Lee Biblia: Galasia 5:22-23
Maibee Espíritu nia ai-fuan mak ne'e: domin, ksolok, dame, pasiénsia, laran diak, hahalok diak, fidelidade, laran maus no kontrola aan. La iha lei ida mak kontra buat sira nee. Galásia 5:22-23
Bainhira ita haree ba ai-fuan ida, dala barak ita bele hatene nia mai hosi ai-huun ida ne'ebé. Ai-sabraka ida prodús sabraka. Ai-has ida prodús has. Ai-fuan sira-ne'e fó-hanoin ita kona-ba sira-nia ai-huun.
Nune'e mós, ema bele haree saida mak akontese iha ita-nia laran liuhusi haree ba ita-nia moris loroloron.
Paulo hatete katak "Espíritu nia ai-fuan mak ne'e: domin, ksolok, dame, pasiénsia, laran diak, hahalok diak, fidelidade, laran maus no kontrola aan" (Galasia 5:22-23).
Fuan sira ne'e la'os kualidade moris nian ne'ebé Ita tenta atu prodús rasik. Maibé fuan sira ne'e mak rezultadu hosi Espíritu santu Nia serbisu iha ita-nia moris.
Ai-fuan sira-ne'e haree hanesan saida iha ita-niamoris loroloron?
Domin katak tau matan ba ema seluk, maski sira la bele fó fali buat ida ba ita.
Haksolok katak ita iha esperansa ba Maromak maski hasoru susar iha ita-nia moris.
Dame katak tau fiar ba Maromak duke husik ta'uk kontrola ita-niamoris.
Pasiénsia katak kalma nafatin bainhira ema ruma lentu, susar atu komprende, ka la justu.
Laran-di'ak simplesmente bele hatudu liuhusi ajuda idozu sira, fó korajen ba ema ne'ebé deskorajen, ka ko'alia ho laran-di'ak ba labarik sira.
Hahalok -di'ak katak hili buat ne'ebé loos maski la iha ema ida mak haree.
Fidelidade mak halo tuir ita-nia promesa no fiél nafatin ba Maromak, ba ita-nia família, ita-nia serbisu, no responsabilidade sira.
Laran-maus katak ita iha forsa ne'ebé kontroladu. Ita la presiza hakilar ka hakanek ema seluk atu hatudu katak ita forsa.
Kontrola an katak hatete "lae" bainhira ita-nia sentimentu ka hakarak haruka ita atu halo buat ruma ne'ebé sala.
Oinsá mak ai-fuan sira-ne'e bele krexe iha ita-nia moris?
Ai-huun ida labele fó fuan liuhosi esforsu maka'as. Nia presiza rai di'ak, bee, loro-matan, no tempu atu krexe.
Ita-nia moris espirituál mós hanesan. Ita presiza mantein ligasaun ho Jesus liuhusi orasaun, Maromak nia Liafuan, no halo tuir Ninia hanorin sira loroloron.
Kuandu ema ruma halo Ita hirus, para no halo orasaun antes Ita hatán. Kuandu ita hetan tentasaun atu bosok, hili lia-loos. Kuandu ema ruma presiza ajuda, aproveita oportunidade atu hatudu laran-di'ak.
Kada desizaun ne'ebé ita halo, fo biban ba Espíritu Santu atu serbisu iha ita-nia moris.
Entaun husu ba ita-nia an ohin: Fuan saida mak ema haree iha ha'u-nia moris?"
Se iha ita-nia moris ita haree hirus, la iha pasiénsia, hanoin an de'it, ka la kontrola an, keta rende. Lori hahalok aat sira-ne'e ba Jesus no husu Espíritu Santu atu muda ita-nia laran.
Ita la bele prodús fuan husi Espíritu liuhusi ita-nia forsa rasik. Maibé kuandu ita nafatin besik ba Jesus, Ninia karakter komesa krexe iha ita-nia laran.
Dalan ba lalehan mak viajen ida ne'ebé permiti Jesus transforma ita-nia hahalok loroloron, to'o Ninia karakter ema bele haree iha ita-nia moris loroloron.
🙏 MAROMAK FO BENSAUN🙏🏻
🎗️🎗️🎗️🎗️🎗️🎗️🎗️🎗️🎗️🎗️🎗️
Click iha ne'e atu estuda Maromak ninia lia-fuan 📝
Youtube: Hope Channel Timor Leste
Facebook : Hope Channel Timor-Leste
#hopechanneltimorleste #AWRTimoLeste
#dalanbalalehan.blogspot.com
🪷🪷🪷🪷🪷🪷🪷🪷🪷🪷🪷🪷🪷🪷🪷🪷
Favor vizita dalanbalalehan.blogspot.com no like, follow no share webpage Facebook: Dalan ba Lalehan ka Instagram: hakerek_nanis.ona ka TikTok DBL
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
🙏🌹🙏🌹🙏🌹🙏🌹🙏🌹🙏
0 comments:
Post a Comment