Ita mak Ida neʼebé atu mai, ka ami sei hein ema seluk?”Mateus 11:3

Tanba João Batista, hasé liurai Herodes ne'ebé komete  adultériu ho Herodias ( Nia irmaun Nia  kaben), liurai hatama Nia ba prizaun, (Marco. 6:17). Iha prizaun laran João Batista rona kona-ba obra Kristu nian.  No nia haruka nia dixípulu balu ba husu Jesus: “Ita mak Ida neʼebé atu mai, ka ami sei hein ema seluk?”Mateus 11:3

Eskritura la hatete kona-ba João Nia sentimentu, maibé dala ruma nia hanoin, se Jesus ne'e Mesias duni,  tanba sa mak nia la ajuda hau ne'ebé haklaken lia loos no tenke sofre iha prizaun ne'e?  Hanesan mós ho ita, dala ruma ita tenke hasoru susar, moras oioin, ita kestiona Maromak, sé Maromak ne'e iha tanba sá Nia la ajuda hau no husik hau terus?

Mateus 11:3 hatudu mai  ita katak, mesmu ema ne'ebé brani hanesan João mós dala ruma dúvida no konfundi.  Molok ida ne'e João Batista afirma ona katak Jesus ne'e Maromak oan (João 1:29). Maibé profeta boot ne'e infrenta terus oioin no nia pasensi lakon ona.

Tanba sa mak hau  tenki iha prizaun ne'e? Iha ne'ebé promesa Kristu nian atu julga ema aat sira nia hahalok?  João husu pergunta hó honestu. Dalaruma ita  kestiona buat balu maibé ida ne'e la signifika ita la iha fé, ita so hakarak resposta.

Na'i Jesus hatete ba João atu kompara saida mak profeta Isaias hatete ona iha libru Isaiah ( Lee Isaiah 35 no 61). Ida ne'e Prova ida katak Jesus ne'e Mesias duni.

Hasoru terus oioin iha moris, keta lakon korajen. Maromak Nia liafuan iha 1Pedro 2:21 hatete "Tuir loloos, Maromak bolu imi ba dalan neʼe, tanba Kristu rasik terus ba imi, no nia husik ezemplu ba imi atu laʼo tuir ninia ain-fatin ho didiʼak"

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan