Ida ne'e mak Na'i Jesus hatete bainhira Nia amá no maun-alin sira buka Nia. Ida ne'e ita rona hanesan estrañu iha ita nia tilun. Maibé St Lukas nia audience sira iha momentu neebá no ita sira ne'ebé estuda Maromak Nia futarlia iha tempu agora hatene katak konsekuensia hosi halo tuir Na'i Jesus Nia liafuan mak sei hetan opozisaun hosi familia rasik tanba Na'i Jesus Nia liafuan barak mak kontra ita nia tradisaun no prátika fiar nian ne'ebé ezisti ona.
Bainhira ita infrenta situasaun hanesan ne'e, ita tenke hili entre Na'i Jesus Nia hanorin ka familia nia hakarak. Na'i Jesus tenke sai númeru dahuluk. Ema se de'it mak rona Na'i Jesus Nia liafuan no halo tuir, sira ne'e mak Na'i Jesus Nia familia.
Naturalmente ema hanoin katak, Na'i Jesus sei fó prioridade bá Nia familia. Maibé liuhosi versu iha leten hatudu mai ita katak ema hotu-hotu bele sai membru familia Na'i Jesus nian. Ema ne'ebé besik ba Na'i Jesus la depende ba status sosiál, grau akadémika, etc maibé depende ba "rona Nia futarlia no halo tuir"
Maibé oinsá ita halo tuir? Liafuan prinsipál ne'ebé Na'i Jesus ko'alia mai ita mak hakerek iha bíblia. Na'i Jesus hanorin ita atu fiar no halo tuir saida mak hakerek iha Sagrada Bíblia.
Relasaun familia Na'i Jesus nian nakloke ba ema hotu ne'ebé hakarak rona Na'i Maromak Nia futarlia no halo tuir.
Mai ita husu ita nia an, hau rona na halo tuir Na'i Maromak nia futarlia ona ka seidauk? Se seidauk karik, mai ita rona no halo tuir Na'i Nia futarlia.
Agora ita lee ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Lukas 8:21 |
0 comments:
Post a Comment