Liafuan "husik" iha Marco 10:7 maihosi liafuan Greek "kataleipo". Liafuan ne'e signifika bá no lori buat ida. Bainhira Na'i Maromak kria Adão no Eva nia hatete ba sira "Iha oan no sai barak bá, halo nakonu no domina rai ne'e..........” (Génesis 1:28). Depoisde inundasaun boot tempu avo Noe nian, ema hotu hamutuk halo tore Babel, Maromak konfundi sira nia lingua no "hosi fatin neʼe Na'i halo sira namkari ba fatin oioin iha mundu tomak" (Génesis 11:9).
Iha tradusaun balu ba Marco 10:7 la inklui "Kaer metin ba Nia fen". Iha versu ne'e Na'i Jesus sita Génesis 2:24. Versu orijinál iha Genesis iha sentidu katak mane ida sei kaer metin ba nia fen bainhira nia separa ho nia inan-aman.
Iha uma kain Judeu nian, karik oan-mane ida atu kaben nia sei halo kuartu ida iha nia aman nia uma no lori nia noiva bá moris iha neebá.
Iha inisiu, la iha indikasaun hosi Maromak katak mane ida bele kaben hó feto barak no la permiti ba ema ne'ebé kaben ona atu soe-malu. Tanba saida mak Moisés iha bíblia permiti ema soe-malu? Na'i Jesus hatán "Moisés fó lisensa atu hakerek sertifikadu soe-malu nian hodi ema bele soe sira-nia feen.” Maibé Jesus dehan ba sira: “Tanba imi-nia ulun-toos mak nia hakerek ukun-fuan neʼe ba imi. Marco 10:4-5
Dala barak kaben na'in sira, fa'an matan tun-sa'e haree ema seluk nia fen ka la'en no komesa "hakarak" maibé Maromak Nia futarlia hatete "labele hakarak" ema nia sasan inklui ema nia kaben (Éxodos 20:17). Ita halo buat sira ne'e tanba de'it ita buka haksolok isin nian no tanba ita nia ulun toos, maibé realidade ita sira ne'ebé moris hanesan ne'e la iha haksolok iha ita nia uma-kain laran no oan sira mak sai vitima.
Mai ita hametin uma-kain atu ita nia oan sira labele sai vitima, tanba sira mak futuru ba ita nia uma-kain, uma kreda no nasaun nian.
Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Marco 10:6-8 |
0 comments:
Post a Comment