Lei na'in sira ne'ebé Na'i Jesus hasé mak ema Farizeu ne'ebé sai hanesan professor Lei Maromak vnian. Sira ne'e mós hanesan lideransa relijiaun iha tempu Na'i Jesus nian. Iha ita Nia tempu karik sira ne'e mak ema sira ne'ebé estuda teolojia hanesan pastor no pendeta sira.
Atu sustenta sira nia profesaun dala barak, ema Farizeu sira halo misteriu boot kona-ba sentidu ka signifika hosi Maromak Nia futarlia no lei Maromak nian. Mesmu tuir loloos ne'e buat simples Ida no fasíl. Sira nia lukru no privilejiu depende ba hamosu impresaun katak ida ne'e difisíl.
Tan ne'e sira foti lei Maromak nian iha sira nia liman rasik, no interpreta tuir sira nia hakarak.
Farizeu sira, harii no hadi'a rate profeta sira, finje katak sira sampatia ba profeta sira nia obra, maibé Na'i Jesus hatene sira nia laran, sira nia hanoin aat. Liuhosi rejeita Na'i Jesus Nia hanorin sira la'os de'it separa sira nia an hosi Maromak maibé mós prevene ema seluk atu koñese Maromak.
Iha kontestu ne'e, Na'i Jesus hanorin mai ita katak: ita responsabél ba ita nia asaun sira no ita mós responsabél ba asaun ema seluk ne'ebé tuir ita Nia ezemplu ka hanorin ne'ebé sala.
Farizeu sira sai hanesan peritu ba lei Maromak nian, maibé sira rasik la halo tuir ka prátika Na'i Maromak Nia ukunfuan ne'ebé sira hanorin maibé sira mós komete pekadu liuhosi prevene ema seluk atu kompri Na'i Maromak Nia ukunfuan.
Lisaun ba manorin na'in sira hanesan ansiaun igreja sira, katekista sira, pastor ka pendeta sira, pregadór sira mak: hanorin buat ne'ebé loos, hanorin buat ne'ebé aliña hó Maromak Nia futarlia. Karik ita hanorin sarani sira buat ne'ebé kontrariu hó dutrina Bíblia nian no to'o ikus sarani sira prátika buat ne'ebé kontra Maromak Nia futarlia, manorin na'in sira sei responsabél ba prátika ne'ebé sala hosi sarani sira.
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan.
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan
 |
| Lukas 11:52 |
0 comments:
Post a Comment