Ita bele halai hosi Maromak no Nia Lia Loos?

Ema iha tendensia halai hosi Maromak no Nia Lia Loos.  Iha bíblia ita iha ezemplu di'ak rua, Adão no  Jonas.

Adão mak dahuluk ba buat hotu-hotu– Kriasaun, pekadu no halai hosi Maromak. Ita lee kona-ba oinsá Adão hó nia fen halai subar hosi Maromak iha Génesis 3:8.... 

“Liutiha tempu balu, sira rona Na'i Maromak nia lian bainhira nia laʼo iha jardín iha tempu loron malirin,  no mane neʼe no nia feen subar husi Na'i Maromak iha ai-hun sira-nia leet iha jardín" Génesis 3:8

Ita lee iha Jonas 1, Jonas mós tenta halai hosi Maromak. Nia hanoin Maromak iha Joppa, iha ne'ebé Maromak ko'alia hó nia, tan ne'e nia halai ba  Tarshish, tanba nia fiar katak Maromak la iha neebá. Maibé Maromak iha Nineveh, iha Tarshish, iha roo laran, iha tasi laran, iha ikan kiik no boot, etc.

Maromak ne'e  Omnipresent, katak Nia prezensa iha ne'ebé de'it iha tempu hanesan.

Karik Jonah  hela iha tasi laran ne'ebé kle'an tebes, Maromak mós iha neebá. Karik Nia sa'e ba Lalehan, Maromak mós sei hetan nia iha neebá. Karik Nia halo nia toba fatin iha rai laran ne'ebé dook no  nakukun, Maromak Nia naroman sei hetan nia, hanesan Hakerek iha Salmo  139.

Razaun ema halai hosi Maromak mak tanba Maromak ne'e Nia Loos absoluta!

Saida mak Loos absoluta? Loos absoluta mak Lia Loos ne'ebé loos nafatin iha tempu ne'ebé de'it no iha fatin hotu-hotu. Lia Loos ne'e loos ba ema ida nomós ba ema seluk.

Iha kazu dixípulu sira, sira halai hosi Na'i Jesus Nia dutrina.  Lisaun sira ne'ebé Na'i Jesus hanorin ne'e furak tebes tanba ida ne'e hanesan liafuan di'ak ne'ebé fó bensaun ba sira ne'ebé fiar no halo tuir. 

Na'i Jesus  ko'alia no enkoraje Nia dixípulu sira atu firmi iha sira nia fiar, maibé sira balu la fiar no lagosta.  Tan razaun neʼe, Jesus nia dixípulu barak fila fali ba buat neʼebé uluk sira halo no la laʼo tuir tan nia. Tan neʼe, Jesus hatete ba sira naʼin Sanulu-Resin-Rua: “Imi mós hakarak atu bá ka?” João 6:66-67. Ida ne'e mak akontese se ita hases an hosi Na'i Jesus Nia Lia Loos, ita sei fila fali ba buat sira ne'ebé ita uluk halo ne'ebé kontrariu hó Na'i Jesus Nia hanorin.

Oinsá hó ita? Ita sira ne'ebé lakoi ses hosi buat ne'ebé la loos, buat sira ne'ebé kontra bíblia nia hanorin, ikus mai sei halai hosi Lia Loos. Saida mak Lia Loos?  Lia Loos mak Maromak Nia futarlia (João 17:17).

Saida mak Hakerek iha bíblia, atu ita la gosta ka, ita lakoi estuda ka, buat ne'ebé Hakerek iha neebá sei la muda no mantein nune'e nafatin to'o loron ikus Na'i Jesus fila fali mai ba daruak tuir Nia promesa iha João 14:1-3

Ita bele koko halai hosi Maromak no Nia Lia Loos, maibé Lia Loos sei mantein nafatin no sei la muda to'o ita nia destinu to'o mai.

Mai ita tenta moris tuir Lia Loos Maromak nian no lalika tenta atu halai hosi Nia, tanba la iha ema Ida mak bele halai hosi Maromak tanba Nia omnipresence.

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Génesis 3:8