Ita ema maksalak labele kompriende eskritura bainhira Na'i Maromak la fó kompriensaun ba ita. Ita nia edukasaun bele aas maibé ita sei labele kompriende eskritura bainhira ita uza ita nia matenek mundu nian.
Tanbasá mak ita labele kompriende eskritura hó ita nia matenek rasik? Maromak Nia futarlia ko'alia "Maibé ema neʼebé moris tuir deʼit hakarak isin nian lakohi simu buat neʼebé mai husi Maromak nia espíritu, tanba nia haree buat sira-neʼe hanesan buat neʼebé beik. Nia la hatene buat neʼebé Maromak nian, tanba nia tenke buka-hatene buat sira-neʼe ho ajuda husi Maromak nia espíritu"
So Maromak liuhosi Nia espiritu santu de'it mak bele loke ita nia neon atu bele kompriende Na'i Maromak Nia futarlia. Na'i Maromak mak bele rezolve ita nia dúvida, loke ita nia laran ka neon atu simu Na'i Maromak Nia futarlia hó haraikan hó simplisidade hanesan labarik ida (lee Apostolu 16:14; Tiago 1:21; Marco 10:15).
Klaru bainhira ita Maromak Nia futarlia, iha buat balu mak ita la kompriende, maibé to'o tempu ida Na'i Maromak rasik mak sei fó kompriensaun ba ita. Karik la kompriende buat balu intrega de'it ba Na'i Maromak. Maromak Nia futarlia ko'alia "Buat sira neʼebé subar hela mak Na'i ita-nia Maromak nian, maibé buat neʼebé hatudu sai ona mak ita-nian no ita-nia bei-oan sira-nian ba nafatin, atu nuneʼe ita bele halo tuir liafuan hotu iha Ukun-Fuan neʼe" Deuteronomo 29:29
Na'i Maromak loke ita nia neon atu ita bele kompriende eskritura, la'os atu halo ita iha matenek no sabedoria liufali saida mak hakerek nanis ona iha eskritura. Maibé Na'i Maromak loke ita nia neon atu submete ita nia an tomak ba Na'i Maromak Nia futarlia.
**********************************
Agora ita rona ona Maromak Nia futarlia, no Maromak dehan nune'e:
Se ohin loron imi rona ba ninia lian, imi keta husik imi nia laran-toos hanesan iha tempu neʼebé imi-nia beiʼala sira provoka haʼu atu sai hirus tebes. Ebreu 3:15
Na'i Jesus dehan "Ema neʼebé rona ba imi rona mós ba haʼu. No ema neʼebé la simu imi la simu mós haʼu. Liután neʼe, ema neʼebé la simu haʼu la simu mós Ida neʼebé haruka haʼu mai.” Lukas 10:16
Maromak mós hatete nune'e:
Buka Na'i bainhira imi sei bele hetan nia. Bolu nia tanba agora nia sei besik imi. Ema aat tenke husik ninia dalan No ema laran-aat tenke husik ninia hanoin aat sira; Husik nia fila fali ba Maromak, neʼebé sei hatudu laran-sadiʼa ba nia, Fila fali ba ita-nia Maromak, tanba Maromak sei fó perdua ho laran-luak. Isaias 55:6-7
Tanbasá?
Tempu sei toʼo mai Bainhira haʼu halo hamlaha boot mosu iha rai neʼe, Neʼe laʼós hamlaha ba ai-han ka hamrook ba bee, Maibé hamlaha atu rona Maromak nia liafuan. Sira sei hakaʼas an laʼo husi tasi ida ba tasi seluk No husi parte norte ba parte leste. Sira sei laʼo-lemo hodi buka Maromak nia liafuan, maibé sira sei la hetan. Amos 8:11-12
Maromak akonpaña ita hotu nia moris ohin loron no ba oin🙏🙏🙏
Mídia Dalan ba Lalehan.
Atu lee kona-ba topiku seluk-seluk, favor vizita ka follow dalanbalalehan.blogspot.com ka like ka vizita webpage Facebook: Dalan ba Lalehan ka Instagram: hakerek_nanis.ona
Favór fahe tutan KARIK LA MOE kona-ba Maromak Nia futarlia.
"Tanba ema se deʼit neʼebé moe kona-ba haʼu no kona-ba haʼu-nia liafuan, Oan-Mane mós sei moe kona-ba ema neʼe bainhira nia mai iha ninia glória no Aman nia glória hamutuk ho anju santu sira-nia glória". Lukas 9:26
 |
| Lukas 24:45 |
0 comments:
Post a Comment