Na'i Jesus Nia ai-knanoik kona-ba osan drakma ne'ebé lakon hatudu mai ita oinsá Maromak Nia atitude mai ita ema maksalak.
Iha ilustrasaun ne'e, ema maksalak hanesan osan ne'ebé lakon. Feto ne'e la hakmatek bainhira nia lakon ona nia osan. Dahuluk, nia halakan ahi, atu nune'e nia bele haree moos. Tuir mai feto ne'e uza ai-sar atu dasa fatin sira ne'ebé karik nia labele asesu. Hafoin, nia buka hó kuidadu, hó badinas. Osan ne'e iha valor tebes ba feto ne'e no nia tenke hetan fali hó dalan saida de'it.
Na'i Jesus hakarak lideransa relijiosa sira kompriende katak oinsá Nia sentimentu kona-ba ema sira ne'ebé lakon hosi Reiñu Lalehan ka ema maksalak sira. Bainhira ita ema ne'ebé sala na'in, ita la'o dook hosi Maromak ba fatin ruma. Na'i Maromak lakoi ita lakon no Nia tenke halo esforsu hotu atu lori ita fila fali ba nia Reiñu Lalehan. Esforsu ne'ebé boot Liu mak Maromak sakrifika Nia Oan-mane hanesan bibi-oan ne'ebé kasu mundu nia sala. Na'i Maromak halo ida ne'e atu hamoos ita ema pekadór nia sala.
Ai-knanoik kona-ba osan ne'ebé lakon indika Na'i Jesus Nia misaun.
Na'i Jesus mai hanesan roman mundu nian, "ahi-oan ne'ebé loloos ne'ebé fó roman ba mundu" . . .(João 1:9). Na'i Jesus fornese roman ba mundu atu nune'e Maromak bele hetan fali ita, hanesan feto iha ai-knanoik ne'e, ne'ebé halakan ahi atu buka osan ne'ebé lakon.
Kada ema maksalak ne'e espesiál iha Maromak Nia futar-oin. Sei iha haksolok iha Lalehan bainhira ema maksalak ida arepende hosi sala. Ita hotu inportante iha Aman Maromak Nia oin.
Feto ne'ebé iha ai-knanoik ne'e tuir loos bele haksolok de'it hó osan restu ne'ebé nia iha. Maibé nia buka ida ne'ebé lakon hó kuidadu atu bele hetan fali. No bainhira nia hetan fali osan ne'e nia la haksolok mesak, maibé nia konvida nia kolega no viziñu sira atu halo selebrasaun. Nune'e mós bainhira ema maksalak ida fila fali ba Aman Maromak sei iha haksolok iha Lalehan. Ida ne'e mak planu salvasaun Maromak nian. Tanba ne'e mak Kristu mai iha mundu ne'e.
Na'i Maromak buka ema maksalak no haksolok bainhira nia hetan sira. Nia la kontenti bainhira ema maksalak dook hosi Nia. "... Na'i hatudu pasiénsia ba imi tanba nia lakohi ema ida lakon maibé nia hakarak ema hotu atu arrepende sala" 2Pedro 3:9
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: Hakerek_nanis.ona
 |
| Lukas 15:10 |
0 comments:
Post a Comment