Iha ai-knanoik ne'ebé Na'i Jesus konta iha Lukas 16, kona-ba ema riku ida no Lazarus ne'ebé kiak.
Istoria ne'e kontinua hó saida mak akontese hafoin Lazarus no ema riku ne'e mate (16:19-23). Ema riku ne'e bainhira nia sei moris nia hatudu nia riku liuhosi hatais ne'ebé kapás no halo festa ne'ebé luxu. Hosi sorin seluk, Lazarus ne'e nakonu hó kanek, hamlaha no asu sira mai lambe nia kanek sira. Hafoin mate, Lazarus lori ba Abrão, Maromak Nia kolega no Israel sira nia aman (Lukas 3:8; 13:28-29). Maibé, ema riku ne'e lori ba infernu/Hades, fatin kastigu nian (Lukas 10:15).
Iha konversa entre ema riku ne'e hó Abrão (Lukas 16:24-26). Ema riku ne'e husu atu haruka Lazarus atu hakman nia terus iha infernu/Hades, maibé Abrão hatete ida ne'e labele akontese tanba iha sira nia moris, Lazarus terus no ema riku ne'e moris di'ak. Maibé agora Lazarus hetan moris di'ak no ema riku ne'e mak terus fali. Abrão hatete "iha rai-kuak kleʼan neʼebé haketak ami no imi" Lukas 16:26 no labele hakur ka atravesa.
Agora ema riku ne'e hatene katak, bainhira mate ona labele ajuda malu, entaun ema riku ne'e husu Abrão atu haruka Lazarus ba fó atensaun ba nia maun-alin na'in 5 kona-ba Infernu/Hades (Lukas 16:27-41). Abrão hatete: sira iha ona Moses no profeta sira atu fó atensaun ba sira. Abrão nia resposta ne'e hanesan hó St Lukas nia emfaze katak Na'i Jesus Nia hanorin hanesan kontinuasaun hosi Moses no profeta sira (lee Lukas 24:26-28; 44-48; lee mós Lukas 16:16-17).
Bainhira ema riku ne'e mantein katak, nia maun-alin sira sei muda sira nia dalan moris karik iha ema ida mai hosi ema sira ne'ebé mate ona (Lukas 16:27-28), Abrão dehan "Se sira la rona Moisés no profeta sira, neʼe katak sira mós sei la fiar maski ema ida moris hiʼas husi mate. Lukas 16:31. Profesia ida ne'e hakonu bainhira Na'i Jesus moris hi'as (Lukas 9:22; Apostolu 1:22). Maibé keta haluha katak profesia ida ne'e mós hakonu (fulfilled) hafoin loron ka semana bainhira Lazarus hosi Betania moras (João 11:1). Hafoin ida ne'e, Lazarus hosi Betania mate, no liutiha loron balu, Na'i Jesus halo Lazarus moris fali. Hau fiar katak bainhira Lazarus moris fali, nia fó testamuña barak kona-ba podér Na'i Jesus nian bele fó resuresaun ba ema mate. Maibé ema Farizeu, Eskriba sira, Saduki no saserdote sira nafatin lafiar nafatin no sira buka dalan atu oho mós Lazarus hosi Betania (João12:10).
Na'i Jesus moris, mate no moris hi'as ona. Maibé Nia hanorin, nia Mandamentu hakerek hela iha Bíblia, seráke ita fiar no halo tuir? Desizaun iha ita idaidak nia liman.
**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
 |
| Lukas 16:31 |
0 comments:
Post a Comment