Fermentu Farizeu no Herodes nian

“Matan-moris bá, kuidadu hó ema Farizeu sira-nia fermentu no Herodes nia fermentu.”Marco 8:15

“Estejam atentos e tenham cuidado com o fermento dos fariseus e com o fermento de Herodes”.
Marcos 8:15 NVI

Fermentu uza hanesan metafora ba influensia dutrina no krese  (Galatia 5:9) ba buat aat (1 Korintu 5:8) ka buat di'ak (Mateus 13:33). Ema Judeu no Greek uza liafuan fermentu hanesan símbolu ba korupsaun.

Iha Evanjellu Mateus, Na'i Jesus fó atensaun maka'as ba "fermentu Farizeu no Ema Saduki sira"  (Mateus 16:6). Lukas 23:8 mentiona katak Herodes, mós, hakarak haree sinál, tanba ne'e ema sira ne'ebé tuir nia (Herodians), hakarak mós haree sinál ruma hosi Na'i Jesus. Molok ida ne'e, Eskriba sira hamutuk hó Farizeu sira demanda sinál hosi Na'i Jesus  (Mateus 12:38).

Farizeu no Saduki hanesan sekte ka grupu dentrode Relijiaun Judeu sira nian. Farizeu kaer metin ba Lei Moisés nian no Lei orál ne'ebé pasa tun husi sira nia beiala sira ne'ebé sira fiar katak Maromak fó ba Moisés atu fó ba sira. Na'i Jesus haksesuk malu hó ema Farizeu sira dala barak kona-ba tau tradisaun ema nian liu fali ema nia presiza   (Marco 2:15–28; 3:1–6; 7:1–23).

Ema Saduki rejeita Lei orál, ne'e di'ak, maibé sira simu influensia hosi kultura Greek no Romanu, ida ne'e la di'ak.  Sira iha tendensia buka pozisaun podér mundu nian no normalmente kontrola Sanhedrin.

Eskriba noHerodian sira la'os sekte ka grupu Relijiaun. Eskriba sira ne'e ema matenek no juís, sira estuda no interpreta Lei Moisés nian. Ema Eskriba sira mak inventa tradisaun ema nian ne'ebé ema Farizeu sira halo tuir hó kuidadu.  Ema Eskriba balu (maibé la'os hotu-hotu) mós tama grupu Farizeu. Karik Eskriba sira haboot Farizeu sira, grupu   Herodian haboot ema Saduki sira.  Ema sira ne'ebé estuda bíblia fiar katak sira ne'e hanesan partidu politiku ne'ebé suporta Herodes, autoridade Galileia no Perea no Emperor Roma emjerál.

So buat ida de'it mak grupu haat (Farizeu, Saduki, Eskriba no Herodian) ne'e hamutuk, buat ne'e mak Na'i Jesus nia hanorin ne'ebé hanesan amiesa ida ba sira nia ezistensia.  Ema Farizeu no Eskriba sira la kontenti tanba Na'i Jesus konfronta sira nia tradisaun ne'ebé la hakerek iha bíblia. Grupu Saduki no Herodian ta'uk karik Na'i Jesus hó nia influensia bele kria instabilidade no sira sei lakon podér politiku.  Grupu haat ne'e ho saserdote ka amululik sira hamutuk forma  Sanhedrin, korpu governasaun Judeu sira nian ne'ebé sei intrega Na'i Jesus ba autoridade Roma nian atu hedi ba kruz.  Iha tempu ida ne'e Na'i Jesus fó atensaun ba Nia dixípulu sira atu evita sira nia dutrina (Mateus 16:12)— kona-ba hadomi Liu tradisaun ema nian no podér mundu nian.

Oinsá hó ita? Dalaruma ita mós defende no halo tuir ita nia tradisaun liu fali sagrada eskritura, dalaruma mós ita halo tuir ita nia partidu ka grupu nia hakarak no sakrifika valór sagrada eskritura nian, dalaruma ita rona liu dutrina igreja nian ne'ebé lahakerek iha bíblia Liu fali sagrada eskritura, etc.

Buat sira ne'e hotu, ita halo atu manan buat mundu nian, atu hetan podér no hetan riku-soi. Maibé Maun-alin sira iha Kristu, buat sira ne'e hotu, bainhira mate ita sei la Lori. Eskritura hakerek "Tanba ita la lori buat ida mai mundu neʼe, no ita mós labele lori sai buat ida husi mundu neʼe" 1Timoteo 6:7.

Na'i Jesus mós dehan "Tuir loloos, buat diʼak saida mak ema ida hetan se nia manán mundu tomak maibé lakon ninia moris? Marco 8:36

"Neʼe duni, buka uluk Maromak nia Reiñu no Nia Lia loos no nia sei fó mós buat sira seluk ba imi. Mateus 6:33

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Marco 8:15