Diabu lakoi mate mesak

Sira hahú hakilar dehan: “Maromak nia Oan, saida mak Ita hakarak husi ami? Ita mai iha neʼe atu kastigu ami maski tempu neʼe seidauk toʼo mai? Mateus 8:29

Bainhira Na'i Jesus hasoru mane ida ne'ebé Demonia (Anju nakukun) tama (kerasaukan) iha Gadara,  Demonia sira hakilar "saida mak Ita hakarak husi ami? Ita mai iha neʼe atu kastigu ami maski tempu neʼe seidauk toʼo mai? Mateus 8:29. Nia resposta mak Loos, Na'i Jesus mai antes tempu to'o mai.

Tempu Ida ne'ebé?  Tempu ne'ebé aponta ka determinadu ona atu hakotu forsa Diabu nian.  Tempu ne'ebé Na'i Jesus temi iha Mateus 25:41 "Tuirmai, nia sei dehan ba sira neʼebé iha nia liman-karuk: ‘Sai tiha husi haʼu-nia oin, imi neʼebé hetan malisan; tama ba ahi neʼebé nunka mate, neʼebé prepara ona ba Diabu no ninia anju sira.

Anju nakukun sira ne'ebé temi iha Mateus 8:29 hatene  katak Maromak determina ona tempu ba sira atu hetan kastigu. Sira hatene katak sira sei hetan sunu iha ahi infernu.  Sira hatene katak sira funu la'os atu hetan Vitoria.  Maibé sira funu atu lori ema barak atu ba hamutuk hó sira atu hetan sunu iha ahi infernu. 

Demonia sira hatene katak Kristu mak sei fó kastigu ba sira iha Loron ikus. Sira hatene Nia no hakilar hó lian maka'as  “tempu seidauk to'o! Ó mai sedu liu!” Demonia hatene katak sira sei hetan kastigu no sira hatene se mak iha podér atu kastigu sira, mak Na'i Jesus Kristu. Demonia sira ta'uk Nia.

Maun alin sira iha Kristu, Diabu no nia Anju nakukun sira hatene katak sira sei la manan Kristu, tan ne'e sira Nia ojetivu la'os atu hetan Vitoria maibé sira nia misaun mak halo tentasaun ba ema barak atu nune'e sira sei la hetan kastigu mesak alias MATE RAME-RAME.

Mai ita hili dalan Kristu nian, la'os dalan Diabu nian. Kaer metin Lia Loos Kristu nian iha Sagrada Bíblia mesmu ema barak ka maioria la tuir. Maioria la garante katak sira la'o tuir dalan loos ba Lalehan.

Konsidera Na'i Jesus Nia liafuan tuir mai "Laʼo liuhusi odamatan kloot bá,  tanba odamatan boot no dalan luan mak lori ema ba mate, no ema barak laʼo liuhusi dalan neʼe. Maibé odamatan kloot no dalan kiʼik tebes mak lori ema ba moris, no ema uitoan deʼit mak hetan dalan neʼe. Mateus 7:13-14

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Mateus 8:29