Fé inportante tebes ba ema Kristaun, tan ne'e mak Eskritura ko'alia mai ita katak se la hó fé imposivél ba ita atu haksolok Maromak (Tuir loloos, se ita la iha fé, ita labele halo Maromak kontente. Tanba ema neʼebé hakbesik ba Maromak tenke fiar katak Maromak iha duni, no mós fiar katak Maromak sei fó kolen ba sira neʼebé buka nia ho laran" Ebreu 11:6).
Fé hanesan prezente ne'ebé boot hosi Maromak. Efeso 2:8–9 hatete "Liuhosi imi-nia fé mak imi hetan ona salvasaun tanba ninia laran-diʼak, no neʼe laʼós tanba imi-nia esforsu rasik, maibé ida-neʼe mak prezente hosi Maromak. Salvasaun neʼe laʼós liuhosi imi-nia hahalok, atu nuneʼe ema ida la iha razaun atu gaba an"
Kristu ko'alia ba ninia dixípulu sira katak: hó fé ne'ebé ki'ik tebes hanesan mostarda musan sira bele muda foho. Fé hanesan mostarda musan ne'e signifika saida?
Iha referensia rua mak temi kona-ba "fé hanesan mostarda musan" iha Eskritura. Dahuluk, iha Mateus 17:14–20, ita lee iha neebá katak Kristu Nia dixípulu sira labele duni sai espiritu aat hosi labarik mane ida, mesmu antes ne'e Na'i Jesus fó ona podér ba sira atu halo buat sira ne'e (Mateus 10:1).
Iha Mateus 17:19 ita lee katak bainhira dixípulu sira husu ba Na'i Jesus, tanbasá mak sira labele duni sai espiritu aat ne'e, Na'i Jesus hatán, “Tanba imi-nia fé kiʼik. Haʼu hatete loloos ba imi: Se imi-nia fé boot hanesan mostarda-musan, imi sei hatete ba foho neʼe: ‘Muda husi neʼe hodi bá fali neʼebá’, no foho neʼe sei muda, no la iha buat ida neʼebé imposivél” Mateus 17:20
Tuir mai iha Lukas 17:6, Na'i Jesus hatete ba Nia dixípulu sira, “Se imi-nia fé boot hanesan mostarda-musan, imi bele dehan ba ai-amora neʼe: ‘Fokit ó-nia an no kuda fali iha tasi laran!’ no ai neʼe sei halo tuir imi".
Liuhosi ilustrasaun mostarda musan ne'ebé ki'ik hanesan ezemplu, Na'i Jesus ko'alia kona-ba podér Maromak nian ne'ebé la iha limitasaun ba ema sira ne'ebé iha fé ba Nia.
Ita hatene katak Na'i Jesus Nia deklarasaun kona-ba muda foho no fokit ai, labele interpreta literalmente. Save atu kompriende versikulu ida ne'e mak liuhosi fé, ne'ebé hanesan prezente hosi Maromak.
Podér Maromak nian refleta natureza Maromak nian "omnipotente" Maromak bele buat hotu. Mostarda musan, hanesan ai-musan ne'ebé ki'ik liu iha Mediu-Oriente, tan ne'e konkluzaun mak " atu halo buat boot ruma iha ita nia moris, presiza de'it fé ne'ebé ki'ik"
Hanesan ai-knanoik kona-ba mostarda musan (Mateus 13:31–32). Na'i Jesus hakarak hanorin mai ita katak "ki'ik" ne'e boot bainhira ida ne'e mai hosi Maromak.
Mai ita enkoraje malu ita sempre iha fé ba Maromak.
**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
 |
| Lukas 17:6 |
0 comments:
Post a Comment