Kristu falsu no profeta falsu sira sei mosu

Tanba Kristu falsu no profeta falsu sira sei mosu no sira sei halo sinál no milagre oioin tanba koko atu dada mós ema sira neʼebé Maromak hili ona. Marco 13:22

Versu ida ne'e aplika ba momentu ne'ebé de'it komesa hosi Na'i Jesus sa'e ba Lalehan to'o Na'i Jesus fila fali mai. Simon bar Kokhba, ne'ebé mate iha  135 AD, ema Judeu sira ne'ebé tuir Nia, hanoin Katak nia mak Mesias Judeu sira nian. Sun Myung Moon hatete katak nia mak Mesias no lohi nia membru igerja  miliaun ba miliaun. Jose Luis de Jesus Miranda ne'ebé harii  "Growing in Grace International" hatete katak nia mak Jesus no Anti Kristu.   Jim Jones hatete katak nia mak reinkarnasaun hosi  Gandhi, Buddha, Vladimir Lenin, no Jesus no ema 900 liu  fiar ba nia no hemu Veneno no oho sira nia an.

Mesias falsu sira ne'e konvense ema sira ne'ebé tuir sira katak sira mak Mesias no bainhira ita fiar ba Mesias falsu sira ne'e ita sei lakon ita nia salvasaun.  Tanbasá? Tanba Na'i Jesus dehan "Haʼu mak dalan no lia-loos  no moris. Ema ida labele hakbesik ba Aman se la liu husi haʼu"

Ema fiar na'in sira presiza lee no medita Na'i Maromak nia futarlia loron no kalan atu bele hatene dutrina ne'ebé aliña hó Maromak Nia futarlia ka lae? Tanba Na'i Jesus hatete katak Maromak Nia futarlia mak Lia Loos (João 17:17).

Harohan ba Maromak loron no kalan. Intrega no submete ita nia an ba Na'i Jesus hó laran tomak. Bainhira ita fiar no halo tuir Na'i Jesus Nia hanorin Nia sei la husik ita  (João 6:37). Na'i Jesus sei sustenta ita iha loron ikus   (1 Korintu 1:8). Nia sei kuida ita atu moris santu  to'o bainhira Nia fila-fali mai (1 Tesalonika 5:23). Bainhira ita rona no halo tuir Kristu nia hanorin, ita sei koñese Nia lian no sei la tuir ema seluk nia lian   (João 10:5). Ema fiar na'in sira sei la tuir ema ida ne'ebé finje halo nia an sai Jesus.

Iha tempu ikus ne'e, bíblia deskrebe katak Anti Kristu tur iha templu ka uma Maromak nian no hatete katak nia mak Maromak (2 Tesalonika 2:4). Karik ita la estuda Maromak Nia futarlia, ita bele konfundi no fiar ba anti Kristu hanesan Maromak  (2 Tesalonika  2:1–12).

Tanba ne'e Maun-alin sira iha Kristu, lee ita nia Bíblia no simu ba Maromak Nia futarlia hanesan Lia Loos Maromak nian atu ita bele hatene Lia Loos no lia bosok (Marco 13:23).

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Marco 13:22