Hadomi imi-nia inimigu, no halo diʼak ba ema neʼebé odi imi

Reflesaun Lukas 6:27-36

Maibé haʼu hatete ba imi neʼebé rona daudaun: Hadomi imi-nia inimigu, no halo diʼak ba ema neʼebé odi imi (Lukas 6:27)

Hadomi  imi-nia inimigu sira no halo buat diʼak ba ema no fó debe hodi la hein atu ema selu fali.Luke 6:35

Antes Ko'alia ba oin, mai ita identifika se mak ita boot nia inimigu?

Dala barak, sira ne'e mak ema sira ne'ebé besik liu ita mak ita halo laran moras. Ita nia espoza ka eis espoza. Ita nia oan feto ka oan mane.  Ita nia inan-aman, ita nia kolega serbisu, ema ne'ebé inimigu Maromak nian, ne'ebé la gosta rona Maromak Nia futarlia. Dala ruma ema sira ne'ebé ita revela ka hatudu sira nia Hahalok aat, etc.  Entre sira ne'e, se mak ita boot nia inimigu?

Agora saida mak ita ativamente halo hodi buka sira nia di'ak? Ida ne'e mak Na'i Jesus treinu Nia dixípulu sira atu hanoin.

Oinsá hau bele hadomi hau nia inimigu? Ita husu hó sériu. Ida ne'e la'os de'it problema hanoin di'ak.  Ita presiza Na'i Jesus atu muda ita nia fuan laran atu tau fali laran ida ne'ebé Maromak nian ne'ebé nakonu hó grasa atu perdua ema mundu nian ne'ebé nakonu hó pekadu. 

Mundu ne'e nakonu hó ema ne'ebé la gosta Maromak, adultériu, fornikasaun, bosok, na'ok, kan-teen, etc. Lista bele kontinua naruk ba oin.

Ita lee iha bíblia, ema Israel sira dala barak la obedese, la iha domin no kontra Maromak, maibé Maromak nafatin hadomi no fó bensaun ba sira.   Ida ne'e mak Maromak bolu ema Kristaun atu halo. Ita iha ezemplu barak iha bíblia ne'ebé ita bele banati tuir. That is what we need to love our

Oinsá ita halo ida ne'e? Ita la tur Hein to'o domin mosu iha ita laran mak ita komesa halo ida ne'e. Maibé ita komesa hó asaun domin nian depois emosaun domin sei mosu tuir. Ita komesa hó saida mak Na'i Jesus hanorin iha ne'e:

Dahuluk, halo di'ak. Bainhira ita hetan dalan atu halo di'ak ba ita nia inimigu ne'ebé aat liu, aproveita kedas.  La'os liuhosi hamoe Nia, maibé ita koko atu kontra ita nia laran ne'ebé nakali ba ema ne'ebé ita la gosta hó domin Kristu nian. No bainhira ita halo ida ne'e, ita nia laran sei hakmatek.

Daruak, fó bensaun. Bainhira ita hanoin kona-ba ema ne'ebé ko'alia aat ita, hatete buat ne'ebé la loos kona-ba ita, buka dalan atu fó bensaun ba sira.  Oinsá ita halo ida ne'e? Liuhosi haree ema ne'e nia aspeitu positivu. Bainhira hasoru maluk sira, duké ko'alia kona-ba ba ema ne'e nia aat, ko'alia kona-ba ema ne'e nia di'ak. Tanbasá? Atu homoe sira? Lae, maibé ema ne'e rasik mak sei moe rasik. Buka dalan atu hadomi ema ne'e. 

Datoluk, halo orasaun. Normalmente, bainhira ita halo orasaun, ita sempre halo orasaun ba ita nia familia, ita nia kolega no ita nia an. Ita mós bele halo orasaun ba ita nia inimigu. Ita husu atu Maromak kastigu sira? Lae, atu Maromak fó bensaun ba sira.  Husu Maromak atu fó kurativu ba sira nia laran moras ne'ebé dala barak sai fonte ba konflitu no hahalok aat. Husu Maromak atu iha laran luak no fó bensaun ba sira. Tanbasá? Atu hamoe sira? Lae, atu  hamosu domin iha ita nia laran atu hadomi sira.

No bainhira, ita halo di'ak bainhira iha biban, fó bensaun ba sira bainhira ita hanoin sira, no halo orasaun ba sira, to'o ikus Maromak sei tau domin iha ita nia laran atu hadomi ho laran moos.

Na'i Jesus Nia hanorin mak atu forma ema fiar na'in ne'ebé haree sira nia inimigu hanesan Na'i Jesus no aman Maromak Nia haree. No hadomi sira nia inimigu hanesan Na'i Jesus Nia hadomi.  Purezemplu, Maromak haree no kuida ema mesmu ita ema sala na'in (Roma 3:23), fornese udan no ar ba ema di'ak no ema aat, no domin boot liu ne'ebé Maromak fó mak Na'i Jesus Kristu, ne'ebé mai atu soi ita ema sala na'in (João 3:16)

Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15

Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7

Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.

Maromak akonpaña ita hotu nia moris ohin loron no ba oin🙏🙏🙏

Mídia Dalan ba Lalehan.

Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan

Lukas 6:27