba Ita. 

Buka hatene saida mak Maromak hanorin ita liuhusi terus sira-ne'e. Husu: "Nai, saida mak ha'u bele aprende husi situasaun ne'e?" 

Kontinua halo buat ne'ebé loos. Situasaun susar la'ós razaun ba ita atu bosok, lohi, sai violentu, ka husik ita-nia fiar ba Maromak. 

Lembra. Maromak nunka promete katak ema kristaun sei la iha problema. Jesus hatete: " Iha mundu nee imi sei hetan susar. Maibee aten brani ba; Hau manaan tiha ona mundu." João 16:33

Ohin loron, ita-nia susar bele mosu, maibé Maromak bele uza ida-ne'e atu hametin ita-nia fiar, hatudu pasiénsia boot liután, no hatudu hahalok hanesan Kristu.

Tan ne'e, kuandu problema mosu, keta husu de'it: "Tanbasa mak ida-ne'e akontese mai ha'u?" Maibé husu mós: "Nai, oinsá mak Ita bele uza esperiénsia ne'e atu ajuda ha'u-nia fiar atu krexe liután?" 

Bainhira ita tau fiar ba Maromak liuhusi susar hotu no husik Nia hametin ita-nia fiar no karakter, ita kontinua la'o ba oin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Saida mak akontese ba avo sira ne'ebé mate la hatene Jesus?

Eskritura xave: Roma 5: 8 

                                  Roma 5: 8 

Maibé Maromak hatudu Ninia domin ba ita ho ida ne'e: Bainhira ita sala nain hela, Kristu mate tanba ita. Roma 5:8

Ita barak husu pergunta difisil: 

"Saida mak akontese ba ita-nia bei'ala sira ne'ebé mate antes sira hatene kona-ba Jesus?" 

Karik ita-nia avo, inan-aman, ka família seluk nunka iha oportunidade atu lee Biblia ka rona ho klaru kona-ba Kristu. Serake Maromak kondena de'it sira tanba sira la hatene Jesus? 

Bíblia fó resposta importante ida: Maromak mak domin, imparsiál, no justu. 

Maromak hatene naroman ka lia-loos saida mak ema ida-idak simu durante sira-nia moris.

Roma 5: 8 hatete katak Maromak Nia domin boot tebes to'o Kristu mate ba ema sala-na'in sira. Maromak Nia salvasaun la limite de'it ba ita-nia família nia background, orijin, língua, ka tempu ne'ebé ita moris mai. 

Bíblia hatete: "La'os Juis ba mundu tomak sei halo loos? Jénesis 18:25

Maromak hatene ema hotu di'ak liu fali ita. Nia hatene buat ne'ebé ita-nia bei'ala sira hatene, buat ne'ebé sira la hatene, oportunidade saida mak sira iha, no buat ne'ebé iha sira-nia laran. 

Jesus hatete katak ema sei simu responsabilidade tuir naroman ne'ebé sira simu (Lucas 12:47-48). Paulo mós esplika katak Maromak bele fó sai Ninia ezisténsia no grasa liuhusi kriasaun no konxiensia (Roma 1: 19-20; 2:14-16). 

Tan ne'e, ita labele julga katak ema ida la hetan salvasaun tan de'it sira la hatene Jesus Nia naran. 

Maibé oinsá mak ema ida bele hetan salvasaun se la iha Kristu? Ida ne'e mós importante. La iha ema ida mak hetan salvasaun see la ho Kristu. 

Jesus mak Salvador mesak de'it (Apos 4: 12). Ninia mate iha kruz mak sai nu'udar baze ba salvasaun ba ema hotu. 

Ema sira ne'ebé moris antes Jesus mai, hetan salvasaun liuhusi tau fiar ba Maromak Nia promesa sira. Abrão mak ezemplu di'ak ida. Nia " fiar Maromak, no ida ne'e konsidera hanesan moris loos" (Roma 4: 3). 

Oinsá ho ema sira ne'ebé hela dook no nunka rona Evanjellu? 

Ita bele fiar katak Maromak sei julga ema ne'e ho justu. Ita la hatene buat hotu ne'ebé Maromak hatene. 

Saida mak akontese bainhira ema ida mate? 

Bíblia hanorin katak ema ne'ebé mate la moris no hela iha fatin ruma. Mate hanesan toba-dukur (João 11: 11-14; Eclesiastes 9:5). 

Akontesimentu boot tuirmai ba sira ne'ebé fiar ba Maromak mak resuresaun ka moris-hias. 

Jesus dehan: "Keta admira kona ba ida nee, tanba oras sei mai bainhira ema hotu ne'ebé iha rate laran sei rona Ninia lian, no sira sei sai mai." João 5:28-29

Tan ne'e, ita la presiza hanoin katak ita-nia bei'ala sira ne'ebé mate ona hetan terus iha fatin ruma ohin loron. Ita bele tau sira iha Maromak Nia liman no tau fiar ba Ninia julgamentu ne'ebé perfeitu. 

Saida mak ita tenke halo ohin loron? 

Duke gasta ita-nia enerjia tomak hodi hanoin kona-ba saida mak akontese ba ema ne'ebé mate ona, ita tenke husu: 

"Saida mak ha'u halo ona ho naroman ne'ebé Maromak fó mai ha'u?" 

Se ita hatene Jesus, la'o tuir Ninia hanorin ohin. Labele hein!

Se Ita seidauk estuda Biblia ho sériu, hahú estuda ohin. Labele hein!

Se iha ema ruma ne'ebé sei moris iha ita-nia família ne'ebé seidauk hatene Jesus nia hanorin, fahe Ninia domin no hanorin lia-loos ba sira. Keta hein!. 

Ita-nia bei'ala sira-nia oportunidade liu tiha ona. Ita-nia oportunidade mak ohin. 

Roma 5: 8 fó esperansa furak mai ita: Maromak hadomi ita kuandu ita sei sala-na'in hela. Nia la hein to'o ita sai ema perfeitu. Nia haruka Kristu mai atu salva ita. 

Tan ne'e ita bele husik ita-nia bei'ala sira iha Maromak ne'ebé domin na'in no justu nia liman. Ita bele fiar katak Juis ba mundu tomak sei sempre halo buat ne'ebé loos. 

Kuandu ita sei moris hela, mai ita simu Maromak Nia domin, la'o tuir Jesus, no ajuda ema seluk atu hatene kona-ba Jesus Ninia hanorin sira.

Pergunta ne'e la'ós de'it: "Saida mak akontese ba sira ne'ebé mate ona?" Pergunta ba ita mak: " Saida mak ha'u sei halo ba Jesus ohin?" 

Kuandu ita tau fiar ba Maromak Nia justisa, simu Kristu nlNia grasa salvasaun, no fahe Ninia domin ba sira ne'ebé sei moris hela, ita kontinua la'o hamutuk ho laran-metin iha Dalan ba Lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu Estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Read More

Oinsá mak ema sira neʼebé mate iha antigu Testamentu hetan salvasaun?

Eskritura xave: Roma 5: 8 

Maibé Maromak hatudu Ninia domin ba ita ho ida ne'e: Bainhira ita sala na'in hela, Kristu mate tanba ita. Roma 5:8

                                   Roma 5:8

Karik Ita hanoin: "Jesus mate maizumenus tinan 2,000 liubá. Oinsá ho Abrão, Moises, David no ema seluk ne'ebé moris antes Jesus mai? Oinsá mak sira bele hetan salvasaun kuandu Jesus seidauk mate? 

Ne'e mak pergunta importante ida. 

Resposta ne'ebé simples mak: Maromak salva ema iha Testamentu tuan liuhusi Maromak Nia grasa hanesan mós Nia salva ita ohin loron, liuhusi fiar ba Jesus. Maibé ninia diferensa mak: sira haree ba futuru no hein Mesias ne'ebé atu mai, maibé ita haree fali ba kotuk ba Mesias ka Salvador ne'ebé mai ona.  

Sira tau fiar ba Maromak Nia promesa sira.

Husi tempu uluk kedas, Maromak promete katak Salvador ida sei mai. 

Bainhira Adão no Eva monu ba sala, Maromak promete katak ikus mai samea ne'e sei lakon (Genesis 3:15). Liutiha tempu balu, Maromak promete ba Abrão katak liuhusi ninia família "nasaun hotu iha mundu sei hetan bénsaun" (Genesis 22: 18). 

Abrão fiar ba Maromak. Bíblia hatete: 

 "Abrão fiar ba Maromak, no Maromak sura fiar ne'e nu'udar moris loos.” Roma 4:3

Abrão la hatene Jesus Nia naran hanesan ita hatene ohin loron. Nia la haree krús. Maibé nia tau fiar ba Maromak Nia promesa sira. 

Sakrifísiu sira iha Testamentu Antigu mós fó-hanoin kona-ba Jesus Ninia sakrifísiu. Kuandu ema sala-na'in ida lori bibi-malae oan ida hodi halo sakrifísiu, bibi ne'e la kasu nia sala. Ida-ne'e hanesan símbolu ida-ne'ebé hatudu katak Kristu ne'ebé sei mai mate iha kruz hodi kasu sala.

Tuirmai João Batista hatete ba Jesus: 

 “Haree ba, Maromak Nia Bibi Oan neʼebé kasu mundu nia sala!” João 1:29

Sakrifísiu husi Testamentu Antigu mak hanesan sinál trafiku ida iha dalan. Sinál ne'e la'ós destinasaun. Sinal ne'e hatudu fatin ka destinasaun ne'ebé ita atu ba.

Maibé, oinsá ho ema ne'ebé halo sala no mate maibé sira nunka hatene buat hotu kona-ba Maromak nia planu? 

Maromak ne'e justu no hatene ema hotu nia laran. Abrão tau fiar ba buat ne'ebé Maromak promete ona ba nia. Ita responsavel ba naroman no lia-loos ne'ebé Maromak fó mai ita (Deuteronomio 29:29, Roma 2:12-16).

Maromak la salva ema tanba sira komprende detallu hotu kona-ba planu salvasaun nian. Nia salva ema tanba Ninia grasa, ne'ebé ema ida simu liuhusi fiar. 

Grasa ne'ebé hanesan mós disponivél ba ita ohin loron. 

Ita hatene liu fali Abrão. Ita hatene katak Jesus mai ona. Ita hatene katak Nia mate tanba ita-nia sala no moris hi'as fali ona (1 Korinto 15: 3-4). 

Tan ne'e, ita iha razaun ne'ebé di'ak liu atu tau fiar ba Maromak. 

Ohin loron, ida-ne'e signifika saida ba ita? 

Karik Ita hanoin: "Hau halo ona buat-aat barak liu. Maromak labele fó perdua ha'u." Maibé haree fali Roma 5: 8. Kristu mate tanba ita kuandu ita sei sala-na'in hela. 

Jesus la hein ita to'o sai ema di'ak antes Nia hadomi ita. Se ita halo ona sala, mai ba Jesus ohin. Se ó dook ona husi Maromak, fila fali ba Nia. Se Ita hakanek ona ema ruma, husu perdua no halo buat ne'ebé loos. Se Ita sente la merese, hanoin-hetan krús ne'ebé Jesus mate ba. 

Ita-nia salvasaun la depende ba ita-nia di'ak. Ida-ne'e depende ba Maromak Nia domin no depende ba Kristu nia sakrifísiu. Ita nia parte so fiar no obedese ka halo tuir de'it.

Ema sira iha Testamentu Antigu hetan salvasaun liuhosi tau fiar ba Maromak Nia promesa atu salva ema. Ita hetan salvasaun liuhusi tau fiar ba Salvador ne'ebé mai ona. 

Salvador ida de'it. Sakrifísiu ida de'it. Grasa ida de'it. No Salvador ne'e mak Jesus Kristu. 

Bainhira ita tau fiar ba Maromak Nia grasa ne'ebé fo esperansa ba ema hotu, mai ita haree ba Jesus no kontinua la'o ho laran-metin iha dalan ba lalehan.

🙏 MAROMAK FO BENSAUN🙏🏻

🎗️🎗️🎗️🎗️🎗️🎗️🎗️🎗️🎗️🎗️🎗️

Click iha ne'e atu estuda Maromak ninia lia-fuan 📝

Youtube: Hope Channel Timor Leste

Facebook : Hope Channel Timor-Leste

#hopechanneltimorleste #AWRTimoLeste

#dalanbalalehan.blogspot.com

🪷🪷🪷🪷🪷🪷🪷🪷🪷🪷🪷🪷🪷🪷🪷🪷

Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL

Favór fahe tutan KARIK LA MOE kona-ba Maromak Nia futarlia.

"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26

🙏🌹🙏🌹🙏🌹🙏🌹🙏🌹🙏

Maluk sira ne'ebé Kristu hadomi, 

Ami konvida ita-boot sira atu like, share no follow pájina Dalan ba Lalehan. Ami-nia misaun mak atu fahe Maromak Nia Liafuan ho língua ne'ebé simples no fasil atu nune'e ema hotu bele komprende mensajen salvasaun nian liuhusi Jesus Kristu

Favór like, follow, no share pájina ida ne'e ba ita-nia família no kolega sira. Atu nune'e, bele ajuda habelar lia-loos husi Maromak no tau esperansa ba ema hotu iha mundu tomak. 

Obrigadu ba imi-nia suporta. Ha'u espera katak Maromak sei haraik bénsaun barak ba imi bainhira ita halo viajen espirituál hamutuk iha dalan ba lalehan. 

 Like • Follow • Share • Maromak fo bensaun! 🙏📖✨

Read More