Lee Biblia: 2 Korinto 7: 9-11
Karik Ita halo ona buat ruma ne'ebé sala no depois Ita sente triste tebes kona-ba hahalok-ne'e? Karik Ita hakanek ema ruma, ko'alia lia-bosok, lakon kontrola aan no hasai liafuan aat, ka halo desizaun ne'ebé la loos. Triste ne'e bele halo ita sente laran-kanek. Maibé Biblia hatete katak triste balu bele lori bénsaun ba ita.
Paulo kontente tebes tanba ema Korinto esperiensia ona buat ne'ebé Biblia bolu nu'udar "tristi tuir Maromak" (Godly sorrow). Paulo nia karta uluk neebe envia ba sira halo sira triste, maibé sira-nia triste halo sira muda sira-nia hahalok. Sira la sente laran-tun no kontinua moris ho hahalok aat. Sira nia triste lori sira ba arrependementu.
Paulo hatete: "Tanba laran tristi tuir Maromak halo ita arepende no hetan salvasaun no ita la hanoin fali sala ne'e. Maibee laran tristi tuir mundu halo ita mate. 2 Korinto 7:10
Saida mak laran triste tuir Maromak ka godly sorrow ?
Laran triste tuir Maromak mak triste ne'ebé ita sinte tamba hakanek ona Maromak Nia laran.
Porezemplu, labarik ida halo rahun buat ruma no sai ta'uk tanba inan-aman bele fó kastigu ba nia. Ida-ne'e la'os triste tuir Maromak.
Maibé hanoin to'ok, labarik ne'e hatete: "Hau halo sala. Ha'u hakanek ona ha'u-nia inan-aman. Ha'u presiza ko'alia lia-loos no husu perdua." Ida-ne'e mak mazumenus deskrisaun ne'ebé besik liu ho triste tuir Maromak.
Triste tuir Maromak halo ita hateke ba Maromak, la'ós halai husi Nia.
Ita hatene katak ita-nia triste ne'e triste tuir Maromak bainhira ida-ne'e hamosu mudansa iha ita-nia moris.
Duke hatete: "Deskulpa," no halo fali sala ne'ebé hanesan, ita komesa dehan:
"Nai, muda ha'u-nia laran. Ajuda ha'u atu la halo sala tan."
Ema Korinto sira hatudu sira-nia arependementu liuhusi muda sira-nia hahalok. Sira-nia triste hamosu seriadade, hakarak atu halo buat loos, no hakarak atu hadi'a sira-nia hahalok-aat (2 Korinto 7: 11).
Serake Ita esperiensia ona triste tuir Maromak? Karik Ita esperiensia ona.
Karik espíritu santu fó-hanoin ita kona-ba buat ne'ebé ita halo sala ona. Ita sente triste tebes, la'ós de'it tanba ema hatene Ita halo sala, maibé tanba Ita hatene katak Ita-nia sala hakanek Maromak no karik hakanek ema seluk mós.
Ita halo orasaun. Ita konfesa Ita-nia sala. Ita husu perdua. Depois ne'e, Ita foti asaun hodi muda ita-nia hahalok.
Ne'e mak Maromak Nia serbisu furak ida iha ita-nia laran.
Triste tuir Maromak la husik ita la iha esperansa. Ida-ne'e lori ita fila fali ba Jesus.
Tan ne'e, se Ita sente triste tanba halo buat ruma ne'ebé sala, keta ignora ida ne'e. Keta subar an husi Maromak. Mai hasoru Nia liuhusi orasaun.
Konfesa Ita-nia sala. Husu perdua. Halo buat ne'ebé loos bainhira posivél. Tuirmai tau fiar ba Maromak atu ajuda ita atu bele moris diferente, moris tuir Maromak Nia hakarak.
Ba Jesus Nia dixipulu ne'ebé loos, iha ksolok boot kuandu sala na'in ida fila fali ba Maromak.
Dalan ba lalehan la'ós moris ne'ebé la iha sala. Ne'e mak moris ne'ebé kontinua fila fali ba Jesus hodi husik Nia fó perdua, transforma no lidera ita ba moris rohan-laek.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click atu Estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment