Na'i Jesus hatán ba nia, hodi dehan: “Ema hotu neʼebé hemu hosi bee neʼe sei hamrook fali. Maibé ema neʼebé hemu bee neʼebé haʼu fó, nia sei nunka sente hamrook tan, tanba bee neʼebé haʼu fó ba nia sei sai hanesan bee-matan neʼebé suli iha nia laran hodi fó nia moris rohan-laek. João 4:13-14
Na'i Jesus oferese bee ba feto Samaria ida - bee moris nian (João 4:10). Maibé feto ne'e sei dúvida (João 4: 11-12), no Na'i Jesus responde fali no promete katak nia sei la hamrook tan. Ida ne'e la'os bee baibain maibé bee ne'ebé espesiál. Bee ida ne'e fó moris Rohan-laek!. Entaun, bee saida mak Na'i Jesus ko'alia iha ne'e? Ikus mai, Na'i Jesus fó nia resposta iha João 7:38-39, hanesan tuir mai:
Ema neʼebé fiar mai haʼu, hanesan eskritura fó-hatene ona: ‘Bee moris nian sei suli sai husi ninia laran'. Maibé, nia koʼalia liafuan sira-neʼe kona-ba Maromak nia espíritu neʼebé lakleur tan ema sira neʼebé fiar ba nia sei simu. Iha tempu neʼebá sira seidauk simu espíritu neʼe tanba Jesus seidauk hetan glória"
Na'i Jesus uza “bee” hanesan símbolu ba Espiritu Santu. Nia fó ba ita Espiritu Santu atu hakonu no hela hó ita.
Nota katak Na'i Jesus ko'alia kona-ba "Bee moris nian" ne'ebé suli sai hosi ema fiar na'in sira. Ita presiza husu ita idaidak nia an , tipu bee moris saida mak suli sai hosi ita? Seráke turuk de'it, karik suli kontinua ka intupidu? Espiritu Santu tenke halo mudansa ka transformasaun iha ita nia moris. Na'i Jesus la ko'alia kona-ba bee moris ne'ebé turuk de'it maibé maibé be moris nian ne'ebé suli hanesan mota.
Na'i Jesus Nia bee moris mak Espiritu Santu. Espiritu Santu ajuda ita kompriende Na'i Maromak liuhosi fó kompriensaun espirituál ba ita (1 Kor. 2:11-16). Nia direji ita ba Na'i Jesus, tau ita iha Na'i Jesus, no halo ita maduru iha Na'i Jesus. Espiritu Santu hela hó ita (Gal. 5:25) no haforsa ita atu moris hanesan ema Kristaun ne'ebé loloos (Efeso 5:18-21). Espiritu Santu transforma ita hosi ita nia hahalok ne'ebé la tuir Na'i Maromak Nia hakarak sai ema ne'ebé obedese ba Na'i Maromak. Agradese ba Na'i Maromak.
✝️✝️✝️✝️✝️✝️✝️✝️✝️✝️✝️✝️
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
 |
| João 4:13-14 |
0 comments:
Post a Comment